VOV4.M’nông: Tâm bôk nau rƀŭn tal 4 geh tâm pơh rlau aơ, rnôk rgop nau mpeh nau rgum dŏng neh lvang năm 2021-2030, rƀŏng tât năm 2050 ndrel nchrăp dŏng neh 05 năm (2021-2025), Uỷ ban Rnâng kan Quốc hội ê ân Uỷ ban ngân dân n’gor geh dŏng neh tăm ba, tăm bri njrăng rdâng mih, sial, neh bri dŏng kan, nau aơ ân geh mbơh Thủ tướng Chính phủ uănh ƀư.

            Kruanh n’gâng kan ntŭk ntu gŭ âm Trần Hồng Hà mbơh, nkô̆ nau bah nau rgum lah nau pă neh tŏng dơi nau ŭch hun hao ntrong ngih vâl gung trong ân geh tâm ban, đăp mpăn nau nthoi ntŭk hun hao âk ntŭk kan, rgop nau kan, ăp ntrong kan văng sa ndel ăp nkuăl nsôih ƀư nau hun hao neh dak, mât đăp mpăn 3,5 rkeh ha neh bri tăm bam đăp mpăn nkŭm n’hâm tâm rnoh 42-43%. Uỷ ban Rnâng kan Quốc hội ân lah, nau ngăn tâm du đê̆ ntŭk, nau dŏng neh tăm ba gay ma tăm ăp ntil tơm tăm êng mô lah rong tui ka dôl geh nau săk jêng mpeh văng sa. Kơl an nau đă ntrơn rgâl geh tăm ân tâm di tâm neh tăm ba, Kruanh Uỷ ban tơm prăk-Ngân sách Nguyễn Phú Cường, ân lah:

            ‘Rnôk aơ mât rnoh neh tăm ba, đăp mpăn ndơ sa. Êng neh tăm ba dơi ntrơn rgâl jêng tăm tơm ăp năm jêng tăm tơm jŏ năm. Ngăn lah mra rnoh neh tăm ba tâm nkuăl Đồng bằng sông cửu Long. Nkre tăm ba du năm du ha-bu geh nklăp 50-70 rkeh. Yơn lah jêng tăm tơm êng ri mra geh 500-700 rkeh”.

            Yơn lah, ăp ntoh măt ân lah, nau dŏng neh tăm ban ân nau kan mô hôm tăm ba kŏ mô geh nơih gay ma njêng neh tăm ba. Đă ân geh uănh nkô̆ nau, nau kan ân dơi ntrơn rgâl, nkuăl mra geh ntrơn rgâl, ntŭk geh ntrơn rgâl. Rvê ngăn tât nau đă bah Chính phủ mpeh nau ân Uỷ ban nhân dân geh dơi ntrơn rgâl nau dŏnh neh tăm ba, neh bri njrăng rdâng sial, dak, bri dŏng kan ma mô mbơh đah Thủ tướng Chính phủ ndơn, Kruanh Uỷ ban Pháp luật bah Quốc hội Hoàng Thanh Tùng ân lah nau ntrŭnh kơt nê mô geh tâm ban đah nau ntrŭnh bah Luật neh ntu:

            ‘Jao nau dơi ân Uỷ ban nhân dân n’gir mra dơi ntrơn rgâl nau dŏnh neh tăm ba rlau 10 ha. Neh bri njrăng sial, dak, dŏng ƀư kan rlau 20 ha. Tĭng nau ntrŭnh bah luật neh ntu dôl lah Thủ tướng ndơn ân rnôk aơ ntrơn ân UBND n’gor ri êng ngăn luật, ƀư jêng nau mô tâm ban bah Luật neh ntu. Lah tâm dâng 10 ha neh tăm ba, tâm dâng 20 ha neh tăm bri, njrăng sial, dak, dŏng kan, nkuăl dơi geh nau ntrơn rgâl yơn mbơh Hội đồng nhân dân jêh nê Uỷ ban Nhân dân n’gor mơ dơi ƀư. Tâm rnôk kâp nơm ân dŏng ƀư UBND n’gor ƀư jêh ri mbơh ân Thủ tướng ri kơt nê mô tâm di, mô geh tâm ban rnôk nau ntrŭnh bah Luật neh ntu”.

            Uỷ ban Rnâng kan Quốc hội đă mât ân nâp neh tăm ba gay ma ntrơn rgâl jêng nau dŏng neh tuch tăm êng gay mô khuch tât ăp nau geh jêng bah neh tăm ba, rnôk ŭch ri mra dơi plơ̆ tay tăm ba, n’huch ngăn nau khuch bah nau ntrơn rgâl tăm ba rtâm ăp ntŭk dơi geh tăm ba jêng tăm ndơ êng, mât đăp mpăn nau rgum hun hao bru, săk tam rgop nsum đah nau tăm bri, hun hao văng sa tă bah bri ndrel mât đăp mpăn ntŭk ntu.

            Mpeh nau đă ân UBND n’gor ntrơn rgâl neh tăm bah, tăm bri njrăng sial, dak, bri dŏng kan ma mô kâp mbơh ân Thủ tướng Chính phủ ndơn tĭng nau ntrŭnh bah Điều 58 Luật neh ntu. Uỷ ban Rnâng kan Quốc hội ân lah, aơ lah du nau rgâl nau kan têh ân geh rgum, nchră ân nâp neh ntu, ê dơi ndơ̆ nau kan aơ tâm nau nchrăp nau ntrŭnh. Lah ŭch geh ngăn ri Chính phủ mra rgum, nchră ngăn ăp nau gay ma ndơ̆ Quốc hội rnôk ƀư nau nchrăp Luật neh ntu tâm rơh tât. Mpeh ăp nau kan mât, dŏng neh ntu tâm rơh tât, Kruanh Quốc hội Vương Đình Huệ đă:

            ‘Ntrong kan tât aơ tă ân geh ƀư ân nâp nau kan mhe gay đăp mpăn nau uănh rnoh neh ntu. Yor nau kan mât neh ntu lah nau dơi gay ma uănh n’ôi prêh ngăn bah Quốc hội tâm nau ƀư nau kan têm nkrem, njrăng nau mpŭng lir. Tât aơ tă rnoh neh ntu ân geh tâm di, hăn tât ăp ntŭk gay ma uănh. Nau geh ma mô tâm di ma nau ngăn rgum mô dơi ri mô ueh. Jêr nau mpơl ƀư ngăn”./.

            Nŭih rblang: H’Thi