VOV4.M’nông: Mpeh rnoh khlay tâm di, Thẻ Căn cước công dân geh ntrŭp chíp lah ntil si ƀŭt rnă săk bah nuĭh ƀon lan neh dak Việt Nam geh rnoh khlay an saơ di mpeh căn cước công dân bah nuĭh ƀon lan dơi pă an thẻ gay tĭng ƀư ăp ntil rhŏ dŏng ta neh dak Việt Nam.

      Thẻ Căn cước công dân dơi dŏng rgâl an hộ chiếu nkhêp Việt Nam n'hanh dak bah dih ký ton nkô̆ mô lah tâm ton dak bah dih an nuĭh ƀon lan dak ký ton dơi dŏng thẻ Căn cước công dân rgâl an nău dŏng hộ chiếu ta neh dak nsum.

      Nhih pah kan, mpôl kan, êng nuĭh geh nău dơi đă nuĭh ƀon lan n'gluh thẻ Căn cước công dân gay uănh năl mpeh căn cước n'hanh ăp nău lư geh tât.  Rlău ma nê, Nhih pah kan, mpôl kan, êng nuĭh geh nău dơi mbra dŏng mbrô năl săk êng nuĭh ta thẻ Nhih pah kan, mpôl kan, êng nuĭh geh nău dơi gay uănh năl nău lư bah nuĭh dơi pă an tâm ntŭk rgum mât prăp nău lư neh dak mpeh ƀon lan gŭ n'hanh ntŭk mât prăp nău lư way rnâng kan tĭng quy định bah pháp luật đŏng.

      Rnôk n'gluh ndơ̆ an thẻ Căn cước công dân tĭng nău đă bah nhih pah kan, mpôl kan, nuĭh geh nău dơi ri nhih pah kan, mpôl kan, nuĭh geh nău dơi nê mô dơi đă  nuĭh ƀon lan n'gluh tay si ƀŭt êng ƀa ƀa kơp dơn ăp nău lư hŏ nchih mbơh ta thẻ Căn cước công dân. Nghih dak mât njrăng nău dơi, nău geh tâm di bah nuĭh dơi pă an ƀư thẻ Căn cước công dân, đăp mpăn nău dŏng tâm di n'hanh dơh glêh ngăch.

      Điều 21 Luật Căn cước công dân quy định rnoh năm deh rgâl Căn cước công dân kơt bah kơi aơ: Thẻ Căn cước công dân ân dơi rgâl rnôk nuĭh ƀon lan tŏng 25 năm deh, tŏng 40 năm deh n'hanh tŏng 60 năm deh. Nkhêp thẻ Căn cước công dân dơi pă an, rgâl, ƀư tay tâm 2 năm bah năp năm quy định ri hôm geh rnoh dŏng tât năm rgâl tay thẻ bah kơi nê đŏng.

Si ƀŭt, rêng ƀư pă an Căn cước công dân ntrŭp chíp điện tử dŭt dơh, ngăch gơnh nơm geh rgum prăp nău lư ƀon lan gŭ. Jŏ mplơ̆ thẻ Căn cước công dân ntrŭp chíp điện tử lah bah kơi 7 nar mô lah 15 nar pah kan kơp ntơm bah nar dơn tŏng ăp hồ sơ, uănh tĭng nuĭh ƀư mhe, rgâl mô lah pă an ƀư tay tă bah an geh roh. Thượng tá Huỳnh Thị Thu Trang, Groi kruanh jrô kan PC06, công an nkual ƀon têh Hồ Chí Minh an gĭt: thẻ Căn cước công dân mhe dja nsĭt tay dŭt âk nău dơh an nuĭh ƀon lan, lơn lah bah kơi nar 1/7/2021, rnôk Bộ Công an tâm pă nău lư nuĭh ƀon lan an ăp n'gâng kan tâm mât uănh Ngih dak, ri mbra mô kâp si ƀŭt kơp dơn rnôk hăn ƀư si ƀŭt si tra êng ƀa ƀă bah nuĭh ƀon lan.

     “Aƀaơ, he geh nklăp 22 ntil si ƀŭt rnôk nuĭh ƀon lan geh nău hăn ƀư. Thẻ  Căn cước công dân ntrŭp chíp mbra rgum geh lĕ rlău 30 ntil si ƀŭt rnă săk êng nơm kơt: thẻ BHYT, BHXH, mã số thuế êng nơm, bằng ƀĭt ndeh. Let năp tay nuĭh ƀon lan djăt ma n'gluh mbơh du mblâm thẻ Căn cước công dân rnôk geh hăn ƀư si ƀŭt dơm. Ta thẻ dja nuĭh ƀon lan mbra dŏng điện thoại quét mã QR code mbra mpơl dơi nău lư ta lha chứng minh thư nhân dân ơm bah he”.

       Điều 27 Luật Căn cước công dân năm 2014 quy định nău dơi pă an, rgâl, pă an ƀư tay thẻ Căn cước công dân lah Nhih pah kan mât uănh căn cước công dân bah Bộ Công an. Nuĭh ƀon lan mbra sơch ngoăy tâm ăp ntŭk bah kơi aơ gay ƀư si ƀŭt pă an thẻ Căn cước công dân rnôk hŏ tŏng năm deh dơi pă an thẻ căn cước tĭng di nău dơi an.

• Nhih pah kan mât uănh căn cước công dân bah Bộ Công an;
• Nhih pah kan mât uănh căn cước công dân bah Công an n'gor, nkual ƀon têh mpeh trung ương;
• Nhih pah kan mât uănh căn cước công dân bah Công an nkuâl, quận, thị xã, nkual ƀon têh mpeh n'gor n'hanh đơn vị hành chính tâm ban nê;
• Nhih pah kan mât uănh căn cước công dân geh nău dơi ƀư si ƀŭt pă an thẻ Căn cước công dân ta xã, phường, thị trấn, nhih pah kan, đơn vị mô lah ta ntŭk gŭ bah ƀon lan nơm nkhêp geh nău khlay.

     Wât di n'hanh ăp tŏng mpeh rnoh khlay tâm di bah Căn cước công dân, tâm ban kơt n'glĕ nău dơi pă an ƀư Căn cước công dân lah nău dơi n'hanh nău way bah ăp nuĭh ƀon lan Việt Nam, tĭng di nău way an bah pháp luật./.

Nuĭh rblang: Điểu Thân