VOV4.M’nông: Pơh rlau aơ, ăp nkuăl tâm lam dak mbơh rnoh geh bah nau săch kan ntơh măt Quốc hội gưl XV ndrel ntơh măt HĐND ăp gưl năm kan 2021-2026. Tĭng nau nchră năl bah Kruanh Quốc hội Vương Đình Huệ, nau tă geh nsum lam dak geh 99,57% cử tri tâm lam dak hăn săch, âk lơn ma nroh nŭih tâm 5 năm bah năp nê. Rơh săch kan rơh aơ geh nau dơi, bol ma nau geh tât srê Covid-19 tât.

            Ta Kon Tum, 10 nŭih ŭch geh săch lah, cử tri n’gor Kon Tum hŏ săch geh 6 nŭih geh dơi pah kan ntoh măt Quốc hhọi gưl XV, đah rnoh ntơm 82,97% tât 93,39%. Ngăn tâm nê geh: Wa Nguyễn Văn Hùng, Uỷ viên Rnâng kan rđau kan Trung ương Đảnh, Kruanh n’gâng kan Văn hoá, Thể thao ndrel pâl n’aih; Wa Trần Thị Thu Phước (rnoi Xơ đăng) Groi Giám đốc Công an n’gor Kon Tum; Wa Tô Văn Tám, Groi Kruanh rmôt kan Ntơh măt Quốc hội n’gor Kon Tum, Uỷ viên Uỷ ban pháp luật Quốc hội, Wa Phạm Đình Thanh, Giám đốc Sở Tư pháp n’gor Kon Tum; Wa U Huấn, Uỷ viên dự khuyết Trung ương Đảng, Uỷ viên Rnâng kan n’gor uỷ, Kruanh Ban nội chính n’gor uỷ Kon Tum; Wa Nàng Xô Vi (rnoi B’râu), pah kan tâm ngih săm ƀŭt Phổ thông dân tộc nội trú n’gor tâm nkuăl Ia H’Drai. Cử tri Kon Tum hŏ săch 51 nŭih ntoh măt HĐND n’gor, geh 316 ntoh măt HĐND nkuăl ndrel 2.164 ntoh măt HĐND gưl xã. Mô geh rmôt kan săch tay.

            Tĭng nau mbơh bah uỷ ban săch kan n’gor Gia Lai, tâm nkuăl geh rlau du rkeh cử tri hăn nklăch phiếu (geh 99,86%). Nau geh bah rơh săch tâm di, tâm di rnoh, nau dơi. Ngăn lah, geh 8/14 nŭih geh dơi săch lăp ntơh măt Quốc hội gưl XV, 71/119 nŭih geh lăp kan ntoh măt HĐND n’gor, 571/951 nŭih geh tŏng nau dơi ntơh măt HĐND gưl nkuăl ndrel 4.977/8.455 nŭih geh tŏng dơi lăp kan ntơh măt HĐND gưl xã.

            Tâm Dak Lak, hŏ hăn săch tŏng ntoh măt HĐND, 75 nŭih ntoh măt HĐND n’gor, geh 513/614 nŭih ntoh măt HĐND gưl nkuăl ndrel 4.628/4.658 ntoh măt gưl xã. Rmôt kan săch kan ntoh măt mrô 9, 10,11 (xã Cư San, nkuăl Mdrak) ân săch kan tay ntoh măt HĐND xã băm kan 2021-2026, yor geh tâm dâng 50% rnoh cử tri hăn săch nklăch phiếu. Kan ƀư săch tay geh ƀư tâm 3 rmôt kan geh Uỷ ban săch kan n’gor Dak Lak nchrăp tâm nar pơh, lơ 6/6. Tĭng nau uănh năn. Nau ƀư rơh săch kan ntoh măt Quốc hội gưl XV ndrel ntơh măt HĐND n’gor năm kan 2021-2026, wa Y Biêr Niê, Kruanh Uỷ ban săch kan n’gor Dak Lak, mbơh:

             ‘Đah nau nsôih ngăn bah lam ntrong kan chính trị tă bah n’gor tât nkuăl nau ntrŭnh nau săch kan geh nau dơi ueh. Đah rnoh cử tri hăn săch kan geh 99,76% mra dơi lah aơ lah rnoh prêh ngăn ntơm sa ơm tât rnôk aơ. Nau tă geh săch kan aơ hŏ geh tŏng nau dơi mpeh 9 ntoh măt Quốc hội, mpeh ntoh măt HĐND n’gor săch tŏng 75 nŭih đăp mpăn mpeh rnoh ân dơi geh săch”.

             Tĭng nau uănh năl bah nau mbơh bah Uỷ ban săch kan n’gor Dak Nông, nau săch kan ntoh măt Quốc hội gưl XV ndrel ntơh măt HĐND ăp gưl năm kan 2021-2026 tam nkuăl geh nau dơi, đah rnoh 9,77% cử tri hăn săch. Ndrel ma nau săch kan tŏng 6 ntoh măt Quốc hội gưl XV, 52 ntoh măt HĐND n’gor, rơh săhc kan kŏ đăp mpăn tŏng mpeh rnoh đah ăp nŭih ntoh măt HĐND gưl nkuăl ndrel gưl xã. Tâm ban ma nê, ta Lâm Đồng, cử tri hŏ ƀư nau dơi ndrel nau kan bah nơm gay săch luh ăp nŭih geh nau dơi, nau blau kan, ntoh ăp tŏng, tâm ban nau n’hâm ŭch bah ƀon lan. Ngăn lah, hŏ săch tŏng 7 nŭih ntoh măt Quốc hội gưl XV, 66 ntoh măt HĐND gưl n’gor, 396 ntoh măt HĐND gưl nkuăl ndrel 3.350 ntoh măt HĐND gưl xã.

            Ntoh nau ra nar rƀŭn tal 56 bah Uỷ ban Rnâng kan Quốc hội rlau aơ, Kruanh Quốc hội Vương Đình huệ mbơh: nau săch kan ntoh măt Quốc hội mhe gưl XV ndrel ntoh măt HĐND ăp gưl năm kan 2021-2026, lam dak geh 99,57% cử tri hăn săch, âk lơn nau săch kan 5 năm bah năp. Nau săch kan geh nau dơi, bol ma rnôk tât srê Covid-19. Lam dak hŏ tŏng 500- nŭih ntoh măt Quốc hội. Ngăn lạh nau săch ntoh măt ƀon lan tâm gưl xã, nkuăl, n’gor.

            Lah rjăp, nau săch kan ueh. Kruanh Quốc hội, Kruanh Hội đồng săch kan neh dak Vương Đình Huệ đă Văn phòng Hội đồng săch kan neh dak Vương Đình Huệ đă Ntŭk kan Hội đồng săch kan neh dak ơm ƀư jêh nau mbơh ngăch njoăl tât rđau kan Đảng, Ngih dak ndrel Uỷ ban Rnâng kan Quốc hội. Hôm wa Bùi Văn Cường, Tổng thư ký Quốc hội, Kruanh văn phòng Quốc hội, Chánh văn phòng Hội đồng săch kan neh dak ri mbơh, nau săch kan hĭ geh anu dơi ndrel geh nau khlay. Cử tri lŏ uănh nau kan bah ăp ntoh măt Quốc hội lôch năm kan:

             ‘Rơh săch kan geh nau khlay. Săch dơi ăp nŭih geh blau ngăn, ntoh măt ân nau mĭn nau ŭch bah ƀon lan. Bah rơh săch kan săch luh ăp nŭih ntoh măt ân nơm, ri tâm nau kan bah nŭih ntoh măt ƀon lan lah tâm dăch dơh ma ƀon lan, djăt nau ƀon lan, nau đă bah ƀon lan tâm rnôk ƀư nau kan. Nŭih ƀon lan hôm uănh kloh ntoh măt ƀư nau kan tĭng nau ton bah nơm. Lah ntoh măt ƀư mô ueh, mô ƀư tĭng rjăp nau đă ri ƀon lan mra geh mbơh đă ăp ntŭk kan geh nau dơi uănh nchră”.

            Tĭng nau ntrŭnh bah Luất ăch kan ntoh măt Quốc hội ndrel ntoh măt HĐND Hội đồng săch kan neh dak nsing tâm nau nchih rgum nsum nau tă geh bah rơh săch kan tâm dak mbơh nay tă geh săch ndrel moh săk ăp nŭih geh anu dơi ntoh măt Quốc hội mbrơi ngăn lah 20 nar jêh nar săch (mbrơi ngăn tât lơ 12/6/2021)./.

                                    Nŭih rblang: H’Thi