VOV4.M’nông: Tâm ăp năm rlau aơ, rmôt tahen n’gor Lâm Đồng hŏ nsôih râng nau ndâk njêng ƀon lan mhe tâm nau ndâk njêng ƀon lan mhe. Ngăn lah, ăp rmôt tahen hŏ mro hăn nsum ma kônh wa rnoi mpôl đê̆ tâm nkuăl jru, nkuăl ngai, ntĭm mbơh kônh wa geh nau tuch tăm ân geh săk tam, nkre râng nau kan bon lan mhe. Bah nê, nuih n'hâm ƀon tahen-ƀon lan jêng tâm dăch, ƀư ueh rup gui Tahen Wa Hồ tâm nau rêh ƀon lan.

Đại tá Nguyễn Văn Sơn, Groi chính Uỷ, Rnâng kan rđau tahen n’gor Lâm Đồng mbơh, tâm ăp năm rlau aơ, rmôt tahen n’gor mro ƀư nau kan “Tahen nsum n’hâm ndâk njêng ƀon lan mhe”. Ngăn lah, uănh nâp lơn nau kan kơl an, ntuh kơl tât nkuăl ƀon lan rnoi mpôl đê̆.

Ngăn lah, ntơm năm 2015 tât rnôk aơ, N’gâng kan rđau tahen n’gor Lâm Đồng hŏ rgum tơm prăk âk jêt rmen gay ma nkra điện, trong hăn, ngih săm ƀŭt, ngih dak si, trong mương…rgum rlau 15.300 nar kan geh ăp rmôt tahen, dân quân tự vệ, dự bị độg viên bah ăp ntŭk kan, rmôt kan tâm tahen. Kơl an kônh wa tâm nkuăl Đam rông, nkuăl Lâm Hà mpeh kon ntil, mpa rong, ndơ tuch tăm ndrel e ẻnka. Bah nê kơl an kônh wa tâm 1 1xã geh hun hao tuch tăm, n’hao nau geh tuch tăm. N’hao săk geh văng sa geh nklăp 5,2 rmen prăk/ Hŏ geh nklăp 2000 rnăk ach o, tâm nê geh rnăk rnoi mpôl đê̆ ach o geh kơl an nau kan tă bah bôk nau kan ndâk njêng ƀon lan mhe.

Tâm 5 năm êp aơ, N’gâng kan rđau tahen n’gor hŏ ndâk njêng ndrel pă 85 ngih kơl an ân ăp rnăk geh nau jêr, dơi geh kơl ndrel nŭih geh n’hâm đah cách mạng. Rnoh kơl an ăp rnăk nklăp 80 rkeh/ ngih. Êp nê, rmôt tahen n’gor hôm kơl an ăp ntŭk kan, rmôt kan bah êng ƀư nau kan kơl an mât chăm n’hâm soan ân ƀon lan, ngăn lah ân kônh wa rnoi mpôl đê̆, nkuăl jru, nkuăl ngai, nkuăl ƀon lan rnoi mpôl đê̆ tâm n’gor. Tâm nê, hŏ ƀư khám, pă dak si mô geh roh prăk ân ƀon lan nklăp 15.500 tŏ nŭih, hŏ ƀư khám, săm, pă dak si mô roh prăk ân nŭih ƀon lan nklăp 360 rkeh.

Bu ranh Kră Jăn Ha Siêng- Tổ dân phố Đăng Gai Rít B, nkuăl têh Lạc Dương, nkuăl Lạc Dương, n’gor Lâm Đồng nkoch: Nau ntrŭnh ndâk njêng ƀon lan mhe bah Đảng, Ngih dak lah nau kan tâm di ngăn, tâm nê, geh nau nsum ty, rgop n’hâm, kơl an têh ngăn bah tahen ƀon lan Việt Nam. Ăp tahen tâm nkuăl, tâm n’gor ndrel ma cán bộ, viên chức, nŭih pah kan kơl an kônh wa rnoi mpôl đê̆ tâm nkuăl phung hên ƀư nau kan pơk trong hăn ân kloh ueh lơn, ngih săm ƀŭt nkra ân nâp, ngih rƀŭn thôn geh nkra ân mhe, pơk trong ân ƀon lan geh ntŭk rgum rƀŭn ân tâm di. Bah nê pơk trong ân ăp nŭih ƀon lan geh nau rgâl mhe bah ƀon lan mhe tâm Tổ dân phố phung hên nar lơn geh nau ueh lơn, ang kloh lơn.

Du nau kan khlay đŏng tâm nau nsum n’hâm ndâk njêng ƀon lan mhe nkuăl rnoi mpôl đê̆ nê lah kơl an kônh wa tâm nau ntĭm ntu nau kan tuch tăm. Rmôt tahen hŏ tâm rgop nsum đah ăp ntŭk kan, n’gâng kan tuch tăm, ăp nkuăl, nkuăl ƀon têh tâm n’gor, ăp mrôt kan chính trị-rêh jêng ƀư nau nkoch trêng ndrel ntĭm nau kan tuch tăm ân kônh wa rnoi mpôl đê̆. Ăp nau kan kơt lah tăm ba dak, ntĭm nti nau kan tăm tơm sa play, tơm gleh nar, kơl an ƀư 12 nau kan tăm, mât chăm cà phê, nau ndum phân vi sinh…Tâm rgop nsum đah ntŭk kan ntrŭt nsôr nau kan tuch tăm tâm ăp nkuăl, cán bộ nŭih ntĭm nau kan tuch tăm bah ăp xã ndrel ăp rmôt kan êng ƀư dơi geh 11 jrâu pơk ntĭm nti nau kan tuch tăm, 5 nau kan tăm tơm mắc ca hun hao tuch tăm… tă bah nê, kơl an nau kan ntĭm nti pah kan jan sa mhe, ntrŭt dăng nau hun hao văng sa, n’hao nau rêh, n’hao nau geh, n’hao nau rêh bah kônh wa ƀon lan, ngăn lah kônh wa rnoi mpôl đê̆.

Du nau kan dŭt n’hâm khay tâm nau nsum n’hâm ndâk njêng ƀon lan mhe ma rmôt kan tahen n’gor hŏ nsôih ƀư jêh ndrel njêng nau ueh lơn tâm nuih n’hâm ƀon lan lah nau kơl an tâm nau kan rêh jêng ntĭm nti, jut jăng nau mô blau play săm ƀŭt. Ngăn lah, rmôt kan văng sa neh dak Bắc Lâm Đồng hŏ kơl an ndơ dŏng, ntŭk kan dŏng tâm ăp ngih săm ƀŭt mẫu giáo tâm 11 xã tâm nkuăl bah rmôt kan ƀư nau kan đah rnoh prăk rlau 2,7 rmen. Ƀư pơk jrâu nti ndrel jut lĕ nau mô blau play săm ƀŭt ân nŭih rnoi mpôl đê̆m ăp jrâu geh ntơm 25-30 nŭih tĭng nti ta Thôn Păng Pá (nkuăl Đam Rông), thôn Tân Hợp, xã Tân Thanh, nkuăl Lâm Hà, kơl an 420 nŭih rnoi mpôl đê̆ blau răk ndrel blau nchih. Êng nê hôm ƀư âk tŏ nkoch trêng nau kan mpeh nau rêh văn hoá mhe, gŭ rêh ân đăp mpăn kloh ueh.

Ăp nau tă geh ân saơ, nau kan bah rmôt tahen n’gor Lâm Đồng tâm nau râng ndâk njêng ƀon lan mhe nkuăl rnoi mpôl đê̆ lah geh nau dơi kơp dơn. Bah nê, rgop nau geh tâm nau dơi nsum bah Lâm Đồng tâm nau ndâk njêng ƀon lan mhe, đô thị ueh mhe. Nau geh ueh bah ƀon lan, ngăn lah nkuăl rnoi mpôl đê̆ hŏ geh âk săk ntơr, âk nau rgâl mhe, rgop nau ƀư ueh tay rup gui “Tahen Wa Hồ” tâm nuih n’hâm ƀon lan./.

Nŭih rblang: H’Thi