VOV4.M’nông: Năm 2021 geh âk nau tât đah âk nau khuch ngăn bah srê Covid-19 dôl ma hăn rlet rlau, yơn đah tahen ndrel ƀon lan nkuăl geh srê, nê lah du năm ƀư rjăp ngăn nau tâm boh tahen, nau tâm boh bah tahen.

Knŭng đê̆ mông ntơm bah rnôk geh nau đă, du ngih dak si leo săm ăp nŭih geh ntưp ma srê geh ndâk ƀư, du ntŭk xét nghiệm hŏ geh ntơm njêng, ê tât 48 mông, du nau ƀư kan njăch ndăn hŏ geh ntrŭnh ƀư, đah âk ntil máy móc, ndơ dŏng ueh mhe ndrel ăp nai dak si tă bah Hà Nội, rlet ma rbăn km tât tâm nkuăl ƀon têh Hồ Chí Minh ndrel ăp n’gor mpeh ba dâng kơl an ăp nkuăl njrăng, rdâng srê. Nê lah ăp nau ƀư nau hăn kan ndal ngăn tâm rnôk mô geh nau tâm lơh bah tahen Wa Hồ bah “rlăng srê Covid-19”. Thượng tướng Võ Minh Lương, Kruanh n’gâng kan neh dak mbơh:

‘Bah năp nau tât nê ri N’gâng kan neh dak rnôk nê hŏ ntrŭnh 9 ntŭk ƀư nau kan dak si ndal, ndrel ma 175, ndrel ma tahen nai dak si miền Đông ndâl geh 2 ntŭk ƀư nau săm srê Covid-19”.

Bah nau leo săm hôm lah nau ntul rlong tă bah mpeh nŭih ji rnôk ma âk nŭih ntưp srê mô ŭch săm, sŏk jăng lơi ndơ săm tă bah nŭih jur, jêh ri hôm lah, lơh nai dak si ndrel nŭih kan tâm ngih dak si. Yơn tă bah nau gĭt rbăng, ăp nŭih nai dak si tahen hôm nsôih mât chăm ân ơm. Kơt nau nkoch bah Thượng tá Vũ Đình Ân, ntŭk mât săm ân nŭih ntưp srê Covid-19:

“Nŭih ji mô hôm dơi sŏ n’hâm, jêh ri bu klach, bu ƀư lă lêng ngăn, ma nau nê lah yor nau mô tŏng ô xy, ma nơm mô gĭt kơl an khân păng ri nơm mra geh nau tih, ndrel nau tih ri nŭih ji mra khĭt ngăn. Nau vay lah du hê ji kop ri lĕ ma ngih rvê ngăn, rnôk aơ nŭih aơ, ôi taơ nŭih êng. Yơn aơ du hê nŭih ji gŭ êng dơm, lah saơ jêr sŏ n’hâm yor srê Covid-19 ri klach ngăn”.

Nau tât khuch bah srê Covid-19 tâm nkuăl ƀon têh Hồ Chí Minh lăp jru tâm bôk rngok bu ndăm mhe rlau bar jêt năm kơt Dương Thanh Hoàng, Tahen tâm Quận 7, N’gâng kan rđau tahen nkuăl ƀon têh ndrel ăp nŭih tahen tâm ăp rmôt ƀư nau kan khlay êng: Ndơn leo ăp săk nŭih khĭt yor srê Covid-19 hôm geh nau klch ơm. Khân păng nsôih ngăn, ăp nau klach rvê ân geh chuêl lơi gay ma ndrel ma ăp tahen leo njŭn ăp nŭih khĭt nê hăn lôch tâm trong rêh bah nơm đah nau ƀư ân rjăp, tâm pă nau rngot ndrel ryơk săk nŭih khĭt leo tât ăp rnăk vâl khân păng:

‘Geh nar âk ngăn ri ntơm 10-15 nŭih du nar, âk rnôk ri phung hên hăn sĭt tât măng hôm, lŏ geh ndơn nau mbơh đŏng ri hên lŏ plơ̆ ƀư nau kan đŏng ri tât ôi ba kơi mơ geh sĭt”.

Mô êng tât tâm ntŭk geh âk srê Covid-19, ma rmôt tahen hôm râng tâm ăp nau kan ntơm bah ntŭk nkah nŭih ân tât nau mât chăm nau rêh ân ƀon lan, đăp mpăn nau rêh jêng. Tahen hŏ rgum n’ăp ma ndeh mpăr tât ndeh vah jâng gay ma ntrơn leo ndơ dŏng dak si, ndoh ndơ, ndơ ngêt sa tât ăp ngih dak si, ăp trong hăn ngih vâl ƀon lan. Nŭih tahen dak rhal bĕ ao yor lah bri duh nar, mô lah bĕ n’ăp ma ao yor bri mih yơn ăp hôp dak si, phe sông, tăp djăr, nchăp byăp mro geh leo tât ty nŭih ƀon lan tâm rnôk jêr aơ. Nau nsôih chuêl săk nơm bah ăp nô geh ƀon lan ryơk ngăn:

‘Gâp mô blau nau ma ngơi ôh, knŭng blau lah ueh ăp nŭih, rnơm ăp nŭih tahen mơ geh kơt nê, ri ma rnăk hên mô blau ma lah ơm. Dŭt n’hâm lah ueh ngăn”.

N’gâng kan ăp nkuăl geh srê dŭt n’hâm rnê ngăn nau rgop n’hâm soan rjăp, dăng, săk tam bah tahen tâm rnôk dôl ma mâp nau jêr ngăn. Groi Bí thư Thành uỷ, Kruanh UBND nkuăl ƀon têh Hồ Chí Minh Phan Văn Mãi, mbơh:

‘Tahen mô geh knŭng tâm lơh đah nau đă bah nŭih rđau nau kan nơm, ma hôm geh nau tâm lơh đah nau đă bah play nuih, tahen hŏ tât ma ƀon lan rnôk ƀon lan mâp nau jêr, ƀon lan khuch, rnôk ƀon lan ji kuet, rnôk ma ƀon lan tâm rdâng ma nau khĭt ôm ndrel ngăn lah mât kơl an ƀon lan rnôk khân păng lĕ khĭt. Gâp mĭn tâm nau vay ơm bah tahen mra geh ăp nau mhe geh nau ntô̆ n’hao ngăn mpeh tahen kơl an ƀon lan njrăng srê”.

Tâm nau tâm lơh rdâng ma phung rlăng mô mpơl săk Covid-19 bơi tât 2 năm ma aơ, bol ma du tơ̆ tay đŏng lah rjăp ăp nau ueh ơm bah tahen ƀon lan Việt Nam, nê lah: Bol ma tâm moh nau jêr, tahen mro lah rmôt kan hăn leo lor. Bol ma tâm moh nau tât, nau geh, rup gui bah tahen Wa Hồ hŏ njêng ntŭk nsing rnơm nâp ngăn bah ƀon lan. Knŭng êng tâm rơh srê tal 4, N’gâng kan tahen hŏ ƀư ueh nau leo hăn tahen têh ngăn kơp ntơm jêh rnôk tâm lơh kăl e, đah nau leo rlau 130 rbăn tahen kơl an ân nkuăl ƀon têh Hồ Chí Minh ndrel ăp n’gor mpeh ba dâng njrăng rdâng srê Covid-19./.

Nŭih rblang: H’Thi