VOV4.M’nông: Rnâng kan rđau tahen n’gor Lâm Đồng mhe ký bôk nau kan tâm rgop pah kan đah Ban trị sự Giáo hội Phật giáo Việt Nam n’gor Lâm Đồng. Kan tâm rgop mra mâp nâp lơn ăp nau tâm boh tahen- bôn lan, ƀư ân ueh nuih n’hâm tâm rnglăp rnoi mpôl. Nkre lah nau gay ma lŏ ƀư ân ueh nau tâm rlong “Bonh đă blau” ndrel “Bonh đă tâm nau kan ndâk njêng ƀon lan mhe”.

Tâm ăp năm rlau aơ, n’gor Lâm Đồng mro uănh kơl an nau kan tĭng chroh, mpôl chroh. Bah nê, pơk nau rtâm dăch dơh, tâm gĭt brăng lơn đah ăp mpôl chroh đah ăp ntŭk kan ndrel n’gâng kan bah nkuăl. Nau ngăn nê hŏ ƀư rjăp nau kan kơl an bah mrôt chroh rƀŭn tâm di nau kơl an bah Đảng ndrel Ngih dak, kônh wa tĭng chroh lah du gưl mô dơi nkah êng bah nau tâm rnglăp lam rnoi mpôl.

Phật giáo ndrel rmôt tahen ntơm rnôk ntơm tât rnôk aơ mro hăn naum tâm âk nau kan. Nau tâm ban nê hŏ rgop nau mât rnă njrăng chính trị, đăp mpăn nau rêh jêng tâm nau rêh. Nkre lah, rgop nau n’hao rup gui bah tahen Wa Hồ tâm nuih n’hâm ƀon lan.

Ƀư tĭng nau rđau bah Rnâng kan Quân uỷ Trung ương ndrel nau nchrăp kan bah Đảng uỷ Quân khu 7 mpeh nau lŏ rgâl mhe ndrel n’hao lơn tay nau rđau kan, rđau đă bah tahen tâm nau ƀư nau kan tĭng chroh tâm rơh mhe, N’gâng kan rđau kan tahen n’gor Lâm Đồng hŏ kí ton tâm bôk nau tâm rgop nau kan đah Rnâng kan chroh rƀŭn Việt Nam tâm bôk khay 4 mhe rlau.

Đại tá Trần Văn Khương-Chính uỷ Rnâng kan rđau tahen n’gor Lâm Đồng lah rjăp: “Nau kan kí ton bôk nau kan tâm rgop aơ gay lŏ n’hao nau tâm rnglăp lam rnoi mpôl, ndâk njêng ndrel mât nâp nau tâm dăch, tâm rnglăp, tâm kơl đah rmôt tahen n’gor ndrel Rnâng kan mât chroh rƀŭn Việt Nam n’gor, ƀư ân ueh nuih n’hâm bah rmôt chroh Phật giáo Việt Nam n’gor Lâm Đồng tâm nau kan ndậ njêng ndrel mât neh dak. Bah nê, rgop nau mât rnă njrăng đăp mpăn chính trị, đăp mpăn nau rêh jêng ndrel hun hao văng sa văn hoá, rêh jêng tâm lam n’gor”.

Tĭng nê, nkô̆ nau tâm rgop kan lvang năm 2021-2025 geh: Nkoch mbơh nau kan mpeh neh dak ndrel rnă njrăng ân mpôl chroh, bah nau ntrŭnh, ntrong kan bah Đảng, pháp luật bah Ngih dak, nau rnă năng neh dạk, rƀŏng tât nau mĭn kan ân aơpư nŭih tĭng chroh rƀŭn…Tâm rgop nkoch trêng, bonh đă druh ndăm lah oh kon ăp mpôl chroh ƀư ueh tĭng Luật tahen. Tâm rgop nkoch mbơh nau mhe gay ăp nŭih, ăp rmôt chroh rƀŭn gĭt kloh, tâm ban nau gay ma njrăng rdâng lơi ăp nau nsŭk rlăm, nau lơi nchrau bah phung rlăng, dun lơi nau nsing ndăn tâm ăp nau kan geh tât Phật giáo gay ma rdâng lơh nơm. Ƀư ân rmôt kan hăn kan kơl an tât ăp ntŭk, kơl ƀon lan, kônh wa mpôl chroh tâm nkuăl jru ngai jut n’huch ach o. Ƀư tâm mâp măt, ôp khâl, rhơn ăp nar lễ têh bah tahen ndrel mpôl chroh. Tâm rgop nsum ân geh săk tam nau kan kơt “Ndâk nâp nau tâm boh tahen ƀon lan” “Ngih kơl an tâm rnglăp” ân ăp mpôl chroh geh nau rêh jêr jŏt, ăp ngih rƀŭn rgum, thể cục thể thao tâm ăp ntŭk rƀŭn rgum.

Đại tá Nguyễn Công Anh-Groi Kruanh Chính trị Quân khu 7 hŏ rnê prêh ngăn nau kan tâm rgop, nkre ma lah rjăp nau kan N’gâng kan tahen n’gor Lâm Đồng lah ngoai tâm ăp rmôt kan bôk năp ƀư ueh nkô̆ nau aơ tâm Quân kuu 7. Kŏ ta aơ, êng nau nkah ăp nau kan ân geh ƀư ba kơi kí ton, Groi Kruanh chính trị Quân khu 7 lah rjăp, nau kan ân ƀư ueh lah nau nkoch trêng gay ma ƀư rjăp lơn tay nau kan ndrle nau tâm rnglăp đah mrôt tahen ndrel rmôt chroh rƀŭn tâm mpeh ba dâng Tây Nguyên.

Kruanh rnâng kan rgŏ jă n’gor uỷ Lâm Đồng Phạm Thị Phúc ntoh nau rhơn ngăn ndrel rnơm tâm nau kí ton nau tâm rgop nsum pah kan đah rmôt rđau kan tahen n’gor đah Rnâng kan rđau kan rmôt Giáo hội phật giáo Việt Nam n’gor Lâm Đồng. Rnơm lah, nau kan tâm rgop mra ueh nâp lơn tâm nau tâm boh tâm rnglăp tahen-ƀon lan, ƀư ueh nuih n’hâm tâm rnglăp rnoi mpôl. Nê lah nau kan gay ma lŏ ƀư ueh nau kan “Bonh đă ƀon lan ân blau” ndrel “Bonh đă blau tâm nau ndâk njêng ƀon lan mhe”. Thaen ndrel Phật giáo mra lŏ hăn nsum gay ma rgop nau ƀư ân ueh nau dơi bah rơh săch kan ntơh măt Quốc hội gưl XV ndrel HĐND ăp gưl năm kan 2021-2026 dăch tât./.

Nŭih rblang: H’Thi