VOV4.M’nông: Ôi lơ 10/12, tâm Ngih dak si Quân y 175, Ban tuyên giáo Trung ương, Báo điện tử Đảng cộng sản Việt Nam tâm rgop nsum ƀư nau tâm nchră khoa học “30 năm tâm rgop tahen, ƀon lan mpeh dak si tâm dak lêng, gôl dak” gay nchră ăp nau khlay, nau dơi bah nau kan aơ tâm 30 năm ma aơ, rhuăt luh nau tă blau nau kan ndrel đă ăp nau kan mhe gay ma n’hao nau kan aơ tâm rơh tât. Bah 30 năm, nôk nau kan hŏ ƀư ueh nau mât chăm n’hâm soan ân ƀon lan ndrel tahen tâm gôl dak, dak lêng, ƀư nâp nau tâm boh nau kan tâm dâng bah 972 xã, tâm nê geh 697 xã tâm nkuăl jru, nkuăl n’har bri, gôl dak. Ngăn lah ndâk ân dơi 5 nau kan rgop nsum pah kan đah ntŭk ngih kan dak si nkuăl đah rmôt tahen tâm Rnâng kan rđau kan tahen nkuăl. Rlau 40 nau mbơh tâm nar tâm nchră hŏ ƀư kloh nau ntrŭnh ân tâm di bah Đảng, Ngih dak, mô êng rgop nau mât chăm n’hâm soan ân ƀon lan, tahen ma hôm geh nau khlay đah nau bonh đă, ƀư nâp nuih n’hâm ƀon lan, nau mât rnă njrăng ƀon lan gay mât ân nâp ueh neh ntu, gôl dak bah neh dak nơm./.

Nŭih rblang: H’Thi