VOV4.M'nông: Năm 2022 hŏ tât, ăp nuĭh he hôm mpŏng tay du năm mhe lăng soih lơn, nău rêh kơt ơm mhe plơ̆ tay n'hanh rŭ âk nău nchrăp an rnăk wâl, an ƀon lan Tây Nguyên hun hao:

Bol ma nuh srê Covid – 19 tât krit nji, ndrĭ yơn tâm năm 2021, n'gor Gia Lai hôm đăt ndal tâm nău rgum geh ngân sách đah rlău 7000 rmen prăk. GDP rĭng geh tĭng bôk nuĭh geh 56,31 rkeh prăk. Tâm năm aơ, hŏ geh tay 17 xã di rnoh rdâk njêng ƀon lan mhe, nău rêh bah kônh wa tĭng kơn rgâl geh. Wa Wut, Kruanh Ƀan pah kan mặt trận thôn Đơk Rơng, xã Đăk Gla, nkuâl Đăk Đoa ŭch rŏng tâm năm mhe 2022, nuh srê mbra dơi mât kân uĕh, kônh wa djăt tay ăp trong kan bah Đảng n'hanh Ngih dak gay klaih rlău ach o jŏ jong, tâm ban kơt mât nâp săk ntơ rdâk njêng ƀon lan mhe ma nkuâl  mhe dơi geh tât:  

“Ƀon lan hŏ rgâl mhe, trong hăn geh, nhih jay kloh uĕh, kônh wa ƀon lan he tâm rnglăp. Let năp tay kônh wa ŭch ntơm bah aơ ân nsrôih, lơi thơ tha, dŭt ŭch geh nău kan, aƀaơ he ân rgum nkah tay ăp nuĭh rleh ƀlao pah kan jan sa, rgum ngêt ndrănh sa djăr. He ŭch kônh wa nsrôih lơn wăng sa, nsrôih nsan hao, bol nuh srê mhâm jêng, mpŏng kônh wa he lơi ir uănh lhơ ta năp nuh srê, nău rêh nar lơn ma hun hao, mô ji ngot ach o kơt ntơm nơh đŏng ôh.”

          Yuh A Nhưng (cán bộ Jrâu kan xã Chư Đăng Ya, nkuăl Chư Păh, Gia Lai) mbơh, xcã Chư Đăng Ya ntoh lư ndrel rgum năch hăn pâl n’aih tâm ndrel ba dih n’gor rnơm yôk ŭmnh ndrel kao si tăng dang êr tâm lam ƀon lan. Yơn lah, 2021, srê Covid-19 hŏ ƀư rnoh năch tât ta aơ n’huch âk. Yơn lah, rnơm geh nau nsôih bah n’gâng kan ndrel ntŭk kan dak si, ndrel ma nau tâm rnglăp bah ƀon lan, ri ma rnôk aơ srê geh nkân ueh, kônh wa mpŏng nau kan pâl n’aih nsum mpôl mra geh ndâk rjăp tay têm rơh tết ndrel tâm năm 2022:

          ‘Tâm năm 2021, srê lŏ ntoh luh lơh jêng nau jêr ân kônh wa, yơn rnơm Đảng, Ngih dak kơl an ri kônh wa geh ndơ sa, ndơ nsoih, đăp mpăn tâm ăp nar geh tâm nkhah, ntŭk nkhah rgum rnôk geh srê. Tâm năm 2022 aơ, gâp ŭch kônh wa lŏ tĭng nau ntĭm đă tâm nau kan njrănh, rdâng srê, nkre nsôih tâm nau ƀư nau kan tuch tăm gay ma hun hao rnăk vâl, gay nau rêh lơn ma hơm tăm, đăp mpăn”.

Năm 2021 mhe aơ, Dak Ndrung lah tơm nuh srê Covid-19 lor bôk năp bah nkuâl Dak Song, n'gor Dak Nông. Nơm geh nău rđău đă lĕ n'hâm suan bah gưl ủy, n'gâng kan ta ntŭk, ndrel ntrôl dăng pah kan nkoch trêng, jêng nuh srê hŏ dơi ntrôl rŭch. Tâm pah kan jan sa geh âk săk ntơr đŏng, lơn lah rnoh khlay tiêu, cà phê geh trong rƀŏng hao, jêng nău rêh nuĭh ƀon lan dơi rgâl geh. Nô Điểu Minh – Kruanh Uỷ ban Mặt trận Tổ quốc Việt Nam xã Dak Ndrung nkuâl Dak Song mpơl nău:

“Nău mpŏng bah kônh wa tâm năm mhe, nău bôk năp mpŏng Đảng, ngih dak ntrôl dăng pah kan njrăng n'gang, chuh n'gang Covid- 19. Mhâm ƀư gay ma chuh lam lĕ an ƀon lan mô di êng ta Dak Ndrung n'hanh Dak Song ma chuh lĕ lam dak, gay nuĭh ƀon lan ta ah ntŭk hăn dơi da dê, đăp mpăn hŏ lôch chuh vaccine. Tâl 2 đŏng lah năm 2022 cao su, cà phê kônh wa jŭr geh rnoh khlay hao lơn đŏng. Bar pe năm bah năp nơh cà phê, tiêu jŭr dŭt thuk kônh wa dŭt jêr jŏt, yơn aƀaơ rnoh khlay hŏ hao oi, kônh wa rhơn nđơr”.

          Năm 2021 rnơm gơih ntuh kơl phân poh, mât chăm tâm di nau kan ri ma 500 tơm cà phê bah rnăk nô A Thiếu, 27 năm ndrel yuh Y chạp, 23 năm tâm ƀon Đăk Ka Long, xã Đăk Hring, nkuăl Đăk Hà, n’gor Kon Tum geh âk lơn rđil ăp năm bah năp. Ntơm bah prăk tăch cà phê ndrel ndơ tăm êng, ur sai yuh hŏ ndâk geh ngih nâp, ueh tâm neh rlau 200m2 rvăt tă bah năm e. Nô A Thiếu mbơh, gay hun hao văng sa rnăk vâl, nô tâm nchră ma ur ndrel ntrŭnh săch tĭng trong tât năm mhe mra hăn pah kan tâm dak ba dih:

‘Năm rlau aơ, srê ji khuch hô, lơh nau jêr tâm nau pah kan jan sa. Yơn lah, gâp kŏ geh nau rhơn yor cà phê hao khlay. Năm rlau aơ gâp nsôih mât chăm cà phê tâm rnoh neh tâm mir gâp nơm, tăch cà phê kŏ geh 50-60 rkeh prăk jêh ri gâp ndâk ngih. Năm mhe geh nau mbơh lah geh ngih mhe gŭ ri rhơn đŏng. Yơn lah, srê ji kơt aơ mô gĭt ntă jŏ dĭng bah, păng khuch ngăn tât ăp nau kan tâm nau rêh. Jêh aơ, lah bah oi srê, gâp ndrel kônh wa ta aơ kŏ geh nau mĭn, phung hên mra hăn pah kan tâm Sài Gòn, Bình Dương, ngai lơn lah hăn kan dak ba dih kơt Đài Loan, Hàn Quốc, Nhật Bản...rnôk nê mơ dơi n’hao lơn tâm nau hun hao văng sa rnăk vâl”.                                                             

Xã Đạ Sar, nkuâl Lạc Dương (Lâm Đồng) dôl lah nkual đăp mpăn, yơn nău njrăng n'gang nuh srê Covid-19 way dơi Đảng bộ, n'gâng kan n'hanh nuĭh ƀon lan ta aơ way dơi uănh khlay. Tĭng Liêng Jrang Ha Rô Ky, Kruanh UBND xã Đạ Sar, rlău ma n'hao gĭt êng njrăng n'gang nuh srê, nuĭh ƀon lan hôm nsrôih pah kan jan sa, n'hao nău geh wăng sa an rnăk wâl đŏng. Nơm geh kơt nê̆, bol nuh srê Covid-19 tât krit nji yơn hun hao wăng sa- rêh jêng kon nuĭh bah xã hôm geh dŭt âk đŏng. Đah nău nsum ti, tâm rnglăp bah nuĭh ƀon lan, nău an tĭng ƀư rnoh tât kan ndrop hun hao wăng sa n'hanh njrăng n'gang nuh srê tâm nô nău kơt ơm mhe nklăp mbra dơi tât âk lơn tâm let năp tay. Wa Liêng Jrang Ha Rô Ky, an gĭt:

Năm tuch tăm 2020-2021, nuh srê covid-19 hŏ khuch tât lam dak lah nsum n'hanh xã Đạ Sar lah êng, bol ma kơt nê̆, ƀon lan ăp rnoi mpôl đê̆ ta ntŭk hôm đăp mpăn pah kan jan sa tay n'hanh hun hao tơm cà phê. Năm 2021 dja, rnoh âk geh cà phê hŭch, rgâl tay rnoh khlay cà phê hao rlău âk tơ̆ rđĭl đah ntơm nơh jêng nău rêh bah nuĭh ƀon lan đăp mpăn tay, wăng sa- rêh jêng kon nuĭh bah xã Đạ Sar hun hao tay, ƀon lan rhơn n'hanh nđơr. Xã dôl ntrôl dăng tĭng ƀư Nghị quyết 128 bah Chính phủ tâm nô nău  kơt ơm mhe. Ndrel đah ăp trong nkra rnoh tât kan ndrop nkre hun hao wăng sa, nkre njrăng n'gang nuh srê Covid-19 geh nău tam./.

          Năm mhe aơ, rnăk yuh H’Hẹ Niê, tâm ƀon Pan B, xã Ea Yông, Krông Pắk, Dak Lak rhơn ngăn rnôk geh gŭ tâm ngih mhe. Ngih bu kơl an hvi rlau 43m2, yor Đoàn n’gor Dak Lak tâm rgop nsum gay ma kơl ndâk, đah rnoh hvi rlau 80 rkeh prăk, tâm nê rnăk vâl khân păng manh bu dê 20 rkeh. Đoàn druh ndăm xã Ea Yông kơl an ƀư nglan ngih 20m2 bah năp ngih. Yuh H’Hẹ Niê mbơh, rnăk vâl păng lah rnăk ach o, mô geh neh tuch tăm, nau văng sa nsing tâm prăk hăn kan ân ma bu bah 2 hê ur sai ri kŏ tŏng knŭng nau ngêt sa ăp nar ndrel rong 2 kon hăn nti.

Nau ŭch geh ngih nâp tă bah âk năm ma aơ jêng nau geh ngăn. Aơ lah nau nsôih têh âk lĕ ma rnăk vâl tâm năm mhe gay ma lŏ nsôih pah kan jan sa, hun hao tâm nau rêh:

          ‘Rhơn ngăn yor năm aơ geh vơt năm mhe tâm ngih mhe. Ŭch lah tâm năm mhe srê mra dơi geh nkân njrăng, n’hâm soan ăp nŭih mra geh mât đăp mpăn, ăp nŭih tâm rnăk vâl kŏ geh ueh lăng, đăp mpăn pah kan. Săk gâp nơm kŏ dăng ngăch, geh kan pah gay ma geh prăk trok ân lĕ rnon jêh ri đăp mpăn pah kan jan sa, hun hao”./.

Nuĭh rblang: Điểu Thân n'hanh H'Thi