VOV4.M’nông:  Pơh aơ, tâm lơ 23/5, cử tri tâm lam dak mra hăn săch nŭih pah kan ntơh măt Quốc hội ndrel ntơh măt HĐND ăp gưl năm kan 2021-2026. Tâm nkuăl Tây Nguyên, pơh rlau aơ, ăp nŭih mra ntơm mâp ma cử tri ndrel bonh đă ân nau săch tĭng di nau ntrŭnh. Kŏ tâm pơh rlau aơ, Rmôt kan mêt uănh nau săch kan Uỷ ban Rnâng kan Quốc hội, Hội đồng săch kan neh dak yoor Groi Kruanh dak Võ Thị Ánh Xuân ƀư tơm hŏ tât uănh ngăn nau nchrăp săch kan tâm nkuăl.

            Pơh rlau aơ, ăp nŭih ŭch geh ăch lăp kan Quốc hội ndrel HĐND ăp n’gor tâm nkuăl Tây Nguyên ntơm ƀư hăn tâm mâp cử tri ndrel bonh đă nau săch ân nơm. Kan ƀư gay ma 10 nŭih kan ntơh măt Quốc hội gưl XV ndrel 85 nŭih ntơh măt HĐND n’gor năm kan 2021-2026 ƀư nau dơi săch kan bah nơm geh ủy ban MTTQ Việt Nam n’gor Kon Tum ƀư ân ueh, tâm di nau ntrŭnh. Ăp nŭih cử tri jêh geh ôp kŏ mbơh lah, ăp nŭih geh ân săch ntoh măt Quốc hội ndrel ntơh măt HĐND n’gor kŏ geh nau kan bah nơm geh cử tri rnơm săch ƀư ntơh măt Quốc hội ndrel HĐND n’gor.

            Cử tri kŏ rnê prêh du đê̆ nŭih tă bah nau blau kan, nau mĭn, nau ƀư bah ntŭk nơm pah kan hŏ geh ndâk dơi Bôk nau kan uănh, tâm di nau ngăn ndrel geh nau dơi prêh. Jêh geh djăt 5 nŭih ntơh măt Quốc hội gưl XV ndrel 7 nŭih ntơh măt HĐND n’gor mbơh mpeh nau kan, cử tri Huỳnh Ngọc Phong, ngih tâm Thôn 1, xã Tân Lập, nkuăl Kon Rẫy, mbơh:

             ‘Gâp rhơn ngăn, ân âk nau rnơm tâm ăp nŭih ân geh săch bah rơh aơ. Ăp nŭih nê hŏ nkah âk nau ê dơi, nau jêr bah n’gorr Kon Tum lah nsum, nkuăl Kon Râỹ phung hên lah êng. Kơt lah Kruanh n’gâng kan Văn hoá Nguyễn Văn Hùng tă bah ngai tât ta aơ kŏ joi kloh mhe nau geh, nau jêr, nau nơih bah n’gor Kon Tum lah nsum ndrel nkuăl Kon Rẫy lah êng. Gâp s aơ kơt nê lah geh du nau bu njrăng uănh. Dăch tât lơ 23/5 cử tri phung hên mra ndjôt n’ha phiếu săch ma geh nau dơi ân kan ngăn ri ƀư tâm di nau ton, bôk nau kan ma ăp nŭih nê hŏ ton lah lor”.

          Groi Kruanh dak Võ Thị Ánh Xuân pah kan đah n'gor Dak Nông

  Hôm tâm nkuăl ƀon têh Buôn Ma Thuột, n’gor Dak Lak ƀư nau tâm nchră bah cử tri mom đah nau săch kan ntơh măt Quốc hội gưl XV ndrel ntơh măt HĐND ăp gưl năm kan 2021-2026 ân ăp đoàn viên druh ndăm ndrel sinh viên ăp ngih săm ƀŭt cao đẳng, đại học. Tâm rơh tâm nchră, cử tri mom geh joi uănh mpeh Luật săch kan ntơh măt Quốc hội ndrel ntơh măt HĐND, Hiến pháp ndrel ăp ntuil nau ntrŭnh bah ăp gưl mpeh nau săch kan, năl, rdâng đah nau tâm rkeh bah phung rlăng rdâng nau săch kan, geh mbơh mpeh nau nklăch phêú săch, nau rklaih tâm rnôk ji kuet tâm nar săch kan. Đoàn viên Phan Văn Khải, ta Phường Thành Công, nkuăl ƀon têh Buôn Ma Thuột, mbơh:

             ‘Lah du hê cử tri rơh bôk năp geh săch kan ri bah nau tâm nchră bah cử tri gâp hŏ gĭt kloh lơn nau dơi hăn săch kan bah nơm ndrel geh rklaih mbơh ăp nau kol. Bah nê, ri gâp mra đăp mpăm mông nar tâm di nau ntrŭnh mpeh nau săch kan. Gâp ŭch ăp ntơh măt Quốc hội ndrel HĐNĐ năm kan tât mra ƀư ueh nau dơi ndrel geh ăp nau kan ueh ngăn gay rgop nau hun hao văng sa, rêh jêng”.

            Hôm du pơh dơm lah tât nar săch, pơh rlau ăp, rmôt kan mêt uănh nau săch kan bah Uỷ ban rnâng kan Quốc hội, Hội đồng săch kan neh dak yor Groi kraunh dak Võ Thị Ánh Xuân ƀư kruanh hŏ tât mêt uănh ngăn nau nchrăp nau săch kan tâm du đê̆ ntŭk tâm nkuăl ƀon têh Gia Nghĩa, n’gor Dak Nông. Tĭng uỷ ban săch kan nkuăl ƀon têh Gia Nghĩa, tâm ăp ntŭk bonh đă nau săch, âk nŭih cử tri năl lah ăp nŭih geh nau blau, nau leo lor, kơt tĭng ueh ăp nau ntrŭnh bah pháp luật, tŏng nau dơi gay ntơh măt Quốc hội ndrel ntơh măt HĐND ăp gưl năm kan 2021-2026. Rnôk aơ, nkuăl ƀon têh Gia Nghĩa ndâk 59 ntŭk nklăch phiếu, đah 8.560 cử tri mra râng săch kan. N’gor hŏ geh nau nchrăp ngăn gay đăp mpăn rnă njrăng tâm ƀon lan, njrăng rdâng srê bah, tâm ndrel ba kơi rnôk săch.

           Nau tâm nchră bah mom ndăm

  Bah nau mêt uănh, Groi kruanh dak Võ Thị Ánh Xuân rnê prêh ngăn ăp nau nsôih bah nkuăl ƀon têh Gia Nghĩa tâm nau ntrŭnh nau kan năn, tâm di nau ntrŭnh bah nau nchrăp săch kan. Nkre ŭch ăp nkuăl ân geh ƀư ueh nau kan njrăng, rdâng srê Covid-19 đăp mpăn ân cử tri ndrel ƀon lan, gay nar săch kan ngăn lah nar rgum rƀŭn bah ƀon lan:

             ‘Geh 2 nau kan, tal bôk năp lah ăp nŭih ŭch geh săch lăp ân geh nkoch mbơh, bonh đă, đăp mpăn nau dơi bah nơm. Rơh aơ jêr đê̆ lah păng geh tâm rnôk dôl ma geh srê Covid-19 yor ri ma phung hên ân nsôih ƀư nau dơi bah ăp nŭih ân geh săch lăp kan ân geh đăp mpăn bah âk ntrong, mô geh ƀư hăn tât nkre ri ân geh mbơh nkoch tâm ntŭk ntoh rup ntoh ngơi…mhâm ƀư gay ăp nŭih ân geh ƀư ueh ngăn nau kan bonh đă bah nơm. Tal 2 lah cử tri ân geh tŏng ăp nau gĭt mpeh nŭih nơm săch ndrle nkoch mbơh mpeh rơh săch kan rnôk aơ. Cử tri gay ân ƀư ân ueh nau dơi bah cử tri, tă bah nê ŭch êng nau hăn săch, săch ân tâm di, tŏng ndrel tĭng nau ntrŭnh./.

                                    Nŭih rblang: H’Thi