VOV4.M'nông: Kêng măng ntri 06/12/2021, Thủ tướng Chính phủ Phạm Minh Chính n'hanh Thủ tướng Hà Lan Mark Rutte hŏ geh rơh kuăl điện tâm nchră, tâm ôp mpeh ăp trong ntrŭt ntrôl lơn đŏng tâm boh lam lĕ rngôch Việt Nam - Hà Lan tâm let năp tay. Thủ tướng Chính phủ Phạm Minh Chính rnê âk n'hanh lah uĕh nău ntop kơl bah Chính phủ Hà Lan n'hanh mpôl doanh nghiệp Hà Lan hŏ kơl ndơ dŏng kan dak si rnoh khlay 40 rmen prăk kơl Việt Nam rlău dơi jêr jŏt tât bah nuh srê Covid-19 tâl 4; lah rjăp Việt Nam way uănh khlay hun hao tâm boh tâm rnglăp n'hanh tâm boh lam lĕ rngôch đah Hà Lan. Thủ tướng ŭch rŏng Hà Lan kơl Việt Nam buăt nthoi ăp ndrâm dak lêng n'hanh nkual công nghiệp đah châu Âu, kơl n'hao rnoh âk ndơ tăch n'gluh bah Việt Nam tâm ăp ntŭk dja; ntrŭt ntrôl nău kan tăch rgâl n'hanh ntuh kơl bar dak hun hao ngăch, nâp dăng n'hanh jŏ jong lơn đŏng. Bar Thủ tướng hŏ tâm ban ŭch mât nău way trong kan way tâm rgâl mbro tâm ban kơt ăp trong tâm boh tâm trong kan ndrâm dak lêng, ntĭm nti, pâl nđaih..../.

Nuĭh rblang: Điểu Thân