VOV4.M’nông – Ôi 28/12, Thủ tướng Chính phủ Phạm Minh Chính râng n’hanh ntoh ngơi ta Bôk nău kan “75 rbăn nău mĭn ƀư mhe, rlet rlău jêr jŏt, hun hao” yor Tổng Liên đoàn Lao động Việt Nam ƀư. Bôk nău kan “75 rbăn nău mĭn ƀư mhe, rlet rlău jêr jŏt, hun hao” dơi rgŏ jă jêh lôch uĕh bah Đại hội lam dak rơh tal 13 bah Đảng, tâm rnôk lam dak ndrel soan njrăng n’gang srê Covid-19. Jêh bơi 80 nar tâm rlong hô, lĕ geh 250.177 nău mĭn ƀư mhe râng, rlău 300% nkôp đah nău rƀŏng n’gluh an. Nkô̆ nău mĭn ƀư mhe râng bôk nău kan dŭt âk ntil, ntoh ta âk ntil, nău kan đah tât râng. Ntoh ngơi ta Bôk nău kan Thủ tướng Chính phủ Phạm Minh Chính rnê n’hanh mbah rhơn ăp nsum mpôl n’hanh êng nuĭh geh nău mĭn ƀư mhe n’hanh dơi geh uĕh ngăn, ntoh lư dơi rnê rhơn nar aơ. Thủ tướng lah rjăp, Đảng n’hanh Ngih dak he rnê rhơn, uănh khlay nău ƀư mhe, nău blău ơm bah ăp rơh kơn nuĭh ƀon lan, ngăn lah nău ƀư mhe, nău blău ơm bah ăp nuĭh pah kan. Thủ tướng mpŏng ŭch bôk nău kan “du rkeh nău mĭn ƀư mhe-nsrôih rlet rlău jêr jŏt, mĭn mhe, nsrôih dăng srê Covid-19” mbra nthoi tay nău dơi aơ, mât dăng, săk rnglăy, ngăn ngên, rgop âk lơn tay an tĭng ngih pah kan, ntŭk kan, êng nuĭh.

Nuĭh rblang: Y Sưng Phê Ja