VOV4.M'nông: Ôi 29/12, ta Hà Nội, Thủ tướng Chính phủ Phạm Minh Chính râng Tâm nchră pơk sŏng dăng lam dak n'glôch jêh pah kan năm 2021, an ƀư trong nchrăp kan năm 2022 bah n'gâng kan tuch tăm mât rong n'hanh hun hao ƀon lan, tă bah Bộ Nông nghiệp n'hanh Phát triển nông thôn (NN&PTNT) ƀư. Năm 2021, n'gâng kan tuch tăm mât rong n'hanh hun hao ƀon lan an tĭng ƀư tay nău kan tâm rnôk tâm rdâng đah âk jêr jŏt, ntul rlong; yơn lah mô hŏ geh njuat hun hao đăt ndal, tât "rnoh kan ndrop; nkre njrăng, n'gang nuh srê geh nău tam, nkre ntrôl dăng pah kan ƀư njêng, rhŏ dŏng ăp tŏng an nău ŭch geh dŏng rvăt tâm dak n'hanh tăch n'gluh. Năm 2021, rnoh khlay kơi ntop hao lam n'gâng kan (VA) hao 2,85-2,9%, nsĭt geh tăch n'gluh lam n'gâng kan geh tât 48,6 rmen đôlar. Âk rnoh tât hun hao bah n'gâng kan geh tât n'hanh rlău trong nchrăp ndơ̆ luh. Năm 2022, lam n'gâng kan rgum tĭng ƀư dăp rgum tay tĭng trong rƀŏng n'hao rnoh khlay n'hanh hun hao nâp dăng. N'glôch jêh rơh hop, Thủ tướng Chính phủ Phạm Minh Chính dăn đă lam n'gâng kan ân mbơh gĭt jru nău dơn kan bên di đăp mpăn, ngăch ngăr, mât kân geh nău tam nuh srê Covid-19, mât njrăng lĕ n'hâm suan, săk khĭt rêh bah ƀon lan ndrel droh rklaih tay jêr jŏt an nău kan ƀư njêng, tăch rgâl, ntop kơl geh nău tam nuĭh ƀon lan n'hanh doanh nghiệp. Ndăn ntêr lĕ  ăp trong dơh soih gay ntrŭt ntrôl dâk hao tay wăng sa rêh jêng kon nuĭh, hun hao n'gâng kan tuch tăm tâm nô nău kơt ơm mhe./.

Nuĭh rblang: Điểu Thân