VOV4.M’nông: Tâm pơh rlau aơ, Thủ tướng Chính phủ hŏ ƀư tơm nar pah kan đah Rnâng kan Chính phủ đah rmôt rđau kan Ban dân vận Trung ương, Uỷ ban Trung ương MTTQ Việt Nam ndrel ăp rmôt kan chính trị rêh jêng mpeh nau njrăng, rdâng srê Covid-19, mât chăm ân nau rêh ƀon lan ndrel đăp mpăn nau rêh jêng. Thủ tướng Chính phủ Phạm Minh Chính lah rjăp Chính phủ mra tâm rgop nsum ma Ban dân vận Trung ương, MTTQ ăp gưl, ăp rmôt kan chính trị-rêh jêng tâm nau njrăng, rdâng srê Covid-19, nkre ƀư rjăp nau kan têh bah nau bonh đă tâm tâm nau nkoch trêng, kuăl jă n’hao nau mât n’hâm soan bah ƀon lan, yor nau hun hao bah neh dak.

            Tâm nar pah kan, Ban dân vận Trung ương đă MTTQ, ăp ntŭk kan chính trị-rêh jêng lŏ bonh đă ƀon lan ƀư rjăp nau tâm nkhah srang tĭng nau ntrŭnh mrô 16 tâm ăp nkuăl, đă Chính phủ ƀư ueh lơn tay nau kan kơl an tâm nau rêh, kơl an ăp nŭih dôl mâp nau jêr yor tâm nkhah srang, ngăn lah nŭih roh kan pah, Chính phủ rđau Bộ Lao động-Thương binh ndrel xã hội mĭn, ntop tay nŭih geh kơl an bah rnoh kơl bah Chính phủ, ân uănh, kơl an lơn tay ân nai dak si bôk năp, njrăng srê, ndal chuh vắc xin ân nŭih geh kơl an, khlay.

            Ntoh nau ta nar pah kan, Thủ tướng Phạm Minh Chính lah kloh, tâm rnôk srê nuh tât jêr kơt rnôk aơ, nơm ân geh nau ƀư kan mhe, lŏ ƀư jêh gay ma ueh lơn, kơl an ƀon lan. Chính phủ ntrŭnh nau nsôih ndâk du Chính phủ rgâl mhe, nâp ueh, pah kan, săk tam, kơl an ƀon lan. Lŏ ƀư tĭng nau tă dơi geh, kơt tĭng lơn tay nau tâm boh nsum đah rđau kan Đảng, Ngih dak mât, ƀon lan ƀư tơm bah MTTQ, mrôt kan chính trị rêh jêng, râng nau rgop, nkoch mbơh. Thủ tướng lah rjăp, nŭih ƀon lan nkre lah tơm, nkre lah nŭih kơl njrăng rdâng srê.

            Thủ tướng lah rjăp, nau kan bonh đă tâm ntŭk kan hành chính ngih dak ân geh tâm mât dăch tâm nau rđau kan bah Đảng, Ngih dak, rgop nau njêng ueh, rjăp ngăn mpeh nau bonh đă. MTTQ ntơm bah Trung ương tât tâm dâng hŏ tâm rnglăp, tâm kơl ân ƀon lan geh nau rêh jêr jŏt. Thủ tướng lah rjăp, nau dơi tă bah ăp nau tâm lơh bah năp nơh ân saơ, nau rgum n’hâm, rgum nau tâm rnglăp lam ƀon lan geh nau khlay ngăn. Ân geh kuăl jă ƀon lan lăp ƀư nau kan gay mât khân păng nơm. Thủ tướng lah rjăp:

            ‘Wa Hồ hŏ tă lah hôm “bonh đă ƀon lan ân blau ri nau kan kŏ geh nau dơi”, Wa kŏ ntĭnh mro lah “rmôt bah ƀon lan lah têh ngăn, nau bonh đă ƀon lan dŭt khlay, mô dơi dŏng báo chương ndrôm săm ƀŭt, nau mbơh kuăl jă, nkoch trêng nau, nau rđau đă ma tŏng ôh”, Wa lah “Bah năp măt lah ân geh joi ăp nau kan mbơh ân ƀon lan gĭt nê lah nau ueh ân khân păng, lah nau kan bah khân păng, khân păng ân geh ƀư ân dơi”, nơm mô dơi nkoch, kuăl jă ôh, ma nơm ân geh nau bonh đă kuăl jă, ntĭm mbơh ân ƀon lan, nơm ân geh mbơh ân ƀon lan n’hao nau nkah njrăng, yor n’hâm soan bah khân păng, n’hâm soan bah nsum mpôl yor hun hao neh dak”.

            Nchrăp nau kan bah srê tâm rơh tât hôm mâp âk nau jêr, ngăn lah tâm nkuăl ƀon têh Hồ Chí Minh ndrel ăp n’gor, nkuăl ƀon têh mpeh ba dâng. Ndri ma ân geh ƀư ân rjăp ăp nau ntrŭnh bah Đảng, Ngih dak mpeh nau njrăng, rdâng srê. MTTQ ndrel ăp rmôt kan chính trị rêh jêng ân geh n’hao nau bonh đă, uănh, kơl an đah ăp nau êng êng. Ân geh rnă njrăng, đăp mpăn lam nau rêh, ƀư ueh nau ntrŭnh njrăng rdâng srê. Thủ tướng lah rjăp mpeh nau ƀư nau kan bah bonh đă tâm ăp nau tât jêr ngăn lah tâm nau tât bah srê Covid-19 aơ:

            ‘Gâp đă Ban dân vận ăp đồng chí ân geh ƀư ueh nau kan rnôk geh tât jêr. Ban dân vận ƀư tơm, tâm grop nsum ma MTTQ Việt Nam, ăp rmôt kan chính trị rêh jêng, ntŭk pah kan, ăp ntŭk geh tât nau kan bonh đă ƀon lan, rmôt kan, ƀon lan ân ƀư ân ueh nau rđau kan, rđau bah ăp gưl uỷ, n’gâng kan, ƀư ueh nau kan chính trị, râng tâm rmôt kan leo trong lor, ntrong kan bah Đảng, nau ntrŭnh bah pháp luật Ngih dak đah nau kan ngăn, ƀư ueh nau dơi ƀư tơm bah ƀon lan, kơt tĭng ăp nau snôih ndrle n’hâm dăng tâm rnglăp rnoi mpôl, njêng nau tâm ban tâm nau rêh ƀư nâp nau tâm rnơm bah ƀon lan ma Đảng, Ngih dak”.

            Đah rmôt tahen ơm, nuih n’hâm hôm lah rmôt tahen tâm lơh, nau kan ndrel ê nkra. Đoàn druh ndăm Cộng sản Hồ Chí Minh ƀư ueh ăp nau kan leo lor, ân geh ƀư tay ân nâp ndrel tâm mât tâm dăch ma tâm dâng, mât ngăn nau geh tâm ƀon lan. Rmôt kan bu ur Việt Nam, rmôt nŭih kan lŏ mir…ân geh ntơm leo dŏng ăp rmôt kan tât râng kơl an nau kan njrăng rdâng srê. Công đoàn kŏ ân geh bonh đă đoàn viên râng nau rgop, kơl an nau kan njrăng, rdâng srê. MTTQ ndrel ăp rmôt kan chính trị rêh jêng kŏ ân geh tâm dăch ma tâm dâng.

            Thủ tướng kŏ nkah, tâm nau ndơn nŭih ji ân lah rjăp nuih n’hâm “lăp ngih dak si lor, ƀư săm ƀŭt ba kơi”. Êng săm ân ăp nŭih F0 tâm ngih dak di ndrel nkhah êng tâm Ngih ri n’gâng kan dak si dôl mĭn tay nau săm ân ăp nŭih ntưp ji mô di lah tâm ngih dak si tâm ngih ma geh tâm ăp ntŭk lah geh ntŭk ueh kloh aih đah nuih n’hâm tâm nkhah ma nŭih. Ƀư tĭng nau kan đông tây y tâm rgop nsum. Bộ Lao động-Thương binh ndrel Xã hội ân mĭn, kơt tĭng nau ntrŭnh bah Đảng, nau ntrŭnh pháp luật bah Ngih dak mpeh nau kan đah nŭih râng kơl an bôk năp njrăng srê, ngăn lan rnê tât nuih n’hâm ndrel drăp ndơ, nau ƀư gay ma rnê yơk kơl./.

                                    Nŭih rblang: H’Thi