VOV4.M’nông – Kêng măng 16/12, ta Ngih Chính phủ, Thủ tướng Phạm Minh Chính-Kruanh Ban ntĭm rđău Ngih dak njrăng, n’gang chôt srê Covid-19 ƀĭt joet rơh rƀŭn trực tuyến đah 63 n’gor, nkual ƀon têh gay uănh lah nu nău n’hanh n’gluh an trong mkra na nê̆ gay n’hŭch rnoh nuĭh mbăn, khĭt, ntrôl ngăch chuh, n’hao trong dak si nchrăp njrăng n’hanh dak si bah dâng. Aơ lah rơh rƀŭn dơi ƀư tâm rnôk ntil kaman Omicron ntoh ma WHO mbơh ntưp ngăch, mô hŏ dơi uănh lah lĕ, yor nê kuăl jă lam ntŭr neh njrăng tay, mô dơi thơ tha. Thủ tướng Phạm Minh Chính lah rjăp, aƀaơ, nu nău tâm dak geh jêr jŏt; ta du đêt n’gor, rnoh nuĭh khĭt mô hŏ dơi uănh nđôi; yor nê, ăp ntŭk, ntŭk kan an tâm nchră, uănh lah tay ta lam dak gay n’gluh an ăp trong mkra na nê̆, ngăn ngêt gay nsrôih nking n’gang ăp nuĭh ntưp tâm ntŭk gŭ rêh, lơn lah ăp nuĭh mbăn, uănh nđôi ăp nuĭh khĭt. Tĭng Thủ tướng Phạm Minh Chính, an rgum nchră trong mkra ngăch chuh, ntrôl dăng chuh vaccine an kon se bah 12 tât 18 năm deh gay an ăp oh plơ̆ hăn nti nâm ơm. Ăp n’gor nkual ƀon têh ƀư tĭng ăp trong njrăng n’gang srê tâm di, đăp mpăn nkra njêng, tăch rgâl.

Nŭih blang: Y Sưng Phê Ja