VOV4.M’nông:   Nkah rnon bah Ngân hàng Agribank Dak Lak aƀaơ lĕ rlet rlău 16 rbăn rmen prăk, tâm nĕ rlău 70% rgum tâm nău kan nuĭh ƀon lan pah kan lŏ mir, tuch tăm mât rong-thôn ƀon. Ăp năm bah năp tơm prăk an manh aơ lĕ ntop kơl dŭt n’hâm an ăp hợp tác xã, doanh nghiệp, rnăk ƀon lan pah kan lŏ mir hun hao nkra njêng, n’hao nău geh, rgâl uĕh nău rêh.

Wa Nguyễn Văn Diên-du rnăk pah kan lŏ mir tâm rnăk sâm geh ta thôn Nam Hòa, xă Dray Bhăng, nkuăl Cư Kuin (Dak Lak) nkoch: Rnăk wa bah Nghệ An lăp ta aơ bah năm 1994. Neh ntuh têh, geh nău blău mât rong, yơn mô geh prăk gay rwăt ndrôk ntil. Kâp tât năm 1998 wa mư dơi ngân hàng an manh prăk sĭt rwăt ndrôk mât. Na nao tâm rlău 20 năm, ndrung bah rnăk wâl geh mro 40 tât 50 ndrôk poăch, ndrôk me deh kon. Bơi 25 năm bah năp, ur sai wa Diên lah năch ƀa ƀơ n’hanh nsing nơm bah ngân hàng. Wa Diên nkoch: knơm geh tơm prăk bah ngân hàng ma rnăk wâl geh nău rêh nar lơ sâm geh.

        “Tă bah prăk manh bâh ngân hàng Agribank, ntop đah prăk bah rnăk wâl njuăl nklăp bah 2 tât 2,5 rmen prăk. Rnăk wâl mât rong, siăm lăi mpôl ndrôk poăch n’hanh deh kon. Du năm nkŭp lĕ prăk nuĭh luh, ndơ sa an ndrôk, rnăk wâl geh prăk kon rlău 300 rkeh. Gâp saơ hun hao mât rong rnăk wâl, ri nău rêh đăp mpăn ngăn”.

Ngih pah kan Agribank Dak Lak

Wa Nguyễn Văn Tĩnh, Kruanh Chi nhánh Agribank nkuăl Cư Kuin an gĭt: Tâm rnoh 835 rmen prăk nkah rnon aƀaơ bah chi nhánh, geh tât 97% bah 4.200 năch lah nuĭh pah kan lŏ mir. Khân pơng manh prăk gay ntuh kơl mât rong ndrôk, rpu, mât chăm tơm sầu riêng, cà phê, tiêu. Năch dơi dơi pă prăk manh dâl tâm nar, nău aơ di ngăch yan khay rwăt phân poh, dak si, jêng mô geh nău khân pơng an manh ndal, manh prăk kon âk bah manh prăk kon khlay.

Rnăk wâl wa Nguyễn Doãn Thi ta thôn 2, xă Băng Adrênh, nkuăl Krông Ana hun hao wăng sa knơm prăk manh bah Agribank Dak Lak. Yan sầu riêng aơ, rnăk wâl wa geh nklăp 25 tấn; aƀaơ lĕ pĕ geh n’gul, tăch đah rnoh 48 rkeh prăk 1 tấn. Bah meng nĕ, rnăk wâl wa hôm mât sŭr, du năm tăch nklăp 30 tấn.

“Rnăk wâl gâp lah nuĭh năch ƀa ƀơ bah Agribank, Bah năp đaơ manh đêt gay ntuh kơl, bah kơi aơ ri gâp hao mbrơi mbrơi tơm prăk geh êng n’hanh tơm prăk manh tay bah ngân hàng gay ntuh kơl nkra njêng, mât rong. Tơm prăk bah ngân hàng Agribank lĕ kơl an rnăk wâl gâp ntuh kơl gay hun hao wăng sa nơih lơn. Bah ntuh kơl kơt: phân poh, ndơ nkra njêng, măy mŏk, ndơh ndơ ăp ntil lah nsum tŏng ăp. Nuĭh ƀon lan nkual Băng Adrênh aơ ri nău manh prăk kon khlay đêt ngăn, knŭng khân pơng manh ngân hàng nông nghiệp”.

Nău ƀư rlău 10 năm aơ, Hợp tác xã Dịch vụ Nông nghiệp Thanh Bình, xă Dur Kmăl, nkuăl Krông Ana nar lơ đăp mpăn, nsĭt tay săk rnglăy uĕh ngăn ngên an xă viên, nuĭh ƀon lan pah kan lŏ mir tâm nkual. Lơn lah tâm rnôk dăch aơ ntil moh phe Thanh Bình-Krông Ana bah HTX ndơ̆ an ntŭk tăch tâm, n’hanh bah dih n’gor. Aơ lah săk rnglăy srih tăm ba phe kloh uĕh tĭng di VietGAP. Ndơ tŏng ăp đăp mpăn ngăn, mô geh rmeh dak si mpa rong tơm tăm, dơi nuĭh dŏng sing nơm săch. Wa Nguyễn Văn Sanh, Kruanh HTX Thanh Bình lah:

Ntuh kơl an manh nău kan lŏ mir, mât rong, thôn ƀon lĕ mât uĕh săk rnglăy.

“Bah năm 2009 lĕ gĭt ngân hàng. Ngân hàng Agribank lĕ ntop kơl, năm nĕ manh 400 rkeh prăk. Aƀaơ nkah rnoh ngân hàng bah HTX lĕ 3 rmen prăk. Dŭt rhơn rnôk ma ngân hàng ntop kơl ri HTX hun hao têh dăng. Lĕ rngôch ăp nău ƀư lah ŭch geh prăk, ma prăk ri tâm ăp nuĭh dŭt jêr jŏt ŭch đă tât ngân hàng. Nău ntuh kơl phân poh, dak si tơm tăm dŭt ŭch prăk, ŭch tât ngân hàng manh prăk gay pah kan”.

Ngoăy tâm âk nău đă n’gluh an ta Nghị quyết 19 bah Rƀŭn nchră rơh tal 5 Ban Chấp hành Trung ương Đảng khóa 13 mpeh lŏ mir, nuĭh ƀon lan pah kan lŏ mir, thôn ƀon tât năm 2030, uănh tât năm 2045 nĕ lah lôch jêh trong ƀư, nău kơl mpeh lŏ mir, nuĭh ƀon lan pah kan lŏ mir, thôn ƀon. Tâm nĕ, geh lah rjăp tât an tay tơm prăk manh kơl an, ntrŭt nsôr ăp rmôt ƀư an manh đah lŏ mir, mât rong, nuĭh ƀon lan pah kan lŏ mir, thôn ƀon; ntop kơl an manh an hợp tác xã, doanh nghiệp, rnăk thôn ƀon hun hao nkra njêng tăch rgâl. Wa Vương Hồng Lĩnh, Kruanh Ngân hàng Agribank ta Dak Lak an gĭt:

“Mpeh nău kơl an manh hun hao lŏ mir thôn ƀon, Agribank ta n’gor Dak Lak lĕ ntuh kơl an manh ta ntŭk đah rnoh nkah rnon rlău 70% dĭng lĕ nkah rnon. Aƀaơ dĭng lĕ nkah rnon bah bôk nău kan hun hao lŏ mir ƀon lan ta Agribank n’gor Dak Lak lĕ hao tât rlău 11 rbăn rmen prăk. Ta aơ saơ đŏng nău ƀư tơm bah Agribank ta n’gor Dak Lak rmôt kan an manh ngân hàng thương mại ngih dak lĕ ƀư tĭng nghị quyết 19 rƀŭn nchră rơh tal 5 bah Ban chấp hành Trung ương khóa 13 bah Đảng ngăn ngên, hăn lăp tâm nău rêh mpeh hun hao wăng sa lŏ mir thôn ƀon, nuĭh ƀon lan pah kan lŏ mir. Gay kơl an ăp doanh nghiệp, hợp tác xã n’hanh ăp nuĭh êng, rmôt kan an hun hao nău kan lŏ mir ta n’gor Dak Lak”.

                    Nuĭh rblang: Y Sưng Phê Ja