VOV4.M’nông: Dak he đah geh ndơ lŏ mir âk, âk ndơ kah tĭng nkual dôl lah du nău dơh. Yơn gay tăch ntil ndơ aơ đăp mpăn, nâp nâl ri đă n’gluh an nuĭh pah kan lŏ mir, hợp tác xã, doanh nghiệp an dơi năp tŏng ăp nău blău tăch ndoh ndơ ta ntŭk ntô mrô, ntŭk ntô tăch rgâl điện tử...

Nkra njêng, tăch n’gluh ndơ lŏ mir ăp năm dăch aơ na nao geh âk nắu têh mhe, Tĭng nĕ, năm bah năp, nău dak sŭt Việt Nam tăch n’gluh na nao an EU, Mỹ; play rba Sơn La tăch n’gluh an ăp ntŭk rwăt jêr kơt Anh, Úc; sầu riêng Dak Lak tăch n’gluh an têh an ntŭk rwăt Trung Quốc, vải Lục Ngạn, Bắc Giang dơi uănh lah dŭt têh ta Nhật Bản, Pháp... an saơ ăp nău kơl ndâk njêng, hun hao ndơ moh êng, ntrŭt ngăch tăch n’hanh lơn lah nău pă an nău mbơh ntŭk tăch an kônh wa dôl mât tam.

Ndơ lŏ mir bah Việt Nam uĕh, âk ndil.

Yơn ăp săk rnglăy aơ mô hŏ tâm ban đah nău hun hao ntŭk tăch nâp nâl, yor n’hêl na nê̆ jêr jŏt rnôk gĭt ndơ lŏ mir, kah tĭng ăp nkual yor công nghệ nkret njêng hôm e đêt, ƀư jêr tăch, yor nar khay mât prăp đêt. Ndrel đah nĕ, nău gĭt ndơ̆ ndơ lŏ mir ta ntŭk tăch điện tử mô geh dơh, yor nău wât bah doanh nghiệp đah trong tăch aơ hôm e đêt. Wa Đinh Tuyết Nhung, Kruanh Liên hiệp Hợp tác xã nông dược n’hanh cộng đồng Bắc Kạn nkoch na nê̆:

“Ndoh ndơ geh nar khay prăp đêt, n’hanh ntŭk kan mô hŏ dơi geh rup ndah kơt tăch rgâl gay dơi geh du trong na nê̆ gĭt đah nuĭh năch jêng tăch rgâl đah rnoh ndơ tăch ta ntŭk tăch mô hŏ âk. Mpôl hên dŭt mpŏng bah n’gâng kan ƀon lan mbra geh âk trong na nê̆ gay ntop kơl ăp ntŭk kan aơ dơi ndơ̆ ăp ndơ tăch rgâl têh”.

Gay geh ntŭk tăch đăp mpăn an ăp ndơ lŏ mir, an ndâk njêng moh êng an ndơ, ndâk njêng rup ndah doanh nghiệp. Tâm ban ma nĕ uănh mĭn âk lơn tât công nghệ nkret njêng ndơ lŏ mir kơt geh ăp trong kơl wăch rgum doanh nghiệp nkre njêng gay n’hao khlay ndơ lŏ mir.

An dơi ndâk njêng moh êng an ndơ lŏ mir

Ntoh măt ntŭk tăch điện tử Postmart.vn-wa Nghiêm Tuấn Anh, Tổng Công ty Bưu điện Việt Nam an gĭt, tă bah trong ƀư logistics, ntŭk tăch điện tử bah Bưu điện Việt Nam, lĕ geh âk rkum ndơ sầu riêng tăch n’gluh an Mỹ, vải thiều an Nhật Bản, Châu Âu... Tâm rnôk hun hao bah tăch rgâl điện tử, nău năp blău, mbơh ngơi ta ntŭk ntô mrô an nuĭh ƀon lan lah dŭt n’hâm khlay:

“He geh dŭt âk ntil play dŭt kah, dŭt uĕh, dơi lăp ntŭk tăch tâm dak n’hanh dak bah dih. Aƀaơ nuĭh ƀon lan ta nkual yôk, ƀon lan, công nghệ thông tin mô hŏ dơi hun hao tâm ban ăp n’gor, nkual ƀon têh. Yor nê, nău năp gĭt blău an nuĭh ƀon lan, mpôl hên uănh aơ lah nău dŭt n’hâm gay lôch uĕh an tăch rgâl điện tử. Yor nê, mpôl hên knŭng rlu ta nău ntĭm nti nuĭh ƀon lan trong ndơ̆ ndơ ta ntŭk tăch điện tử, pơk dŏng ndơ bah khân pơng ma năp an khân pơng lĕ rngôch ăp nău gĭt blău ta ntŭk tăch mrô./.

VOV.VN/ Nuĭh rblang: Y Sưng Phê Ja