VOV4.M'nông: Pơh bah năp nơh, ta Hà Nội, Bộ Nông nghiệp n'hanh Phát triển nông thôn ƀư tâm nchră pơk sŏng dăng lam dak mbơh gĭt lam hvi Nghị quyết mbrô 19 bah Ban chấp hành Trung ương Đảng khóa 13 mpeh tuch tăm mât rong, ƀon lan kan lŏ mir, thôn ƀon tât năm 2030, uănh ngai tât năm 2045. Lah ta rnôk tâm nchră, Bộ trưởng Bộ Nông nghiệp n'hanh Phát triển nông thôn Lê Minh Hoan nkoch kloh: ƀon lan kan lŏ mir ân lah tơm mpôl tâm boh tuch tăm mât rong- ƀon lan kan lŏ mir- thôn ƀon

Tĭng ƀư Nghị quyết mpeh tuch tăm mât rong- ƀon lan kan lŏ mir- thôn ƀon n'hanh trong kan hun hao tuch tăm mât rong n'hanh thôn ƀon jŏ jong nâp dăng, tâm bah ri aơ nơh, Bộ Nông nghiệp n'hanh Phát triển nông thôn kan nsum đah Ban Tuyên giáo Trung ương, Ban Kinh tế Trung ương, ƀư kơt nti, mbơh gĭt lam hvi, đăm jru Nghị quyết. Ăp nău rgop ta rnôk tâm nchră hŏ ndrel tâm nkoch ăp nău tă ơm gĭt kan, ăp trong ntĭt leo mhe, nsĭt geh dơi tâm hun hao tuch tăm mât rong- ƀon lan kan lŏ mir- thôn ƀon gay rƀŏng tât rnoh rdâk njêng "Tuch tăm sĭt jêng nđĭr uĕh neh ntu bah dak rchoh neh, thôn ƀon uĕh mhe, ƀon lan kan lŏ mir jăp blău rsang rnglay”. Wa Nguyễn Hồng Sơn, Giám đốc Viện khoa học tuch tăm mât rong Việt Nam an lah:

        “Tuch tăm mât rong- ƀon lan kan lŏ mir- thôn ƀon geh tâm boh tâm krêp nsum. Hun hao tuch tăm mât rong lah nta trong dơh gay hun hao ƀon lan kan lŏ mir n'hanh thôn ƀon n'hanh rlơ̆ tay đŏng. Tâm Nghị quyết n'hanh trong kan têh jong hŏ nchŏng kloh, khoa học n'hanh công nghệ mô dơn geh nău kan njêng luh ndơ geh ƀư rnoh khlay âk, njêng suan đăt ndal ma hôm geh nău dơn kan khlay lơn đŏng nê lah ntĭm nti tơm nuĭh kan săk blău âk. Mpeh Viện mbra kan nsum đah ăp đơn vị geh tât n'hanh doanh nghiệp tĭng ƀư ndơ̆ rgâl kỹ thuật công nghệ tâm ban kơt ntĭm nti ƀon lan kan lŏ mir tĭng trong tâng jru lơn gay ntrŏng dŏng âk công nghệ mhe tâm tuch tăm, lôch nê n'hao rnoh khlay bah ndơ geh ƀư jêng đăt ndal tâm nău kan tuch tăm  mât rong".

          Mhe aơ, tâm trôm bôk nău kan “Lễ hội Sầu riêng Krông Păk lor bôk năp – 2022”, UBND nkuâl Krông Păk, n'gor Dak Lak hŏ ƀư "Tâm nchră ntrŭt ntrôl kuăl jă ntuh kơl ngăch n'hanh hun hao tuch tăm, mât rong jŏ jong năm 2022”. Lah ta rnôk tâm nchră, wa Trần Hồng Tiến, Bí thư Huyện uỷ Krông Păk an gĭt, nkuâl geh rlău 53.000 ha neh tuch tăm, 6.100 ha neh măt dak way dŏng, aơ lah nău geh dơh gay wăch rgum ntuh kơl tâm trong kan tuch tăm. Săk geh tâm trong kan tuch tăm bah nkuâl hôm dŭt âk. Jêng, nkuâl ŭch rŏng wăch rgum tay tơm ndơ ntuh kơl, rgop ntrŭt ntrôl hun hao wăng sa- rêh jêng kon nuĭh hun hao.

        “Mpôl hên mbra ntop kơl an ăp doanh nghiệp mpeh si ƀŭt kan gay ăp doanh nghiệp ƀư si ƀŭt an dŭt ngăch, dŭt uĕh. Tâl 2, mpôl hên rđău đă ăp ntŭk rnôk ăp nuĭh ntuh kơl lăp mpôl hên mbra ntop kơl lĕ n'hâm mpeh đă ntrơn du rnôk ăp nuĭh ntuh kơl ntrŏng ntuh kơl đah nkuâl mpôl hên. Đah kruanh rđău kan ta ntŭk mpôl hên hăn ndrel đah ăp nuĭh ntuh kơl rnôk joi gĭt ntuh kơl ta ntŭk”.

        Ntơm bah nău ngăn geh ta ntŭk, wa Cao Văn Cường, Giám đốc Sở Nông nghiệp n'hanh Phát triển nông thôn n'gor Thanh Hóa an gĭt:

        “Ăp Bộ, n'gâng kan Trung ương hŏ ngăch n'gluh an dŏng ăp si  ƀŭt, dăn đă Bộ ơm hao mbơh dăn Thủ tướng Chính phủ an dŏng bôk nău kan, rnôk geh bôk nău kan ri ăp n'gor, nkual ƀon têh ơm an ƀư nău kan lam dak, tâm di đah nău geh bah tĭng n'gor. Ơm an n'gluh dŏng Nghị định 57 mpeh ntrŭt nsôr doanh nghiệp ntuh kơl tâm tuch tăm ƀon lan kan lŏ mir thôn ƀon, nsing kalơ nê Sơn La mbra geh Nghị quyết tâm di đah nău geh, ntrŭt nsôr doanh nghiệp ntuh kơl tuch tăm, ƀon lan kan lŏ mir, thôn ƀon.

Lah ta rnôk tâm nchră pơk sŏng dăng lam dak mbơh gĭt jru hvi “Nghị quyết mbrô 19 bah Ban chấp hành Trung ương Đảng khóa 13 mpeh tuch tăm, ƀon lan kan lŏ mir, thôn ƀon tât năm 2030, Bộ trưởng Bộ Nông nghiệp n'hanh Phát triển nông thôn Lê Minh Hoan lah kloh. Tâm boh đah ƀon lan kan lŏ mir, thôn ƀon ân ntrŏng kloh nău dơn kan, ntŭk gŭ khlay kan mpôl tơm bah ƀon lan kan lŏ mir tâm nău n'glêh an geh nău dơi bah hun hao tuch tăm, thôn ƀon. Ăp đơn vị mpeh Bộ n'hanh Sở Nông nghiệp n'hanh Phát triển nông thôn ăp n'gor, mbơh an ƀư lam hvi, tĭng ƀư nău dơn kan, trong nkra bah trong hun hao tuch tăm mât rong jŏ jong ma ăp bôk nău kan na nê̆ gay tĭng ƀư Nghị quyết mpeh tuch tăm, ƀon lan kan lŏ mir, thôn ƀon:

“Bôk nău kan gay ƀư jêng ngăn ngăn ăp nău kan Chính phủ gay tĭng ƀư Nghị quyết. Nghị quyết mô lah trong kan têh jong mô lah ntŭk ŭch tât kan ma lah gŭ ta nău dâk kan ngăn. Gay ƀư dơi nău dja, ăp đơn vị bah Bộ n'hanh n'gor ân ƀư lĕ n'hâm suan tâm trong an ƀư, n'hanh rgâl mhe nău mĭn tâm trong tât”.

Tuch tăm mât rong tâm âk năm mbro dơi nkah tât kơt du n'gâng ndăl bah jâng wăng sa. Nău dơi tâm trong kan tuch tăm, ƀon lan kan lŏ mir, thôn ƀon hŏ rgop du gâl tâm nău dơi têh kuâng, geh nkô̆ khlay jŏ jong bah pah kan rgâl mhe hŏ geh nău dơi tâm bah ri aơ. Trong nchrăp rƀŏng tât nău kan tuch tăm Tuch tăm sĭt jêng tay uĕh neh ntu bah dak rchoh neh, thôn ƀon uĕh mhe, ƀon lan kan lŏ mir jăp blău rsang rnglay ma Đại hội XIII n'gluh, ân ntop n'hao âk tay trong nchrăp, trong kan, trong nkra dăng mhe gay ntrŭt ntrôl nău hun hao bah tuch tăm, ƀon lan kan lŏ mir, thôn ƀon./.

Nuĭh rblang: Điểu Thân