Ăp năm mhe aơ, âk ƀon lan kan lŏ mir ta n’gor Dak Lak nănh rgâl du đêt tơm tăm glêh nar jêng tăm prit, nsĭt tay tơm geh wăng sa mbơm oi. Nkhêp geh rnôk tết Ất Tỵ năm aơ, nchroh nuĭh tăm mbra nsĭt geh âk, rnôk lơn âk play hŏ dơi bu nchăm rvăt đah rnoh khlay.

Ăp nar aơ, ta mir hvi 3 ha ta thôn 10, xã Hoà Phú, nkual ƀon têh Buôn Ma Thuột, ur sai nô Hoàng Văn Hồng ndrel du đêt nuĭh kan rƀet di bép tŏ n’hanh sơn nâp tay n’gâng ndăl ăp ndrŏng prit lay. Nô an gĭt, rnăk ntơm rgâl neh tăm biăp n’hanh mbo lai jêng tăm prit ntơm bah bôk năm 2021. Tơm prit mô dơn nsĭt tay nău geh wăng sa uĕh ma nar mât chăm hŭch âk đŏng.

“Năm aơ bu dôl joi hăn tât mir uănh n’hanh nchăm rvăt lĕ prit hôm. Gâp nđăp êng tâm tôr nsĭt geh 3 ha prit nchroh nklăp geh 1 rmen prăk, ăp du ha nha  hôm nsĭt geh sa nklăp 200 rkeh  prăk. Tăm prit hôm mpêt nkrem lĕ ma nar jik pih rđĭl đah tăm mbo n’hanh biăp. Mô dơn nê, prit tăm du năm hŏ geh play  hôm, jêng geh roh dơm prăk kơt tăm tơm jong năm tiêu mô lah bơ jŏ lơn.”  

Nô Đậu Văn Tuấn, ta thôn 5, xã Hoà Phú, nkual ƀon têh Buôn Ma Thuột, ntơm tăm prit bah năm 2020. Đah 5 ha hŏ geh play đăp mpăn, nô nchrăp pơk hvi tay neh tăm rlău bar tơ̆ ký ton manh tay neh bah nuĭh ƀon lan tâm nkual. Nô Tuấn an gĭt:

“Ta nkual Hoà Phú dja, mpôl hên lơn âk dŏng prit tây Thái Lan, dơi nsĭt bah nkual Ba Vì, n’gor Hà Tây ơm. Gay prit hao rơ̆ jêng ngăch n’hanh săk geh play âk, mpôl hên way sơch ăp kon mbŭm uĕh, gay tăm. Tơm prit tây Thái Lan dŭt tâm di đah neh ntu, trôk nar bah n’gor Dak Lak, yor kơt nê̆ prit ta aơ hao jêng dŭt uĕh.”

Wa Nguyễn Văn Kha, nuĭh tơm danh nghiệp rgum rvăt prit ta Dak Lak tât bah n’gor Hưng Yên, an gĭt, ăp năm, păng rvăt hang rbăn tấn prit gay tăch tât ăp n’gor mpeh Bắc n’hanh dŏng an tăch n’gluh. Năm aơ, doanh nghiệp hŏ nchăm rvăt nklăp 700 ha prit gay tăch an rnôk tết Ất Tỵ 2025:

“Du năm gâp n’gluh tăch bar pe jât rbăn tấn prit tât ntŭk tăch Trung Quốc, mô hŏ kơp rnoh tăch tâm dak dŭt âk đŏng. Săk kah prit ta Dak Lak dŭt kah uĕh. Năm aơ, mpôl hên hŏ ký ton rvăt bar pe rhiăng ha prit, đah rnoh khlay ntơm bah 200 – 350 rbăn prăk/ndrŏng”

Lam n’gor Dak Lak aƀaơ geh rlău 2.400 ha prit, rnoh âk play geh bơi 66.000 tấn. Ăp ntil prit lơn âk lah prit Nam Mỹ n’hanh prit tây Mốc (ntil Thái Lan), rgum lơn âk ta ăp nkuâl Buôn Đôn, Ea Kar, Krông Pắk, M’Đrắk n’hanh nkual ƀon têh Buôn Ma Thuột. Ndrel đah ăp ntil ndơ tuch tăm êng ƀa ƀă, tơm prit dôl an saơ nău dơh geh rnôk tăm ta ăp nkual neh mpli choih n’hanh nkual tâm rlŭ đah neh bazan mpli đah neh bŏk mpêt ta Dak Lak, kơl âk ntil tơm tăm n’hanh n’hao nău geh wăng sa an ƀon lan kan lŏ mir./.