Nău aơ nsĭt tay săk rnglăy na nê̆ tâm nău kan tăm ba, tăm bum, nsĭt tay nău geh âk, nkre lah mpêt nkrem rnoh dak tŏ, phân poh, dak si sinh học, ngăn lah mô hoach nuĭh kan, mông nar n’hanh đăp mpăn săk soan an kon nuĭh.

 Ta n’gul khay 6, ta mir bum prŭm hvi 10 ha ta xã Buôn Tría, nkuăl Lăk, wa Phạm Đăng Xuân dôl rƀet bâh ngai ndơ mpăr mô geh nuĭh ƀĭt Drone bruh tŏ dak an mir bum dôl ntơm geh bum. Wa nkoch, ăp nar, ndơ aơ mbra geh tŏ bruh bâh 8-10 mông, tŏ an 25-30 ha tơm tăm. Nău dŏng dơh dơm, kanŭng puh dak an bêng dĭng, mpli đah phân, dak si sinh học, dŏng kât ndơ uănh ntŭk ta săk máy, an mpăr n’hanh bruh dak dơm.

 “Máy mpăr mô geh nuĭh ƀĭt hên dŏng bruh dŭt dơh, mô hoach roh nuĭh kan, mông nar, n’hanh dŭt ngăch. Tâm du ha hên bruh tâm 10 mnĭt lah lôch, ntơm nơh rĭ 2 hê bruh tâm du ha roh n’gul nar mơ lôch. Công nghệ mhe aƀaơ dŭt dơh ngăn. Mpôl hên way dŏng dak si sinh học gay ma dŏng máy mpăr way bruh an tơm bum prŭm dŭt ueh, dŭt jêng”.

Ntơm gĭt rvăt dŏng máy bruh mpăr ta nău pah kan tuch tăm mât ƀon lan kan lŏ mir ta nkuăl Lăk dŭt ndal. Wa Cao Xuân Phương- Giám đốc HTX tuch tăm Thành Tín, xã Đăk Nuê, nkuăl Lăk an gĭt, bar pe năm ba năp, lôch rnôk tât râng nău kan bruh dak si mât tơm tăm đah ntil máy aơ ta nkuăl Đức Trọng, n’gor Lâm Đồng, wa lĕ rvăt 2 mblâm bâh Cần Thơ sĭt dŏng. Bôk năp, HTX săch geh 2 hê nuĭh dŭt ngăch tâm nĕ geh wa Xuân đă tât ntŭk tăch gay ma nti nău dŏng máy. Bâh rnôk dŏng máy mpăr bruh tŏ mât chăm tơm tăm lĕ an saơ nău ueh nơih ngăn.

 “Bâh nău dŏng 2 năm dăch aơ, hên saơ mô ir hoach prăk, hŭch tât 20% đah dak si mât tơm tăm, phân poh, hôm nuĭh pah kan rĭ roh 40-50% an ƀon lan kan lŏ mir. Yor ndeh păr puh dak si lah công nghệ li tâm ueh mhe ngăn, ndơ̆ dak si mpli ta dak kơt lah tŭ lêm bruh mbĕ lam dak tơm tăm lăp tâm n’ha, yor nĕ mô geh hoach prăk rvăt dak si, dak âk n’hanh mô geh khuch tât săk soan bâh kon nuĭh”.

Hợp tác xã Nông nghiệp Thành Tín, xã Đắk Nuê, nkuăl Lăk geh bơi tât 100 rnăk kan ndrel, tăm rlău 130ha bum prŭm, bơi tât 700ha ba lŏ. Dŏng ăp công nghệ ueh mhe, tâm nĕ geh ndơ bruh mpăr tâm nău mât chăm tơm tăm lĕ n’hao nău geh ntil ndơ tăm, nău ueh ndơ geh ƀư. bum prŭm bâh HTX lĕ geh pă rnoh mbrô nkual tăm, tăch an dak bah dih tĭng trong tơm ta dak Trung Quốc. Bâh geh săk rnglăy na nê̆, mhe aơ, HTX lĕ rvăt tay 2 ndơ mpăr mô bruh tŏ tơm tăm mhe sĭt mât chăm tơm tăm, ăp mblâm máy geh rnoh khlăy rlău 250 rkeh prăk.