Dăch bên đah nău kan tăm kao Tết bơi tât jât năm aơ, wa Ôn Văn Khi, ta thôn 7A, xã Ea Bar, nkuăl Buôn Đôn an gĭt, yan tết aơ, wa tăm geh 100 gri kao cúc phalê ntil jê̆ oi n’hanh 70 gri cúc ntil têh ngăn. tăm kao tết nkre kơl an rnăk vâl n’hao nău geh, nkre lah nău rhơn bâh nuĭh pah kan. Neh aơ nău way wa tăm ăp ntil tuh mbo, tât khay 8 rgâl tăm kao cúc tăch tết. Năm aơ, nuh srê Covid-19 lĕ bah, nău ŭch pâl kao tết mbra hao, wa Ôn Văn Khi tăm âk ntil kao lơn, đah nău ŭch geh tay âk nău răm rhơn.

 “Nchrăp dŭt âk bâh ntơm mpli neh tât mpli ăp ntil phân poh vi sinh ăp ntil an geh mpli tâm ban, tal 2 lah an geh săch ntil ueh gay ma he tăm dơh mât chăm lơn, ueh lơn. mât chăm rĭ an geh tŏ dak mbro an tơm tŏng ăp dơm. Nuĭh tăch rhơn ma nuĭh pâl ta jay rhơn đŏng, năm mhe geh âk nău dơi mhe”.

Yan kao tết năm aơ, rnăk vâl wa Nguyễn Thị Hiệu, ta thôn 3, xã Hòa Xuân, nkuăl ƀon têh Buôn Ma Thuột, tăm geh 1500 mét vuông kao cúc koh n’gĭng. Bơi tât 4 khay mât chăm na nê̆, ăp nar aơ, wa n’hanh rnăk vâl pah kan mbro tâm mir, koh n’gĭng, mât chăm an kao luh dang ueh di rơh tết.

“ Aƀaơ dôl koh n’gĭng, mbom kao saơ păng jê̆ rĭ koh jăng lơi, mblom i têh ueh rĭ he rong, n’hanh aƀaơ mât chăm gay ma tât nar 22 geh 1 đê̆ gay ma geh dŏng hôm n’hanh du đê̆ tât 28 tết lah sŏk koh lĕ rngôch”.

Hôm đah wa Nguyễn Ngọc Sung, ta phường Tân Lợi, nkuăl ƀon têh Buôn Ma Thuột, ăp rơh tết tât năm mhe sĭt lah rơh wa geh dơn nău rhơn bâh nău kan tăm mai. Năm aơ, wa nchrăp geh bơi tât 400 tơm mai bâh 5 tât 70 năm gay ma ndơ̆ tăch. Wa an gĭt, gay ma dơi geh du mai ueh ta rơh tết, rlău ma ăp kĩ thuật koh n’gĭng, mât chăm, njrăng bu tuh rĭ an geh njrăng đah mih sial, trôk nar gay ma he dơi rgâl ueh an tâm di.

“Tâm năm he poh phân, tŏ dak an tŏng, ƀư mpă n’gĭng an ueh, dŭt năm mât ueh an n’ha nđir, dăng gay ma an păng rong kao ueh dŭt năm bâh khay 10 tât khay jât bar lah dŭt khlăy, kơp tât rnôk donh n’ha gay ma tơm geh dang kao”.

Ta ăp mir tăm kao Tết ta n’gor Quảng Nam, ăp nar aơ lĕ geh âk nuĭh rvăt n’hanh năch tât ta ntŭk rvăt kao. Năm aơ trôk nar ueh lăng jêng kao tết ta n’gor aơ geh âk n’hanh tăch rnoh khlăy. Rnăk vâl wa Trần Thị Thu, ta xã Duy Trung, nkuăl Duy Xuyên tăm bơi tât 200 rbăn gri ăp ntil kao kơt lah: Dạ yến Thảo, Mai địa thảo, cúc mâm xôi, sao băng..lĕ geh ăp nuĭh dăn rvăt rlău 70%. Wa Trần Thị Thu an gĭt, kao năm aơ geh rnoh khlăy, bu rvăt hăn rdeng ơm jêng ƀon lan geh nău geh đăp mpăn gay ma rvăt năp ndơ tết.

“Năm aơ, kao tết ueh lơn đah ăp năm, bu rvăt tât rvăt săch kao tăch tết, khân păng nchăm lor prăk. Đah năm e nơh, năm aơ nău geh âk lơn, rnoh kao khlăy lơn năm  e, gâp geh âk lơn đŏng. Lĕ nău geh klâp ma 1,4 rmen prăk, rlău du n’gul. Gâp pă nkhôm an 12 nuĭh pah kan gay ma geh nău kan mbro”.

 Nkuăl Duy Xuyên, n’gor Quảng Nam geh klâp ma 7ha neh tăm kao tăch ta rơh tết đah rhiăng rnăk tăm, dŭt âk lah kao vạn thọ, ăp ntil kao yông, rgum dŭt âk ta ăp xã Duy Thành, Duy Trung, Duy Nghĩa, Duy Hải, nkuăl têh Nam Phước. râng geh 1 ha neh tăm kao nsĭt tay an nuĭh ƀon lan kan lŏ mir rnoh geh rlău 200 rkeh prăk, âk rlău đah nău way tăm ăp ntil tơm ta neh kơh n’hanh biăp bum ăp ntil. Wa Phan Xuân Cảnh, kruanh UBND nkuăl Duy Xuyên, n’gor Quảng Nam an gĭt, đah ăp năm ba năp, năm aơ rnoh neh tăm hao lơn, ntŭk tăch dơh nơih đŏng.

“Nkuăl kơl an mpeh neh ntu gay ma pơk hvi nău pah kan jan sa. Mbra dơi lah, tâm nău dôl dơh nơih, n’hanh nău ŭch dŏng kao rĭ năm aơ geh âk lơn, gay ma pă dơi geh ntŭk kan an nuĭh mô geh nău kan, n’hao nău geh an ƀon lan tâm nău rêh jêr jŏt bâh nuh srê tât”.

 N’gor Quảng Nam geh bơi tât 2 rbăn rnăk ƀon lan tăm kao Tết. N’gâng kan tuch tăm n’gor Quảng Nam, Hội nông dân n’gor lĕ kơl an nuĭh tăm kao manh prăk, pă ntil tăm, kơl an khân păng đăp mpăn nău pah kan jan sa. Năm aơ, trôk nar ueh lăng, rnoh tăch khlăy, nău rvăt hao âk jêng lah nuĭh tăm kao tết ta Quảng Nam dŭt rhơn ngăn.