Jêh âk rơh mih khay 7, âk cán bộ nuĭh kan bri ngih dak Yok Đôn dŏng ndeh rdêng rhiăng tơm si Trắc Chăng bah ntŭk yơng ntil tât Tiểu khu 526 gay tăm. Wa Nguyễn Trung Hiếu, Groi Kruanh jrô kan Khoa học n’hanh Kan ndrel lam ntŭr neh, Bri Ngih dak Yok Đôn an gĭt, 100% tơm kon dơi yơng ntil ta mir mât, grăp ntil rgum bah ăp tơm me tâm mir. Jêh rnôk mĭn njêng kon ntil dơi ƀư bah 2 năm bah năp, tât aƀaơ, lĕ yơng n’hanh tăm geh rlău 1.000 tơm kon ta âk rnoh neh bri. Wa Nguyễn Trung Hiếu nkoch mpeh rnôk yơng ntil n’hanh tăm bri đah tơm si Trắc Chăng ta Bri ngih dak Yok Đôn năm bah năp.

“Bôk năp lah he an hăn uănh ăp nkual geh ntoh bah tơm si Trắc, jêh nĕ vĕ kơp uănh rnoh mbâl bah tơm si, jêh nĕ ƀư an tâm di n’hanh nkual tăm bah si. Jêh nĕ uănh lah nău tâm di bah tơm si Trắc ta ăp nkual bri nsuôp bah Bri ngih dak Yok Đôn. Mpôl hên dŭt răm, yor lĕ rgop tâm trong kan mât ndrăy ntil si khlay tơm Trắc an Bri ngih dak Yok Đôn”.

Trắc Chăng lah tơm si têh, prêh dơi geh 25 mét, têh tât 1 mét. Ta n’gor Dak Lak, tơm si hon âk tâm Bri ngih dak Yok Đôn, Nkual mât ndrăy bri Ea Sô... Tơm si Trắc Chăng geh dŭt dăng, nâp n’hanh uĕh, lah si khlay bôk năp tâm nău trah mon mỹ nghệ n’hanh ƀư jay. Âk năm bah năp, yor nău sreh kăl lir lar ƀư ntil si aơ nar lơ mpêt, khar.

Wa Nguyễn Hữu Tạo-Groi Hạt trưởng Hạt kiểm lâm Bri ngih dak Yok Đôn mbơh, aƀaơ tâm bri Ngih dak Yok Đôn hôm nklăp 200 tơm Trắc Chăng têh, lah mô ngăch yơng ntil mât ndrăy, tơm si roh tâm săk bri ta mir dŭt âk. Tĭng wa Tạo, nău mĭn njêng yơng ntil tăm âk ntil tơm si khlay rmôt IIA aơ rgop mât ndrăy gen khlay, rgop hun hao bri nâp nâl, kơt mât âk ntil sinh học. Wa Nguyễn Văn Tạo lah:

“Bri lĕ n’gluh an nău rgop tâm nchră mĭn njêng khoa học gay mât ndrăy hun hao ntil si Trắc. Aƀaơ lĕ yơng kon lôch uĕh, n’hanh dôl kơp uănh ăp ntŭk tăm tâm bri ta ăp rnoh neh bri nsoih tâm di, n’hanh ntơm pă ntil an kônh wa ƀon lan thôn ƀon nkual njônh gay tăm âk hun hao têh hvi lơn tay. Nău hun hao âk tơm si Trắc mbra rgop hun hao wăng sa an kônh wa”.

Bri ngih dak Yok Đôn (Dak Lak) geh rnoh neh têh dâk tal 2 lam dak, đah rlău 115.000ha. Bri ta aơ geh âk ntil si uĕh, tâm srah đah bri uĕh jêng, bri si tăch n’hanh bri nsuôp n’ha rŭng tĭng yan. Tĭng trong nchrăp, tâm yan mih năm 2023 aơ, Bri Ngih dak Yok Đôn mbra ntrôl dăng yơng ntil n’hanh ntop kơl nklăp 3.000 si kon tơm Trắc Chăng an kônh wa ƀon lan nkual njônh tăm ndrel n’hanh hun hao bri ta ăp nkual bri.