Tă khuch bah trôk nar mih n’hach, âk dak bât, n’glău n’gâr, n’hong dak bât ta n’gor Dak Lak geh khuch khat, jŭr djơh, khuch khat 73 rmen prăk. Lam n’gor aƀaơ geh 619 n’glău n’gâr dak đah rnoh hvi rlău 650 rkeh m3 dak; 161 dak bât ler, 76 trạm bơm, n’hanh bar trong ƀơ bŭng. Tă khuch bah mih phŭt, âk dak bât hŏ jŭt djơh, ƀư roh đăp mpăn n’glău dak bât, lơn lah pah kan mât dŏng tŏ djrah.

Wa Nguyễn Công Hạnh, groi giám đốc Công ty TNHH MTV mât ŭanh dak bât Dak Lak nkoch gĭt, aƀaơ công ty dôl mât dŏng 345 dak bât ăp ntil, dŏng tŏ an nklăp 80.000 ha tơm tăm n’hanh mât rong tui ka. Tâm rơh mih dak bŭk mhe aơ,  hŏ geh du đêt dak bât ta nkuâl Ea Súp geh  khuch khat hô; âk dak bât ta ăp nkuâl Krông Ana, Lắk, Krông Bông geh ma nău roh đăp mpăn hô. Doanh nghiệp hŏ ƀư ôp uănh nchih rgum khuch khat, njêng trong nchrăp mbơh rblang tât ăp gưl geh nău dơi kan tâm pă tơm prăk gay nkra bah khuch khat yơn mô hŏ  dơi tâm pă./.