Dak Lak lah ngoăy tâm ăp nkual tăm sầu riêng rgum tơm ta nkual Tây Nguyên. Bah meng nău ntop kơl ƀon lan mât chăm săk jêng, n’gâng kan ta ntŭk n’hanh n’gâng kan dơi kan hôm uănh khlay tât nău tâm di bah nkual tăm đŏng, nkre joi trong tăch ndơ geh ƀư rnoh khlay uĕh n’hanh đăp mpăn.

N’gor Dak Lak aƀaơ geh rlău 22.500 ha tăm sầu riêng, âk rlău 43% rnoh hvi neh tăm tơm sa play bah n’gor, rnoh âk geh bơi 188.000 tấn. Lam n’gor hŏ geh 49 mã nkual tăm dơi an dŏng đah rnoh hvi rlău 1.800 ha n’hanh 17 ntŭk nklâm tâl sầu riêng tăch n’gluh. Tâm bah ri aơ, nău pă mã mbrô nkual tăm sầu riêng tăch n’gluh ta n’gor Dak Lak mâp kol khan, đah bơi 40 nkôp hồ sơ geh bưm khan. N’gâng kan ta ntŭk n’hanh n’gâng kan dơi kan ta n’gor dôl ntrôl dăng ăp trong droh rklaih gay nta tay ăp nkual tăm sầu riêng tŏng nău dơi tăch n’gluh tĭng trong me.  

Khay 8 tât, Dak Lak mbra geh nklăp 9000 ha sầu riêng ta n’gor mbra tât khay klêh play. Tâm rnôk n’gor mhe pă an 63 mã mbrô nkual tăm dơm, lĕ rngôch rnoh hvi 2.000ha. Nău n’gluh đă đah ăp nkual tăm dơi mĭn uănh pă an mã mbrô lah neh tăm tâm ntêng lêng hvi ntơm bah 10 ha let lơ, rnôk tăm rlŭ đah ăp ntil tơm sa play êng ƀa ƀă, tŏng đah nău ŭch geh uănh năl bu tuh. Yơn lah tă bah sầu riêng ta Dak Lak tăm nchah nchrai, tăm rlŭ đah ăp ntil tơm tăm, tâm rgop kan đah ƀon lan n’hanh doanh nghiệp mô hŏ kloh rvah mpeh siƀŭt tâm di, jêr an gĭt năl nuĭh tơm neh ta nkual tăm…dôl nking kol rnoh  ngăch pă an mã mbrô. Ntơm bah khay 3/2023 tât aƀaơ, hŏ geh 40 hồ sơ bah 40 nkual tăm sầu riêng dăn pă an mã mbrô…geh kol khan tă bah ăp nkô̆ nău dja.

Gay ntrôl ngăch nău pă an mã mbrô nkual tăm, UBND n’gor Dak Lak hŏ jao nău dơn kan hăn ôp ŭanh, năl di tay nkual tăm an ăp Jrô kan tuch tăm n’hanh hun hao ƀon lan gưl nkuâl, jao Chi cục Tuch tăm n’hanh mât njrăng si tăm n’gor ƀư kơi năp nti tay an lĕ rngôch ăp cán bộ bôk tơm mpeh pah kan dja. Wa Lê Văn Thành - Chi cục trưởng Chi cục Tuch tăm n’hanh mât njrăng si tăm Dak Lak an gĭt, ndrel đah sầu riêng, n’gor hôm geh trong nchrăp pă an mã mbrô nkual tăm an lĕ rngôch ăp ntil ndơ tuch tăm săk geh  n’hanh nău kơi năp nti mpeh njêng, pă an- mât dŏng mã mbrô nkual tăm mbra dơi ƀư ndăn ngăch: 

          “Chi cục Tuch tăm n’hanh mât njrăng si tăm mpôl hên dơi jao ƀư nhih pah kan bôk tơm pă mã mbrô nkual tăm ri mpôl hên hŏ geh jă Cục Mât njrăng si tăm tât gay kơi năp nti tay na nê̆ an ăp cán bộ bôk tơm bah gưl nkuâl. Ăp cán bộ bah liên minh hợp tác xã, cán bộ bah trạm Tuch tăm n’hanh Mât njrăng si tăm, Ntŭk rgum ntrŭt nsôr tuch tăm, Chi cục hun hao thôn ƀon…. Lĕ rngôch ăp nhih pah kan geh tât ri mpôl hên jă lĕ.

Mhe aơ, Hiệp hội sầu riêng n’gor Dak Lak hŏ ƀư Tâm nchră buăt nthoi tăch sầu riêng năm 2023. Ta tâm nchră, ntơh măt ăp doanh nghiệp way nkô̆ mpeh n’gâng kan sầu riêng hŏ nkoch mpeh nô nău mât chăm, rgum rvăt, tăch sầu riêng ta ăp n’gor mpeh bah dâng năm 2023, nău tă ơm gĭt kan an n’gor Dak Lak, ăp nău tă ơm gĭt kan mpeh hun hao rêng rnoh khlay tâm mât chăm tăch rgâl sầu riêng bah du đêt dak ma trong nklâm tâl, nkret njêng mât prăp lôch klêh, ăp nău dơh uĕh jêr jŏt tâm nău kan tuch tăm tăch n’gluh. Ăp hợp tác xã, rmôt tâm boh nkoch  mpeh nô nău mât chăm, nău tă ơm gĭt mât, dŏng nău kan Hợp tác xã n’hanh ăp jêr jŏt tâm rnôk an ƀư ta nkual tăm.

        Ndrel đah nê, Hiệp hội sầu riêng Dak Lak hŏ mbơh gĭt mpeh trong nchrăp ƀư ntĭm nti mât chăm sầu riêng tĭng di rnoh tăch n’gluh, ƀoi tơm luh, ntop kơl nuĭh kan nsum tâm hiệp hội buăt nthoi tăch rgâl đah ăp doanh nghiệp gay njêng rêng rnoh khlay tâm mât chăm tơm sầu riêng an geh play tăch jŏ jong hao uĕh jêng. Ta tâm nchră dja, Hiệp hội sầu riêng n’gor Dak Lak hŏ ký ton siƀŭt nchih nkah đah Viện hun hao wăng sa tuch tăm, Công ty Cổ phần công nghệ phần mềm Autoagri n’hanh ntoh măt Cổng thông tin bah Hiệp hội ta ntŭk pơk - Hiephoisauriengdaklak.org.vn gay buăt nthoi ăp băl kan nsum tâm Hiệp hội. Râng tâm nchră buăt nthoi, wa Tống Văn Hiếu, Groi Tổng giám đốc Công ty cổ phần nkret njêng ndơ tuch tăm mbrô 1, nkuâl Krông Păk, n’gor Dak Lak an gĭt:

Đah doanh nghiệp dŭt rhơn rnê hiệp hội hŏ nta trong dơh tâm rsong tăch rgâl, tâm nđŭr kơt aơ. Nơm geh hiệp hội nta ăp trong dơh kơt aơ mbra nkoch n’hơ dơi ăp ndơ geh ƀư tât ăp nuĭh tă ơm gĭt mpeh sầu riêng. Lor bôk năp he ân bonh dơi ăp nuĭh tă ơm gĭt mpeh sầu riêng gay ăp nuĭh rgop nău gay he ƀư an uĕh ndơ geh ƀư lôch nê mơ tăch dơi tât ntŭk khăch khoch”.

Lah n’gor săk geh, dơh uĕh gay tăm rơ̆ jêng âk tơm sầu riêng, tâm bah ri aơ, bah meng nău nsrôih ntop kơl ƀon lan mât chăm geh săk jêng, n’gâng kan ta ntŭk n’hanh n’gâng kan dơi kan n’gor Dak Lak way ŭanh khlay nău tăch play đah rnoh dŭt uĕh, lơn lah ma trong tăch n’gluh tĭng trong me. Ndrel đah nê, n’gor Dak Lak hôm rlong an ƀư trong nchrăp tăm tơm sầu riêng dŏng công nghệ pet lât bah ngai n’hanh nkre đah rdâk njêng trong ntĭt leo mir sầu riêng nkre đah pâl nđaih rlong uănh saơ tuch tăm. Bah nê, geh ăp nău kan kơi năp nti, ntĭm nti  way jru, ntop kơl n’hanh hăn nti na nê̆ ta ntŭk tuch tăm gay tâm rgop kan đah ƀon lan tăch sầu riêng, dŏng công nghệ pet lât tâm nău kan tuch tăm, rdâk njêng mir ntĭt leo lor n’hanh trong ntĭt leo mir sầu riêng nkre đah pâl nđaih rlong uănh mir ba. Nău ŭch bah trong nchrăp kan lah n’hao nău gĭt êng bah ƀon lan rnoi mpôl đê̆ n’hanh tâm rgop hun hao wăng sa mpôl dŏng rgâl mbrô; rlong dŏng công nghệ pet lât gay tĭng groi nđôi rêng mât chăm sầu riêng n’hanh râng ntŭk ndranh tăch rgâl điện tử.