Kêng măng nđaơ (31/10), ta xă Ea Kênh, nkuăl Krông Pắk, n’gor Dak Lak, N’gâng kan tuch tăm Hun hao thôn ƀon n’gor Dak Lak ƀư jao an n’hanh ndơ̆ an dŏng n’glău njrăng rdâng rgâl trôk nar n’hanh ntop kơl ndoh ndơ lŏ mir an nuĭh ƀon lan mpeh nău nchrăp ƀư “N’hao dơi njrăng rdâng bah lŏ mir têh jêt đah rnă njrăng tu tơm dak yor rgâl trôk nar nkual Tây Nguyên n’hanh Nam Trung bộ ta n’gor Dak Lak”.

Rlău bơi 2 năm ƀư tĭng, lĕ geh rlău 3.400 nuĭh ƀon lan dơi tiăr nti n’hao blău đah nkô̆ nău mpeh mât uănh neh n’hanh sinh khối, rlău 1.000 rnăk ach o n’hanh êp ach o dơi nău nchrăp bư ntop kơl phân poh dak si lŏ mir tă bah trong ƀư phiếu rgâl ndơ đah dĭng lĕ rlău 5 rmen prăk, lôch jêh ƀư mhe/nkra tay 69 n’glău njrăng rdâng rgâl trôk nar đah dĭng lĕ 260 n’glău nău rƀŏng. Ntoh ngơi ta nar ƀư wa Nguyễn Hoài Dương, Giám đốc N’gâng kan tuch tăm mât rong hun hao ƀon lan n’gor Dak Lak an gĭt, đah nău ntop kơl bah bôk nău kan hun hao Liên hợp quốc, N’gâng kan tuch tăm mât rong n’hanh hun hao ƀon lan lĕ dơi nta an nuĭh ƀon lan ntơm rklaih luh ach o n’hanh hun hao wăng sa tĭng trong nâp nâl.