Nklăp 2 khay aơ, nău pă mrô nkual tăm sầu riêng tăch n’gluh ta n’gor Dak Lak mâp wăk kol, đah bơi 40 blah sam ƀŭt rhăch nău hôm e nkân. N’gor dôl ntrôl dăng ăp trong dôh rklaih gay nta an ăp nkual tăm sầu riêng dơi tăch n’gluh di trong, ngăch rwăt ntơm bah khay 8 tât. Tĭng wa Lê Văn Thành, Chi cục trưởng chi cục Tuch tăm n’hanh mpa rông tơm tăm Dak Lak, mbra geh nklăp 9000 ha sầu riêng ta n’gor mbra lăp yan pĕ bah khay 8 tât.

Tâm nĕ, n’gor mhe pă geh 63 mrô nkual tăm, dĭng lĕ rnoh neh nklăp 2.000ha. Gay ntrôl ngăch nău pă mrô nkual tăm, UBND n’gor Dak Lak lĕ jao an nău kan uănh nđôi, năl nkual tăm an ăp jrô kan Tuch tăm hun hao ƀon lan gưl nkuăl; Jao Chi cục Tuch tăm n’hanh mpa rong tơm tăm n’gor ƀư tiăr nti an lĕ rngôch ăp cán bộ kan mpeh trong kan aơ. Wa Lê Văn Thành an gĭt, ndrel đah sầu riêng, Dak Lak geh trong nchrăp pă an mrô nkual tăm an lĕ rngôch ăp ntil tơm tăm têh jêng nău tiăr nti mpeh ndâk njêng, pă-mât uănh mrô nkual tăm mbra dơi ƀư ndăn.