VOV4.M’nông – Nar 20/9, ta nkual ƀon têh Buôn Ma Thuột, UBND n’gor Dak Lak ƀư Rƀŭn nchră nkhêp di n’hanh ntŭk rlong đah ndơ lŏ mir khlay Dak Lak rnôk Việt Nam râng lăp ăp Tâm ton tăch rgâl dah rŏng yor rơh mhe (FTA).

Ntŭk rƀŭn nchră.

Tĭng nău mbơh ta rƀŭn nchră, ăp ndơ lŏ mir khlay Dak Lak lĕ geh măt ta rlău 80 ntŭk tăch lam ntŭr neh n’hanh nkual neh. Lơn lah, ăp ndơ kơt cà phê, cao su, tiêu, dak sŭt lĕ lăp ăp ntŭk tăch jêr nuih kơt Mỹ, Nhật Bản, EU. Yơn lah, rnoh khlay tăch n’gluh bah ăp ntil ndơ lŏ mir ta Dak Lak mô đăp mpăn; ndơ tăch n’gluh ndơ lŏ mir dŭt âk lah ndơ ê nkra mô lah tăch an dak ta n’gul, jêng rnoh khlay hŭch âk.

Wa Lê Thanh Hòa ntoh ngơi ta rƀŭn nchră.

Tâm nchră ta rƀŭn, ăp nuĭh way kan an lah, nău nchrŏng trong an nkra njêng dŭt khlay, tâm rnôk nkra njêng uĕh kah, đăp mpăn ndơ sông sa bah ndoh ndơ lŏ mir an dơi uănh nđôi rjăp, tŏng ăp tĭng tâm di uĕh kah bah ntŭk tăch n’gluh n’hanh tâm dak, kloh rah wah ăp trong mbơh ndoh ndơ lŏ mir.

Nuĭh rblang: Y Sưng Phê Ja