UBND n’gor Dak Lak mhe ƀư rƀŭn nchră mbơh ƀư trong nchrăp mât uănh groi nđôi, hun hao mrô nkual tăm n’hanh ntŭk tâl dŭng sầu riêng ta n’gor. Rƀŭn nchră dơi ƀư jêh ăp nău djơh, tâm pit n’hanh tâm ntôn mô ngăn, ma doanh nghiệp tăch n’gluh ntil ndơ aơ ta Dak Lak kol jêh mâp âk ndơ sầu riêng bôk năp dơi tăch n’gluh ntŭk trong têh. Tĭng nău mbơh rƀŭn nchră, tât aƀaơ Dak Lak lĕ tăm geh rlău 15.200 ha sầu riêng, hao 13.000 ha nkôp đah năm 2015.

Ntŭk prăp ndơ bah du doanh nghiệp sầu riêng ta Dak Lak

Rnoh ndơ năm 2022 geh rlău 150 rbăn tấn, n’hanh nchrăp mbra hao tât 300.000 tấn tâm năm 2025. Đah tăch n’gluh, năm 2022 lah năm bôk năp sầu riêng Dak Lak kơt lam dak, dơi tăch n’gluh an ntŭk rwăt Trung Quốc, ntŭk tăch 99% rnoh ndơ sàu riêng ta lam ntŭr neh. Gay mkra ăp nău wăk kol tâm rgop hun hao nău kan ndơ sầu riêng, n’hao dơi tâm rlong tăch n’gluh, kruanh UBND n’gor Dak Lak đă ăp ngih pah kan geh tât n’hao uĕh mât uănh, tâm rgop rjăp n’hanh rmal ngăch ăp nău ntoh mhe, ntrŭt ngăch ndâk njêng hiệp hội sầu riêng gay tâm di uĕh ndơ aơ.