Rơh rƀŭn nchră geh leo ƀư lôch geh ăp nău tât, nău tâm pit n’hanh tâm ntôn mô kan kloh rjăp, ma doanh nghiệp tăch ngluh ndơ aơ ta Dak Lak dôl geh mâp lôch ăp rnoh sầu riêng bôk năp geh tăch ngluh an dak bah dih tĭng trong tơm.

Tĭng nău mbơh bâh rơh rƀŭn nchră, tât aƀaơ Dak Lak lĕ tăm geh rlău 15.200ha sầu riêng, hao 13 rbăn ha đah năm 2015. Rnoh geh ta năm 2022 geh rlău 150 rbăn tấn, n’hanh nchrăp mbra geh tât 300 rbăn tấn ta năm 2025. Mpeh tăch an dak bah dih, năm 2022 lah năm bôk năp sầu riêng Dak Lak tâm ban kơt ta lam dak, geh tăch tĭng trong tăch rgâl tơm an ntŭk tăch rgâl Trung Quốc, ntŭk geh tât 99% rnoh geh sầu riêng ta lam ntur neh. Tâm lĕ rnoh 53 nkual geh tăm tăch ngluh an dak bah dih tĭng trong tơm, Dak Lak geh tât 23 nkual, lĕ rnoh neh tăm 1450ha.

Tâm ba năp nơh, ăp doanh nghiệp tăch ndơ an dak bah dih lĕ dŭt nsrôih tâm nău nchrăp ndơ, dâk leo kan dăn pă rnoh mbrô an âk ntŭk tăm sầu riêng. Yơn lah, yor mô geh tâm nchâp ngăn mpeh nău dơi n’hanh nău kan jêng lĕ geh ntoh luh nău ƀon lan kan lŏ mir nduĭh doanh nghiệp rlăm. Wa Lê Văn Thành, kruanh chi cục ntŭk tuch tăm n’hanh mât tơm tăm Dak Lak an lah, ăp doanh nghiệp an geh njrăng na nê̆ lơn tâm nău ƀư săm ƀŭt pă ndơn kan rnoh mbrô nkual tăm n’hanh tâm nău tâm ton tăch rvăt ntil ndơ, der geh ăp ntil nău tât tâm ban kơt nĕ mbra geh.

“Doanh nghiệp an geh ƀon lan kan lŏ mir ŭch pă, đă ƀư ndơn kan, geh săm ƀŭt ntrŭnh ký na nê̆. Hôm săm ƀŭt tâm ton kan tăch rvăt ntil ndơ, lah nău tâm ton kan đah ƀon lan kan lŏ mir, mô di lah tâm ton kan đah ntŭk kan mât tơm tăm, yơn nău tâm ton kan lĕ an geh njoăl an ntŭk kan mât tơm tăm gĭt na nê̆”.

Rlău ma 23 rnoh mbrô nkual tăm n’hanh 4 ntŭk kan tâl dŭng lĕ geh pă n’hanh geh an dŏng tăch ngluh tĭng trong tơm, Dak Lak geh 15 rnoh mbrô dôl kâp pă dŏng, 35 rnoh mbrô dôl geh njêng ƀư, lĕ rnoh neh rlău 2 rbăn ha. Tâm ôp đah phóng viên VOV ta bah dih rơh rƀŭn nchră, wa Trần Quốc Toàn, groi kruanh ntŭk kan mât uănh nău ueh jêng nău kan tuch tăm tăm bri mât rong tui ka n’gor Dak Lak an gĭt, nău mĭn nuĭh tăm sầu riêng ta n’gor aƀaơ hôm nha geh âk nău rvê, mô geh tâm rgop dâl đah doanh nghiệp tăch ndơ an dak bah dih. Yor kơt nĕ, nău tâm rgop, pă rnoh mbrô, tăch rvăt an dak bah dih, an geh ƀư na nê̆, der geh ăp nău tât let năp tay.

Khân păng nkoch lah mô geh tâm ton đah bu, yor khân păng mô hŏ geh knơm du hê nuĭh. Gâp ôp mơh dĭng mô knơm, rĭ khân păng rblang lah aƀaơ ký kan nsum, let năp tay geh nău mpet rnoh mpôl hên rĭ mhâm ƀư. Kơt nĕ jêng ăp ntŭk nĕ lah an geh nău tâm ton n’hanh ntrŭnh na nê̆ lah nuĭh ƀư ndranh rjah nău tâm pit nĕ. Luật wăng sa, luật dân sự lĕ geh, yơn doh rkliah nău tâm pit bâh ƀon lan hôm nha jêr ƀư ngăn.

Gay ma  ndâk nkra ăp nău kŏ văk ta nău tâm rgop hun hao n’gâng kan sầu riêng, n’hao soan tâm rlong ta trong tăch ndơ an dak bah dih, nuĭh leo kan UBND n’gor Dak Lak dăn đă ăp ntŭk kan geh tât n’hao nău dơi mât uănh, tâm rgop na nê̆ n’hanh rmal ngăch ăp nău tât ntoh luh, ƀư ngăch njêng rmôt kan sầu riêng gay ma pah kan an ueh lơn n’gâng kan geh âk nău dơi aơ. UBND n’gor Dak Lak lĕ ntrŭnh nău nchrăp uănh nđôi, hun hao rnoh mbrô nkual tăm n’hanh ntŭk tâl dŭng sầu riêng. Tĭng nău nchrăp mhe geh ntrŭnh, 6 ntŭk kan ta n’gor, ăp ntŭk kan ndrel n’hanh ntŭk leo kan, UBND gâl nkuăl, ndơn kan an ăp nkual tăm n’hanh ntŭk tâl dŭng, lĕ geh pă an 16 nău kan na nê̆, tâm di đah nău dơi bâh nơm gay ma rdâk njêng ăp nkual tăm sầu riêng nâp nâl, pă rnoh mbrô nkual tăm n’hanh uănh nđôi na nê̆ bâh nău pah kan jan sa tât nău nău tăch rgâl sầu riêng tâm ăp yan let năp tay.