Ôi lơ 8/9, N’gâng kan Công thương n’gor Dak Lak ƀư rơh rƀŭn nchră tâm nthoi nau kan tăch rgâl đah ăp ntŭk pă tăch ndơ tuch tăm đah ăp ntŭk kan rvăt, tăch luh dak ba dih năm 2023. Rlau 200 ntoh măt tă bah 120 ntŭk ntoh măt ăp ntŭk pă tăch, rvăt ndơ tuch tăm gay tăch luh tâm dak, ăp ntŭk kan tăch rgâl, ntŭk tâm boh nau kan ê nkra, pă ndơ tuch tăm, ndơ sa tâm ăp n’gor Dak Lak, Dak Nông, Long An, An Giang, Hậu Giang râng rƀŭn.

Ta rơh rƀŭn, ăp ntoh măt hŏ mbơh, nkoch mpeh nau geh dơi, nau dăng mpeh ăp ntil ndơ tuch tăm, nau geh dơi ntuh kơl tâm nau kan tuch tăm, ê nkra ndrel tăch ăp ntil ndơ tuch tăm tơm bah nkuăl. Wa Lưu Văn Khôi, Giám đốc N’gâng kan Công thương n’gor Dak Lak mbơh, rnoh tăch luh tâm lam n’gor khay 8/2023 geh 130 rkeh đôla. Tơm prăk geh tăch luh ndơ tât dak ba dih 8 khay năm 2023 geh rlau 1000 rkeh đôla, huch 0,3% rđil đah rơh aơ năm 2022, geh 64,4% nau nchrăp năm./.