Nău geh tăch rgâl dŭt ueh n’hanh ton mbra lah ngoăy tâm âk trong kan tăch rgâl ndơ geh săk rnglăy, kơl an ƀon lan n’hao nău geh n’hanh nkre lah kơl rgâl nău mĭn pah kan an ƀon lan kan lŏ mir.

Ta ti njôt điện thoại mhe n’hanh bâh du đê̆ nău way lât dơh kơt lah sŏk rup, nchih mbơh du đê̆ ndơ geh tăch, ntŭk tu tơm, rnoh khlăy, tăch thuk mô lah ndơ pă an êng, wa Đồng Xuân Liền, Giám đốc Hợp tác xã Nam Bình, nkuăl Dak Song, n’gor Dak Nông lĕ geh ndơ̆ găr tiu krăk ta trong tăch rgâl điện tử Postmart. Wa Liền an gĭt, 2 khay ba năp Hội đồng nhân dân n’gor n’hanh Bưu điện n’gor lĕ tâm rgop ƀư du rơh nti nău kan an ăp hợp tác xã gay ma ndơ̆ ndơ tuh mbo ta ntŭk tăch rgâl điện tử. Bôk năp wa n’hanh ăp nuĭh kan ndrel ta hợp tác xã hôm nha geh âk nău wĭ wĕ, yơn  đah nău leo kan dŭt nsrôih, aƀaơ nău ndơ̆ ntil ndơ kan bâh nơm ta ntŭk tăch rgâl Online dŭt dơh n’hanh njoat hăn lĕ geh tăch du đê̆ ndơ ƀư an wa dŭt rhơn.

          “Bâh rơh nti nău kan, joi gĭt mpeh săm ƀŭt rhŏ nti nău kan nkre lah geh đă oh kon ntĭm nti tay rĭ rơh bôk năp gâp lĕ geh ndơ̆ ndơ bâh hợp tác xã tât ta ntŭk tăch rgâl điện tử gâp dŭt rhơn ngăn. Lôch tă geh bu rvăt, bol ma ê hŏ âk yơn lĕ geh bu rvăt ndơ an HTX, aơ lah nău dŭt rhơn ngăn.

          Bâh ntơm rgâl jêng ntŭk tăch ndơ  ta trang điện tử, wa Nguyễn Thị Ngọc Sen ta phường Nghĩa Đức, nkuăl ƀon têh Gia Nghĩa mô hôm geh nău nchoăt kiau ma hăn tăch ndơ, njŭn play rpŭng kho kơt ntơm nơh. Wa an gĭt, ntơm nơh, rpŭng kho rnăk vâl wa tăm dŭt âk lah tăch ta ăp ntŭk tăch rgâl mô lah tăch an năch bên. bâh ntơm geh tât râng tăch rgâl bah trang điện tử bâh rnăk vâl wa kanŭng lê, tâl dŭng an ueh mbra geh nuĭh kan bâh Bưu điện tât sŏk, nchoăn ndơ̆ an năch . Nău nchih mbơh ndơ tăch ta trang điện tử bâh wa Sen an saơ, ăp ntil play rpŭng kho kơt lah: Kim Long, Hoàng Long, Kim Hoàng Hậu...geh tăm tâm jay bil tĭng nău mpŏng di VietGap. bâh nău mât chăm, poh phân, tŏ dak..geh ƀư tĭng trong ntruh êng. Bâh bôk năp mô gĭt vât mpeh công nghệ, wa Sen rhơn rnôk ăp ntil ndơ nơm geh ƀư lĕ geh tăch rgâl, geh rơh gĭt dăch đah âk năch rvăt ta ăp ntŭk lên.

          “Geh Hội nông dân n’gor jă hăn râng tâm nchră lôch nĕ geh gĭt ndơ̆ ndơ geh ƀư kơt lah rpŭng kho tât ntŭk tăch rgâl ta trang điện tử Postmart Dak Nông . Dŭt rhơn ngăn, tâm rgop geh ndơ nơm ƀư tât bah dih n’gor gay ma ndơ he ƀư ăp nar lơ ma âk nuĭh gĭt. Aƀaơ du rơh geh tăch 1,5 tấn yơn ŭch let năp tay mbra geh du rơh tăch 4-5 tấn rĭ nău geh bâh he hao âk lơn”.

Geh tâm bôk nău kan ntrôl rgâl mhe rnoh mbrô tâm n’gâng kan tuch tăm, Hội nông dân n’gor Dak Nông lĕ tâm rgop đah Bưu điện n’gor  ƀư rơh nti nău kan an ƀon lan kan lŏ mir tâm nău gĭt blău ndơ̆ ndơ geh ƀư tât ntŭk trang tăch rgâl điện tử postmart . Lôch jrô nti n’hanh ăp rơh ntĭm nti, kơl an, tât aƀaơ lĕ geh 38 ntil ndơ bâh 28 rnăk ƀon lan geh ƀư tâm n’gor geh ntrŭp nău ntơ ta ntŭk tăch rgâl bâh n’gâng kan bưu điện. Wa Hồ Gấm, kruanh Hội nông dân n’gor Dak Nông an gĭt, aƀaơ, ƀon lan kan lŏ mir n’hanh ăp HTX, doanh nghiệp hôm nha geh mâp âk jêr jŏt mpeh nău geh gĭt đah công nghệ mhe, nău kan kơp dơn ăp nău mpŏng ueh di ntil ndơ gay ma ndơ̆ ta ntŭk tăch rgâl điện tử. Yor nĕ, nău kơl an ƀon lan kan lŏ mir n’hanh ăp HTX ta rơh aơ lah dŭt khlăy.

“Mpôl hên ŭch năp lor lah lĕ rngôch ăp ntil ndơ ma tâm di đah nău mpŏng kơp dơn OCOP rĭ an geh ndơ̆ ta ntŭk tăch rgâl nsum, geh uănh năl nău ueh n’hanh geh rnoh âk, geh ntŭk tăch rgâl tâm n’gâng kan wăng sa. Mbrơi mbrơi lôch nĕ he mbra geh ndơ̆ lĕ rngôch ăp ntil ndơ tât ntŭk tăch rgâl gay ma tăch rvăt, tâm rgâl ndơ an tâm di kloh na nê̆, dơh rgum, dơh pă an”.

Hao ntŭk tăch rgâl điện tử, ndơ tuch tăm bâh ƀon lan kan lŏ mir ta Dak Nông geh rơh nkhêp mbơh kloh rjăp ntil ndơ, mbơh tơih, n’hao nău geh gĭt đah năch dơi rvăt, yơn nkre lah an geh kloh rjăp âk lơn mpeh nău dơi, nău ueh, nău jêng ntil ndơ. Bâh ăp nău aơ an geh nuĭh ƀon lan kan lŏ mir rgâl trong pah kan jan sa, uănh khlăy tât nău mât đăp mpăn, n’hao nău ueh di ntil ndơ geh ƀư, mât brăp n’hanh nkret njêng an ueh lơn. Geh kơt nĕ, nău n’hao tăch ndơ ta ntŭk tăch rgâl điện tử mơ geh ngăn ngên nsĭt tay săk rnglăy, gay ma ƀon lan geh ryơk n’hao êng an ndơ nơm geh ƀư.

Nău nchih mpeh săk rnglăy bôk năp bah bôk nău kan ndơ̆ ndơ lŏ mir Dak Nông lah ntŭk tăch điện tử. Bah kơi aơ, phung nchih nău nkô̆ way nkoch geh rơh tâm nchră đah wa Phạm Tuấn Anh, giám đốc N’gâng kan tuch tăm mât rong n’hanh hun hao ƀon lan Dak Nông mpeh nău m’hâm ƀư gay ntrôl tăch rgâl ndơ lŏ mir bah n’gor tâm ntŭk tăch điện tử.

         - Dăn wa an gĭt du đêt săk rnglăy ntuh lư bah nău ndơ̆ ndơ lŏ mir Dak Nông hao ntŭk tăch điện  tử?

- Wa Phạm Tuấn Anh: Đah nău kan lŏ mir, ngoăy tâm âk nău khlay ngăn mpôl hên uănh nĕ lah m’hâm ƀư an hun hao, ntrôl nău tăch ndơ lŏ mir tĭng trong nsĭt tay săk rnglăy âk an nuĭh ƀon lan. Yor nê, rlău ma ăp trong tăch ndơ way ơm kơt kăl e, tă bah ăp ntŭk tăch, ăp doanh nghiệp, ăp hợp tác xã, ri ngoăy tâm âk trong mpôl hên uănh nĕ lah ndơ̆ hao ntŭk tăch điện tử. N’hêl na nê̆ an tât aƀaơ, N’gâng kan tuch tăm mât rong n’hanh hun hao ƀon lan lĕ tâm rgop đah n’gâng kan Công thương pah kan đah bưu điện n’gor gay mbơh nău ndơ̆ săk ăp rnăk tuch tăm lŏ mir an tâm trang web bah bưu điện. Nkre, mpôl hên lĕ ndơ̆ du đêt ndơ lŏ mir, lơn lah ăp ndơ lĕ dơi kơp dơn OCOP hao ntŭch tăch điện tử. Săk aƀaơ aƀaơ mpôl hên lĕ ndơ̆ 107 rơh ndơ dơi kơp dơn OCOP hao ăp ntŭk tăch điện tử. Tâm nĕ: geh 15 ndơ hao ntŭk tăch shoppe, 25 ndơ hao ntŭk tăch postmart, 47 ndơ hao ntŭk tăch voso, 20 ndơ hao ntŭk tăch ocop.

- Nău ndŏ ndơ lŏ mir Dak Nông hao ntŭk tăch điện tử aƀaơ dôl geh ăp nău dơh n’hanh jêr jŏt mêh wa ?

- Wa Phạm Tuấn Anh: Geh du nău ngăn an saơ bôl ăp ndơ lŏ mir lah nsum, OCOP lah êng lĕ dơi ndơ̆ hao ntŭk tăch điện tử yơn lah, săk rnglăy đah ntŭk tăch mô hŏ uĕh, mô hŏ dơi kơt nău ŭch. Ta aơ geh âk nkô̆ nău, bôl năm, ndơ he mô geh tŏng ăp nău mbơh khlay gay tâm di nău ŭch nuĭh dŏng. Tal 2, ntô rup n’hanh du đêt rnoh an ƀư êng mô tŏng soan tâm rlong. Tal 3, dŭt âk ăp ntil ndơ OCOP mô lah kônh wa ƀon lan geh ndơ hôm e dôl ntĭm mpeh ăp trong tăch way ơm, khân pơng mô janh rgâl.

Ndơ bah nơm mô dĭ ăp nar dơi geh, yor mô hŏ geh nău tâm rgop đah ăp nuĭh tơm, đah ăp rnăk nuĭh ƀon lan ndrel. Jêng tât ndơ jêt chrai n’hanh geh tĭng yan jêng tât kônh wa ƀon lan mô hŏ nsrôih, mô ŭch râng ntŭk tăch điện tử. Du đêt nău tay, nuĭh ƀon lan mô hŏ ƀlău ƀư ta ntŭk tăch điện tử. Yor nê khân pơng geh nău mô janh. Nĕ lah ăp jêr jŏt mpôl hên dôl mâp. Êp tât mpôl hên mbra pah kan đah ăp ntŭk kan geh tât, m’hâm ƀư an tiăr nti, kơl an khân pơng rgâl nău mĭn, uănh trong tăch ndơ điện tử lah ngoăy tâm âk trong khlay, nkre ntêm nkrem prăk. Nkre, mbơh an ntŭk tăch điện tử rgop mpla nsơ rup ndah ndơ bah Dak Nông têh dăng.

Mpeh nău ndơ̆ nău hun hao trong tăch ndơ hao ntŭk tăch điện tử dơi uănh dŭt têh bah N’gor ủy, HĐND, lơn lah UBND n’gor, ăp đồng chí kruanh UB mât uănh ntil nău kan. Tal 2, mpôl hên geh tâm rgop rjăp đah Bưu điện, N’gâng kan Công thương, N’gâng kan Thông ti truyền thông n’hanh ăp ntŭk kan n’gâng kan, ăp hợp tác xã. Tal 3, mpôl hên geh du trong nchrăp hun hao, geh nău kan ndrel rjăp, nsrôih bah ăp nuĭh tơm OCOP. Bôl săk rnglăy mô hŏ geh kơt nău ŭch ri tâm năm tât mpôl hên mbra geh âk trong gay rgâl, m’hâm ƀư ndơ lŏ mir Dak Nông dơi hao ăp ntŭk tăch điện tử âk lơn n’hanh ngăch tăch rgâl mbra âk lơn nkôp đah năm bah năp.

- Gay n’hao săk rnglăy tăch rgâl ndơ lŏ mir hao ntŭk tăch điện tử kơt wa mhe lah ri n’gor Dak Nông geh ăp trong, nău rƀŏng, ndơ ƀư mêh wa ?

- Wa Phạm Tuấn Anh: Phung hên dôl geh trong nchrăp rblang bah ăp jêr jŏt, ăp nău hôm e bah he gay ndơ̆ an ăp trong mkra. Lor ri m’hâm ƀư gay ndơ bah he geh tâm ban đah uĕh, tŏng ăp đah rnoh ndơ, rnoh tâm di nău ŭch bah ntŭk rwăt. Kơt nĕ, gay mkra nău aơ, mpôl hên ntrôl dăng tă bah hợp tác xã. Yor hợp tác xã mbra tyâm rgop đah ăp rnăk, ăp ndơ gay dơi geh rnoh âk, tal 2 hợp tác xã mbra dâk ƀư an kônh wa nkra njêng tĭng tâm di. Rlău ma nĕ, mpôl hên mbra boăt nthoi đah ăp doanh nghiệp, ăp trang tăch điện tử gay m’hâm ƀư geh nău kơl, nta nơih uĕh ngăn an kônh wa rnôk ndơ̆ ndơ hao ntŭk tăch điện tử. Lơn lah trong ƀư tăch n’hanh ăp nău êng geh tât. Tal 2, nta nơih ngăn m’hâm ƀư an hao ntŭk tăch điện tử ri yor nuĭh ƀon lan n’hanh ăp nuĭh tơm OCOP ntrŭnh. Kloh nanê̆ he an m’hâm ƀư an bu saơ aơ lah du trong tăch săk rnglăy, đăp mpăn, kơl n’hŭch âk prăk, nkre lah trong mpla nsơ ngăch ngăn đah ndơ bah khân pơng. Kơt nĕ, ta aơ he an rgâl đah nău wât, nău mĭn, nău aơ mô di du nar 2 nar, he an geh âk trong mkra tâm ban, nkre nkoch trêng, ntĭm nkre m’hâm ƀư an bu saơ săk rnglăy wăng sa tâm nău aơ. Nău tal 3, N’gâng kan Công thương, N’gâng kan tuch tăm mât rong n’hanh hun hao ƀon lan n’hanh N’gâng kan thông tin truyền thông an geh bôk nău tâm rgop, boăt nthoi đah n’gâng kan ƀon lan, hợp tác xã gay ƀư du trong tâm ban lĕ rngôch.

- Ơ dăn lah uĕh wa Phạm Tuấn Anh, Giám đốc N’gâng kan tuch tăm mât rong n’hanh hun hao ƀon lan n’gor Dak Nông đah nău tâm nchră aơ.