Ntơm bah bôk khay klêh cà phê năm 2021 – 2022, ta n'gor Dak Nông hŏ ntoh geh nuĭh ntŭng klêh cà phê. Aƀaơ ăp nkuâl hŏ n'hao dăng pah kan hăn ôp uănh, treng nđôi, nke đah nău nkoch trêng nuĭh ƀon  lan n'hao nău nkah njrăng lor gay mât njrăng drăp ndơ tâm khay klêh donh.

        Ăp nar dja, rnăk wa Y Kem, ta ƀon Bu Păh, xã Trường Xuân, nkuâl Dak Song, gŭ dâk mô đăp yor mir cà phê bah rnăk păng geh bu ntŭng klêh. Wa Y Kem an gĭt, rlău 50 tơm cà phê geh bu roih n'hang, lơh roh huach nklăp 400kg. Aơ mô di lah  lor bôk năp cà phê bah păng geh bu ntŭng klêh, yor mir ngai đah  jay rlău 1 km:

        3 năm aơ hôm, geh roh cà phê ta mpeh bah aơ mbro. Yor khay klêh cà phê ri dŭt âk nuĭh bah n'gor êng tât dăn klêh cà phê, he mô gĭt moh nuĭh, moh thôn gŭ, jêng roh bu ntŭng ri he dŭt jêr ban saơ.

          Dơi gĭt ta ntŭk dja  đŏng khay klêh donh năm e nơh, geh bar rnăk geh bu ntŭng klêh cà phê đŏng. Gay mât njrăng drăp ndơ, kônh wa geh mir tâm nkual hŏ kan nsum tâm pleh hăn rsong uănh tâm măng.  Yơn nău roh bu ntŭng hôm nha geh đŏng tă bah mir hvi, ngai đah nkual ƀon  lan gŭ n'hanh geh âk trong glăt. Yor kơt nê̆, rlău ma nău kan nsum hăn rsong uănh, ta du đêt trong nuĭh ƀon lan hôm ntrŭp camera groi nđôi gay njrăng n'gang bu ntŭng đŏng. Wa Lê Ngọc Ga, ta xã Trường Xuân, nkuâl Dak Song, an gĭt:

       Măng ri way hăn chop uănh mir. He hôm ntrŭp tay camera gay groi nđôi bah năp jay đŏng, tĭng trong hăn đŏng. Rnôk ma cán bộ thôn ŭch geh ri he pơk tay camera nê gay khân păng năl saơ nhŭp ăp nuĭh ntŭng rmuănh play do, gay kônh wa mât chăm cà phê đăp mpăn lơn.

        Nău ntŭng klêh cà phê ƀư nuĭh ƀon lan dŭt rvê, yor khân păng mô  dơn roh drăp ndơ, ma tơm cà phê way geh mpôl ntŭng nkĭch pă lĕ n'ging, jêr mât chăm sĭt jêng tay đŏng, mbra hŭch geh play năm bah kơi tay. Mô dơn ntŭng rmuănh, âk nuĭh nde tâm khay klêh cà phê gay ƀư tih djơh. Mhe aơ, du rnăk ƀon lan ta xã Đắk Sin (nkuâl Đắk R’lấp), hŏ geh nuĭh hăn klêh cà phê ntŭng ndeh honda n'hanh du rnoh prăk, maih lôch nê nchuăt du. Hôm ta phường Quảng Thành (Nkual ƀon têh Gia Nghĩa), mpôl công an hŏ ban saơ du hê nuĭh krap nde nău tih lăp tâm rlŭ tâm rmôt hăn dăn klêh…

        Gay mât đăp mpăn rnă njrăng tâm khay klêh cà phê, ăp nkuâl ta n'gor Dak Nông hŏ ntrôl dăng pah kan nkoch trêng, nkah njrăng lor ăp trong ƀư ntŭng bah ăp mpôl tih djơh. Mpôl công an tâm dâng n'hao âk tơ̆ rsong hăn,  treng nđôi ăp ntŭk duh hô, hăn ôp uănh ntŭk manh gŭ nde đah nuĭh kan dah  rŏng, nuĭh hăn kan tĭng khay klêh donh… Công an Dak Nông njrăng đă nuĭh ƀon lan manh nuĭh kan ân ôp uănh siƀŭt rnăk săk n'hanh tĭng jăp nău đăng ký manh gŭ tĭng quy định.

        Đại úy Nguyễn Văn Đô, Groi kruanh Công an xã Trường Xuân an lah, ndrel đah mpôl kan dơi kan, nău nkah njrăng lor bah nuĭh ƀon lan mbra rgop bah ir geh  ăp mpôl tih djơh ntoh luh tâm khay klêh cà phê. Kơt nău geh ta rnăk bah wa Y Kem, công an xã hŏ ôp uănh, ngăch ban nhŭp 5 nuĭh klêh ntŭng cà phê. Đại úy Nguyễn Văn Đô an gĭt:

        Tâm khay klêh cà phê ăp năm ri công an xã rdâk njêng trong nchrăp mât njrăng play do, nkoch trêng gay kônh wa gĭt njrăng n'gang êng ăp ntil nău tih, lơn lah nău tih ntŭng drăp ndơ. Công an xã way kan nsum đah ăp rmôt mât đăp mpăn rnă njrăng, rmôt mât đăp mpăn ƀon lan hăn rsong uănh treng nđôi gay hŭch bah roh yot ndơ bah kônh wa tâm khay klêh donh. Rlău ma nê ri rƀah gĭt rnoh nuĭh bah ăp n'gor êng tât hăn dăn kan n'hanh gŭ rêh đŏng; n'hanh way ôp uănh lah mbram ăp nuĭh tih geh nău mpơl ntŭng rmuănh drăp ndơ./.