Bah trong leo tăm tơm sa play ta n’gor Tiền Giang hŏ ntoh âk nuĭh ƀon lan kan lŏ mir tuch tăm jăp blău. Đah nău mĭn nsrôih ndrel đah nău jăp blău, njêng mhe tâm pah kan jan sa, mô đêt nuĭh jêng geh ndrŏng. Đảng viên Lê Văn Thủy lah du nău ntĭt.

Hăn tât ấp Mỹ Khương, xã Mỹ Tịnh An, nkuâl Chợ Gạo, n’gor Tiền Giang, lĕ dĭng nuĭh gĭt wa Lê Văn Thủy, 58 năm deh, lah du hê đảng viên ƀon lan kan lŏ mir tuch tăm jăp blău lam dak. Păng aƀaơ lah nuĭh tơm mir hvi 1,8 ha neh tăm tơm thanh long. Wa Thủy an gĭt, rnăk păng ntơm nơh tăm ba nsĭt geh wăng sa mô âk jêng rgâl tăm tơm thanh long n’glang bơi 30 năm aơ. Ntơm bah năm 2012, dơi geh nău njrăng đă, ntĭm nti bah n’gâng kan rnâng kan, păng ntơm lăp tăm tĭng di rnoh Viet GAP tât Global GAP tĭng trong tâm rgop đah Hợp tác xã Mỹ Tịnh An gay tăch n’gluh.

Nơm geh jăp gơih tâm pah kan jan sa n’hanh gĭt dŏng kỹ thuật tâm nău tuch tăm jêng mir thanh long bah rnăk wa Thủy way săk geh âk n’hanh kah uĕh. Rĭng ăp năm, mir thanh long dja klêh 3 tơ̆ play, an rnoh âk geh ntơm bah 50-60 tấn. Lĕ rngôch play thanh long bah păng dơi HTX Mỹ Tịnh An ton rvăt đah rnoh khlay âk rlău ntŭk tăch bah dih bar pe jât rbăn prăk/kg. Khay duh phang năm aơ, mir thanh long bah wa Lê Văn Thủy mhe klêh geh bơi 20 tấn play, rnoh khlay tăch 22 rbăn prăk/kg, nsĭt geh 450 rkeh prăk. Wa Lê Văn Thủy nkoch:

“Ŭch mât chăm tĭng di rnoh Global GAP nău khlay lah he ŭch rgâl nău way tuch tăm ơm bah he lah mô, ân mĭn tât săk geh đăp mpăn kah uĕh mpeh ndơ sa, đăp mpăn an nuĭh dŏng sa. Aƀaơ he ân ƀư tĭng di rêng kloh uĕh, tâm  puh dak si, poh phân he ân dŏng ndơ rmŭ ôm poh, lơi ir dŏng chế phẩm sinh học an uĕh jêng neh, nsĭt tay rmŭ ôm an neh gay he geh play tăch săk kah tâm di đah nău ŭch geh rvăt bah nuĭh dŏng sa”.

          Nău dŭt di ma nchih nkah đah đảng viên Lê Văn Thủy lah nău nsrôih, nău blău ƀư mhe tâm nău kan tuch tăm. Tâm rnôk âk ƀon lan ta ntŭk tâm rlong tăm thanh long săk gŭr ri păng du nuih n’hâm đah tơm thanh long n’glang. Yor tĭng păng, ntil thanh long săk n’glang, đêt geh bu tuh, săk geh play âk n’hanh ntŭk tăch ta Mỹ, Châu Âu dŭt ŭch. Tâm bah ri aơ, bol play thanh long geh rnôk  tăch mô peh, jŭr thuk jru yơn păng mô plơ̆ rŭch ma lơn ntuh kơl tay, n’hao săk geh mir tơm. Wa Nguyễn Văn Nam, Kruanh UBND xã Mỹ Tịnh An an gĭt, wa Lê Văn Thủy lah du đảng viên ntoh lư tâm pah kan jan sa ta ntŭk.

“Wa Thủy tăm tĭng trong VietGAP đah Hợp tác xã tăm tĭng rêng ƀư jêng săk geh, kah uĕh play dŭt âk. Aƀaơ trong ntĭt leo tăm tĭng mbor bah păng săk geh play âk lơn. Tâl bar păng tŏ ma bec phun, mpli dak si têk rse tŏ mô kâp anh bình puh jêng dŭt dơh, mpêt nkrem nar luh kan jêng săk geh dŭt âk. Aƀaơ lah thanh long săk n’glang rnoh khlay rlău 15 rbăn prăk/kg đăp mpăn ngăn”.

          Ntơm bah trong ntĭt leo tăm thanh long geh ndơ tăch, rnăk wa Lê Văn Thủy hŏ jêng geh mbơm oi đah tơm nsĭt geh wăng sa ăp năm nklăp 1,5 rmen prăk. Năm 2020, Păng dơi rhơn n’hao dơi Thủ tướng Chính phủ pă an bằng khen mpeh nău dơi tâm pah kan jan sa. Rlău ma nê nuĭh ƀon lan dja dơi TW Hội Nông Dân Việt Nam, UBND n’gor Tiền Giang pă an âk bằng khen mpeh nău dơi ngăch prăl tâm pah kan Hội n’hanh tâm rlong pah kan jan sa.

          Mô dơn pah kan jan sa jăp blău ma đảng viên Lê Văn Thủy hôm ƀư Chi hội trưởng, Chi hội Nông dân ấp Mỹ Khương, xã Mỹ Tịnh An. Tâm bah ri aơ, păng dŭt nsrôih uĕh tâm ăp trong leo ƀư, pah kan kơl êng nuĭh ta ntŭk tâm ban kơt kơl ƀon lan kan lŏ mir ach o jêr jŏt, rdâk njêng ntung trong hăn tâm ƀon lan. Săk păng nơm hŏ ŭch râng êng rlău 30 tơ̆ yur mham kơl nuĭh. Wa Lê Văn Thủy mpơl nău nkoch:

Lah ƀon lan Việt Nam ma hŏ bơi 60 năm deh dơi lăp tâm rmôt bah Đảng nê lah nău rhơn n’hao dŭt têh. Êng săk gâp nơm bol hŏ nkai yơn he lah rjăp nău mĭn chính trị bah he, rŏng n’gâng kan bah he, rŏng Đảng, Ngih dak....tâm năm rêh hôm ƀa ƀă he mbra nsrôih ƀư lĕ rngôch ăp ntil ndơ bôk năp lah ân rêh an săk he nơm sŏng di, rêh an rnăk wâl, ƀon lan, lam mpôl, kơt nti tĭng nuih n’hâm uĕh lŏng Hồ Chí Minh an jăp, an tay nău nkah uĕh an oh kon kơt tĭng”.

      Ta bơi 60 năm deh yơn nuih n’hâm gân djăng đah nău tăm thanh long tăch n’gluh bah du  hê nuĭh đảng viên “ƀon lan kan lŏ mir” Lê Văn Thủy hôm dŭt nđơr đŏng. Păng an gĭt, hôm suan ri săk păng nơm hôm nsrôih râng kan đah rnăk wâl, nsrôih ƀư geh ndrŏng bah tơm thanh long gay an kon său bah kơi kơt tĭng đŏng./.