VOV4.M'nông- Aƀaơ, Gia Lai dôl ntơm lăp ta yan lêh sầu riêng, nuĭh ƀon lan rhơn yor sầu riêng geh play âk, rnoh tăch khlăy.

        Bol ma trôk mih têh yơn lĕ rnăk vâl wa Lê Trung Giang, thôn 6, xã Ia Tô hôm nha hăn ta mir bâh ơm ôi gay ma lêh sầu riêng. Trong hăn ta mir dŭt mhĭr, yơn ăp nuĭh tâm rnăk vâl dâk dŭt gơih nđơr. Wa Lê Trung Giang an gĭt, lôch 2 yan mbro mô geh play, tăch mô khlăy yor Covid-19, yan aơ sầu riêng geh play âk, tăch rnoh khlăy, đăp mpăn an nău geh âk.

        “ Gâp tăm geh 70 tơm sầu riêng geh lêh play, năm aơ geh klâp ma 5 tấn sầu riêng, tơm tăm gâp geh 12 năm hôm, lĕ rngôch lah ntil Ri6. Aƀaơ tăch rnoh nsum klâp ma 35 rbăn tât 36 rbăn prăk/kg, rnôk i khlăy ngăn rĭ geh tăch 40 rbăn prăk. Lĕ rnoh prăk an tơm tăm lĕ klâp ma 50 rkeh prăk, lĕ ma prăk nkhôm hôm nha geh 180 rkeh prăk”.

        Dăch đah mir wa Giang, wa Phạm Quốc Trưởng, nuĭh ndrel thôn lĕ ndăn lêh sầu riêng đŏng. Wa Trưởng an gĭt, rnăk vâl geh 200 tơm sầu riêng tăm tâm breh ta mir cà phê hvi rlău 1,3 ha. Tâm nĕ, geh 100 tơm sầu riêng lĕ lêh play. Wa Trưởng nchrăp rnăk vâl mbra geh 20 tấn sầu riêng tâm yan aơ, rnoh khlăy sầu riêng lĕ geh bu dăn rvăt ta mir 37 rbăn prăk/kg. Lôch n’hâp lĕ prăk kan, wa Trưởng nchroh rnăk vâl nơm mbra geh klâp ma 600 rkeh prăk đŏng.

         “ Bâh ntơm tât aƀaơ gâp tăm sầu riêng Ri6, ba kơi tay lah ŭch tăm tâm breh sầu riêng Thái Lan gay ma tâm ntưp mbuh kao. Ri6 aƀaơ ntŭk gâp bu rvăt 37 rbăn prăk/kg . Năm aơ nchroh mbra geh rlău 20 tấn tâm 100 tơm. Tât năm ba kơi ăp tơm sầu riêng Thái mbra geh ntơm luh play đŏng rĭ mbra lah geh âk lơn. Năm aơ uănh nsum ƀon lan dŭt rhơn ngăn, rnoh khlăy đăp mpăn đŏng”.

         Bâh n’gor Tiền Giang tât Gia Lai rvăt sầu riêng, wa Nguyễn Văn Phước an gĭt, năm aơ sầu riêng bâh ƀon lan ta nkuăl Ia Grai geh âk play, play ueh, kah. Wa n’hanh du đê̆ nuĭh rvăt lĕ dăn rvăt lor, mbơh rnoh khlăy gay ma rvăt sầu riêng bâh ƀon lan ta mir dâl.

       “ Sầu riêng ta Gia Lai dŭt kah ngăn, nuiđh ƀon lan ta aơ sŏk ntil bâh miền Tây jêng sầu riêng n’hanh play dŭt ueh. Rvăt đah rnoh khlăy kơt  ntŭk tăch rgâl way rvăt, an nuĭh tăm nuĭh rvăt geh da dê. ăp nar hên hăn rvăt klâp ma geh 20 tấn”.

       Nkuăl Ia Grai aƀaơ geh 500 ha sầu riêng, tâm nĕ geh 350 ha sầu riêng dôl lêh play, rgum âk ta ăp xã Ia Tô, Ia Bă, Ia Kr ái...đah nău geh bâh 17 tât 18 tấn/ha. Đah ăp mir mât chăm ueh, nău geh mbra rlău 20 tấn/ha. Sầu riêng dơi uănh lah tơm tăm tơm geh hun hao wăng sa bâh ta ntŭk yor tăm êng ntil, mbra dơi tăm tâm breh tâm ăp ntil tơm tăm êng.

       Wa Phan Đình Thắm, kruanh ntŭk kan tuch tăm mât rong nkuăl Ia Grai an gĭt, bôk năm aơ, rnoh sầu riêng ta mir hao tât 60 rbăn prăk/kg. Rnôk ma ăp nuŏh tăm lêh âk play rĭ huch yơn đah ƀon lan hôm nha geh tăch đah rnoh bâh 35 tât 40 rbăn prăk/kg sầu riêng Ri6, n’hanh bâh 45 tât 50 rbăn prăk/kg sầu riêng Dona.

        “ Năm aơ rnoh tăch khlay đah năm ba năp jêng ƀon lan mât tăm dŭt rhơn ngăn tâm năm aơ. Lat năp tay đah n’gâng kan tuch tăm nkuăl geh tâm rgop tay đah ăp xã tâm ban kơt ăp doanh nghiệp n’hanh ƀon lan kan lŏ mir mpŏng kan tay, geh n’hao tay rnoh neh tăm tơm play sa geh âk tâm ban kơt rnoh khlăy mpeh wăng sa ngăn lah tơm sầu riêng. Nkuăl lĕ geh rgum ntĭm đă ƀon lan ta ntŭk dŏng khoa học kĩ thuật n’hanh pah kan jan sa n’hanh joi ntŭk tâm rgop kan ndrel gay ma geh ntŭk tăch rvăt an ƀon lan đăp mpăn.

Nuĭh rblang: Thị Đoắt