Nô Lê Đình Tứ-thôn 4, nkuăl têh Dak Đoa, nkuăl Nkuăl Đăk Đoa, n’gor Gia Lai mhe nti ƀư bên đah chanh rse năm bôk năp, đah rnoh ntuh kơl bơi 100 rkeh prăk, ta mir rlău 300 tơm. Nô Tứ nsing nơm tăm tĭng trong hữu cơ, pay chanh uĕh kah mbra tăch geh khlay âk lơn rnoh ntŭk tăch. Ndrĭ yơn pĕ bôk năp, rnoh tăch knŭng geh 4000 prăk/kg. Lah kơt aơ, rnăk wâl roh âk. Mpŏng “chanh kloh uĕh tăch rnoh khlay âk” kơt nô tă mĭn, dŭt jêr jêng nău ngăn:

“Chanh dŭm lah an tăch dơm. Lah dŭm mô tăch ri pơng rŭng mô dơi đŏng. He săch chanh loại 1 gay tăch jêr đŏng, rnoh geh chanh loại 1 lah đêt. Mhe aơ, khân pơng mbơh ntĭm ƀư chanh kloh uĕh yơn tăng nklăp jêr yor an hăn test, test ri an trok 3 rkeh prăk du tơ̆. Khân pơng mât prăk he bah 15 tât 20 tấn mư an trok, ri gĭt m’hâm ƀư, khlay geh rlău 3 tơ̆ chanh tăch suh”.

Aƀaơ hin,  ta n’gor Gia Lai geh nkual tăm chanh sre rlău 5000 ha dơi tăm lam 15/17 nkuăl, nkual têh, nkual ƀon têh; ndrel 3 ngih măy nkret njêng chanh rse têh, geh dĭng lĕ hao tât hang rhiăng rbăn tấn du năm. Bah meng nĕ, Gia Lai geh 20 ntŭk tâl dŭng n’hanh 19 nkual tăm lĕ dơi pă an mrô. Yơn lĕ rngôch ăp trong nĕ mô dơi nking n’gang nău jŭr thuk bah ndơ chanh sre.

Wa Lê Tấn Hùng-Groi jrô kan tuch tăm mât rong n’hanh hun hao ƀon lan nkuăl Đăk Đoa an gĭt: aƀaơ 20% tâm dĭng lĕ 700 ha chanh rse ta nkuăl, lĕ dơi tâm rgop tăch đah du đêt doanh nghiệp. Yơn n’ăp ăp nuĭh ƀon lan tâm rgop mô dơi geh rnoh khlay. Nkô̆ nău lah rnôk tâm ton lah rnôk rnoh khlay chanh âk, nuĭh ƀon lan lĕ săch trong tăch tĭng rnoh khlay ntŭk rwăt:

“Tâm ton đah doanh nghiệp n’hanh rnăk wâl bah tâm ton bôk năp, ri ƀư luh tăch rnoh khlay nĕ. Mô lah tâm ton rwăt tĭng rnoh khlay ntŭk tăch, nuĭh ƀon lan săch tăch tĭng rnoh khlay ntŭk rwăt. Ăp ngih măy hôm e rwăt ntŭk tâm rgop tĭng rnoh khlay ntŭk rwăt. Ntŭk rwăt hao ri rwăt hao, ntŭk rwăt jŭr thuk ri rwăt jur”./.