Ta nkuăl ƀon têh Buôn Ma Thuột, n’gor Dak Lak, Hiệp hội hồ tiêu Việt Nam ƀư leo rơh rƀŭn nchră lam ntur neh mpeh n’gâng kan tăm tiu Việt Nam. Aơ lah rơh gay ma ăp ntŭk kan nkra njêng, nkret ƀư n’hanh tăch tiu tâm mbơh nău tă blău kan, tâm nkoch nău mhe n’hanh ăp nău jêr jŏt, kŏ văk, ngluh mbơh ăp trong kan ndâk nkra gay ma ntrôl hun hao n’gâng kan tăm tiu ta lam ntur neh.

Tĭng nău mbơh bâh wa Hoàng Thị Liên, kruanh Hiệp hội hồ tiêu Việt Nam, nău ŭch ueh kan bâh ăp ntŭk tăch rvăt nglăp ăp nar lơ ma jêr. Yor nĕ, gay ma mât đăp mpăn nău khlăy bâh ăp ndơ tăch, n’hao nău ueh lĕ jêng nău kan ndal. Ta rơh rƀŭn nchră, wa Vũ Bá Phú, kruanh n’gâng kan mbơh nău kan tăch rgâl bâh n’gâng kan công thương an gĭt, Việt Nam aƀaơ hôm nha lah ngih dak nkra njêng n’hanh tăch tiu an dak bah dih dŭt têh ta lam ntur neh. Năm 2022 dak he tăch an dak bah dih geh klâp ma 220 rbăn tấn, geh tât 55% lĕ rnoh geh ndơ tiu ta lam ntur neh. Yơn lah, gay ma ăp ntil tiu bâh Việt Nam geh knơm ta ntŭk tăch rgâl lam ntur neh an nâp nâl lơn, n’gâng kan tiu hôm nha geh âk nău kan an geh ƀư.