VOV4.M'nông: Nar 23/9, ta Nkual ƀon têh Đà Lạt, Ntŭk rgum kan ntrŭt nsôr tuch tăm mât rong gưl neh dak kan nsum đah Sở Nông nghiệp n'hanh Phát triển nông thôn n'gor Lâm Đồng ƀư rgum nchră ntrŭt nsôr tuch tăm đah nkô̆ "Dŏng rgâl  mhe kỹ thuật tâm nău kan tuch tăm pet lât bah ngai bên di đah rgâl duh nđik trôk nar". Rlău 150 đại biểu lah ăp cán bộ mât bôk kan, nuĭh rnâng kan tuch tăm, ntơh măt ăp hợp tác xã, doanh nghiệp n'hanh ƀon lan kan lŏ mir ta 7 n'gor, nkual ƀon têh râng.

Ăp nuĭh rnâng kan, nuĭh mât bôk kan, ntơh măt hợp tác xã, doanh nghiệp n'hanh ƀon lan kan lŏ mir bah ăp n'gor Lâm Đồng, Phú Yên, Khánh Hòa, Thừa Thiên Huế, Đà Nẵng, Đồng Nai n'hanh nkual ƀon têh Hồ Chí Minh hŏ rong an âk  mông nar tâm ôp, tâm nchră ăp nkô̆ mpeh hun hao tuch tăm công nghệ mhe tĭng trong ăp tŏng nău lư, kơl lor nchrăp tâm nău kan tuch tăm, bah nsing tâm trôk nar n'hanh tŏng đah nău ŭch geh ntŭk  tăch rgâl mpeh săk ŭeh ndơ geh ƀư. Tâm nê, nkoch tât dŭt âk lah ăp nău way trong kơl gay hun hao tuch tăm geh âk nău lư; nkô̆ nău dăp rgum, ntuh kơl rdâk njêng ntŭk ntô ndơ dŏng; ăp trong nkra mpeh khoa học công nghệ, tơm prăk tâm ban kơt nău hun hao tơm nuĭh kan, nău blău mât dŏng n'hanh ƀư tơm công nghệ tâm trong kan tuch tăm...

Nuĭh rblang: Điểu Thân