Tă khuch bah trôk nar tâm rơh rgâl ntơm bah khay wai bôk khay mih, ta nkuâl Tu Mơ Rông, nkual tăm Sâm Ngọc Linh bah n'gor Kon Tum hŏ ntoh âk rơh mih tŭp pler. Gay der khuch tay tă bah mih tŭp pler lơh kơt năm e nơh, N'gâng kan ta ntŭk n'hanh n'gâng kan tuch tăm nkuâl hŏ rđău đă lor nkah njrăng lor nuĭh tăm Sâm Ngọc Linh rdâng lơh đah trôk nar tât khuch êng tĭng ntŭk gay mât njrăng mir tơm.

Tât aƀaơ n'gor Kon Tum hŏ tăm hvi rlău 1.700ha Sâm Ngọc Linh, tâm nê nuĭh ƀon lan tăm êng nklăp 70ha n'hanh lơn âk neh tăm hôm ƀa ƀă lah bah doanh nghiệp. Đah rnoh khlay tơm dak si n'hanh wăng sa âk, aƀaơ ăp tơm Sâm Ngọc Linh ntil 1 năm geh rnoh khlay tăch nklăp 300.000 prăk. Tâm 3 khay aơ ăp rnăk ach o, dăch kêng ach o ta nkuâl hŏ manh bơi 9 rmen prăk ntuh kơl tăm Sâm Ngọc Linh.

Tâm năm e nơh mih tŭp pler n'hanh bu tuh ntoh luh hŏ ƀư bar pe jât rbăn tơm Sâm Ngọc Linh bah nuĭh ƀon lan n'gor Kon Tum geh khĭt roh huach têh mpeh wăng sa. Gay kơl nuĭh ƀon lan nkra bah khuch khat rlău dơi jêr jŏt, ndrel đah tĭng ƀư njong rnoh bah n'gâng kan Ngân hàng, du đêt doanh nghiệp hŏ ntop kơl dơm an nuĭh ƀon lan tơm ntil gay rdâk jêng tay mir Sâm Ngọc Linh./.