VOV4.M’nông- Đah nkô̆ ŭch joi trong doh rklaih nău jêr jŏt kơl an nău rgum neh lŏ ta n’gor geh ƀư têh dăng, tâm ban, tâm di đah nău ngăn ta ntŭk, nar 20/9, ta nkuăl Kon Rẫy, rmôt kan ăp Hội khoa học n’hanh kĩ thuật n’gor Kon Tum tâm rgop đah ntŭk kan tuch tăm mât rong n’hanh hun hao ƀon lan, ntŭk kan Tài nguyên n’hanh môi trường, UBND nkuăl Kon rẫy geh ƀư rơh tâm nchră khoa học “rgum rgâl neh tuch tăm, gay ma ƀư dâng lŏ têh ta n’gor Kon Tum.

18 nău tâm nchră n’hanh ndrel đah âk nău tâm rgop ta rơh rƀŭn nchră lĕ ƀư kloh ueh tay nău geh bâh nău rgum rgâl neh tuch tăm, gay ma rdâk ƀư dâng lŏ têh ta n’gor Kon Tum. Nkre lah mbơh rblang, ndơ̆ mbơh ăp trong kan gay ma doh rklaih ăp nău kŏ văk tâm trong pah kan, kơt lah: nău rgum rgâl neh tuch tăm rlu tay ta nău tâm rgop pah kan jan sa, ê hŏ geh ƀư tĭng nău nchrăp kan, nkra mhe neh lŏ jêng nkual neh tâm rgop pah kan gay ma ƀư nău kan têh, nuĭh ƀon lan hôm nha geh nău mĭn roh nău dơi dŏng neh, nău dŏng công nghệ mhe ta nău pah kan hôm nha mô âk.

Nuĭh rblang: Thị Đoắt