VOV4.M’nông – Kơp tât lĕ khay 9 mhe rlău n’gor Kon Tum lĕ tăm mhe geh rlău 4.700ha bri rlău trong nchrăp n’gluh an tâm năm aơ. Nău mbơh bah Chi cục kiểm lâm n’gor Kon Tum an saơ, kơp tât khay 9 mhe rlău ăp tơm bri, ntŭk kan, ƀon lan tâm n’gor lĕ tăm geh rlău 4.700 ha bri, rlău 200ha nkôp đah trong nchrăp bah n’gor n’gluh an tâm năm aơ. Tâm nĕ 5 nkuăl, nkual ƀon têh tăm bri rlău rnoh nchrăp jao, geh: Sa Thầy, Đăk Hà, Đăk Glei, Kon Rẫy n’hanh nkual ƀon têh Kon Tum.  

Bri bạch đàn cự vỹ tăm ta xă Đăk Kan, nkuăl Ngọc Hồi, n’gor Kon Tum.

Ntil tơm si dơi n’gor Kon Tum tăm dŭt âk lah n’ho 3 n’ha, bạch đàn cự vỹ, giổi... Wa Nguyên Văn Nam, Groi Chi cục trưởng Chi Cục Kiểm lâm n’gor Kon Tum an gĭt: Trong kan mât njrăng an mô ŭch sa bri kơt mât njrăng gay mô tu ndrŭng lah 2 nău kan ma khay tât rmôt kiểm lâm an ƀư dŭt n’hâm. N’gâng kan ƀon lan xă, phường an ntop kơl dŭt n’hâm, lăp n’hanh hăn ndrel đah rmôt kiểm lâm gay hăn ndrel đah ƀon lan, gay ƀa ƀơ ntrŭt đă, nkah ntĭnh, đă rgŏ jă ƀon lan mât njrăng geh săk rnglăy.

VOV Tây Nguyên/  Nuĭh rlang: Y Sưng Phê Ja