Lôch 5 nar đah 17 nău kan tơm ndrel âk nar ƀư tâm rlong khuh n’gor lam ăp nkuâl tâm n’gor, Lễ hội Cà phê Buôn Ma Thuột tâl 9 năm 2025 hŏ mpôch dŭt geh nău dơi uĕh lăng, an tay nău nkah jru tâm nuih n’hâm năch n’hanh nsum mpôl nuĭh ƀư cà phê. Aơ mô dơn lah du nău kan văn hóa săk ntơr êng ma hôm lah rnôk gay n’gâng kan cà phê Việt Nam năl di ntŭk gŭ têh khlay ta bản đồ lam ntŭr neh.

Lor bôk năp tâm lịch sử lễ hội, wa Vanusia Nogueira - Tổng Giám đốc Mpôl mât bôk kan Cà phê lam ntŭr neh (ICO) – hŏ tât râng n’hanh geh nău lah khlay ta măng ntơm pơk. Nar kan dja ntơm njuat hăn khlay tâm nău n’hao têh ntŭk gŭ bah cà phê Việt Nam tâm rêng pă an tơm ndơ tăch lam ntŭr neh. Tâm pe nar râng ăp nău  kan bah lễ hội, wa Vanusia Nogueira nkoch nuih n’hâm bah he:

“Gâp deh luh bah du rnăk tăm cà phê, mpôl hên way lah ta Brazil mpôl hên geh cà phê ta aơ rgâl an mham. N’hanh dŭt uĕh ngăn rnôk gâp saơ nkual ƀon têh dja rêh đah cà phê mhâm jêng n’hanh nklâm ndơ ma n’gâng kan ta ntŭk hŏ rong an ăp nuĭh tuch tăm ƀư njêng. Yor nê lah du măng ngêt sa n’hanh măng ngêt sa nê mô dơn rong an mpôl hên, păng rong an ăp nuĭh ƀư njêng tuch tăm ta nê, lĕ rngôch  ăp rnăk geh măt ta nê, n’hanh aơ lah du ntil ndơ nê nơh dŭt ndrât ndal”

Lễ hội năm aơ geh nău tât râng bah 28 mpôl năch dak bah dih, pơk luh âk trong tâm rsong tăch rgâl n’hanh buăt nthoi. Ăp nău kan ntoh lư kơt: Hội chợ pla n’hơ way mpeh n’gâng kan cà phê, Tâm nchră tâm rsong tăch rgâl dak bah dih, Rơh tâm rlong wâr kĭn cà phê kah khlay Việt Nam 2025 mô lah Nar rgum pâl ngêt dơm cà phê n’hanh hŏ rgum hang rhiăng ndrơng ndơ bah ăp doanh nghiệp tâm n’hanh bah dih dak. Wa Lê Đức Huy, Kruanh Hội đồng thành viên Công ty TNHH MTV tăch n’gluh n’glăp 2/9 Dak Lak, nđơr nkoch:

“Simexco đah nuih n’hâm rhơn nđơr rnôk râng Lễ hội cà phê năm aơ n’hanh mpôl hên uănh nê lah rnôk Tết bah cà phê Việt Nam. Gâp 16-17 năm ƀư mpeh cà phê Dak Lak, râng mbro 6 rơh lễ hội hôm n’hanh ăp rơh lễ hội lah du nău êng n’hanh lễ hội rơh dja lah lễ hội nkret njêng jru. He tâm kơl nsum ŭnh nar mhe gay lăp rgum gay hun hao gay ƀư an robusta Việt Nam geh nău dơi mhe.”

Wăch rgum nklăp 250.000 tơ̆ năch pâl nđaih, tâm nê geh 1.800 năch dak bah dih, Lễ hội mô dơn lah rnôk nkơnh n’hơ bah ăp doanh nghiệp, ma hôm lah rnôk gay nuĭh ƀon lan n’hanh năch pâl nđaih ndrel lăp nsum tâm mông nar văn hóa ntĭt êng bah Dak Lak. Wa Y Lơi Ayun, xã Ea Yông, nkuâl Krông Pắk, nkoch:

“Nuĭh ƀon lan kan lŏ mir râng lễ hội cà phê tâl 9 dŭt rhơn nđơr lah rnôk nta trong dơh an nuĭh ƀon lan kan lŏ mir hun hao wăng sa rnăk wâl nar lơn ma âk. Aơ lah săk geh gay joi tơm ntuh kơl tâm dak n’hanh lam ntŭr neh đŏng.”

Yuh Phương Oanh, nuĭh  kan nsum tâm Hội Doanh nhân mom Gia Lai, mpơl:

“Geh du nău mha êng n’hanh gâp saơ dŭt nkah uĕh yor kruanh rđău kan n’gor Dak Lak dŭt uănh khlay n’hanh ntop kơl an mpôl doanh nhân hŏ njêng luh ntŭk pâl nê lah ntŭk tâm mâp bah ăp doanh nhân tâm bah dih n’gor n’hanh lam ntŭr neh. Ta Buôn Ma Thuột dŭt uĕh kơt aơ ri aơ lah du Lễ hội dŭt di gay âk nuĭh gĭt tât ngăn.

Năch dak bah dih dŭt rhơn ŭch rnôk tât đah lễ hội cà phê Buôn Ma Thuột rơh dja. Nô John Cuttance Dunedin, tât bah New Zealand, nkoch:

“Cà phê ta aơ dŭt kah, ndơ sa dŭt lăp măt uănh, kon nuĭh dêh bên. Gâp mĭn du nar nê nơh gâp mbra plơ̆ tay n’hanh ntuh kơl tâm Dak Lak.”

Wa Marc Knapper, Đại sứ đặc mệnh toàn quyền Hoa Kỳ ta Việt Nam rnê âk nar ƀư dja đŏng:

“Mpôl hên hŏ râng dŭt âk nar têh klay ta Việt Nam, yơn Lễ hội Cà phê Buôn Ma Thuột lah lễ hội dŭt săk ntơr uĕh ma mpôl hên tă râng. Trong leo ƀư dŭt ăp tŏng rêng n’hanh geh âk nău rhơn mƀak”.

Ndrel đah ăp nău kan lễ hội, n’gor Dak Lak hŏ ƀư ntơm pah neh rdâk ƀư khlay kơt Ntŭk rgum tăch rgâl - Khách sạn – Jay gŭ ta nkual ƀon têh Buôn Ma Thuột, trong nchrăp Nkual Công nghiệp Phú Xuân n’hanh lơn lah Nhih máy Cà phê Trung Nguyên Legend – nhih máy cà phê dŭt têh Đông Nam Á. Ăp trong nchrăp kan dja mô dơn rgâl uĕh muh măt nkual ƀon têh ma hôm rgop ndơ̆ Buôn Ma Thuột hăn tât dăch lơn jêng “Nkual ƀon têh cà phê bah lam ntŭr neh". Lah ta rnôk mpôch dŭt, wa Nguyễn Thiên Văn, Groi Kruanh Ủy ban nhân dân n’gor Dak Lak, lah rjăp:

“Nău dơi bah Lễ hội Cà phê Buôn Ma Thuột tâl 9 lah suan ntrôl dăng gay mpôl hên nsrôih lơn tâm dâk kan yor gay rdâk njêng n’gor Dak Lak hun hao ngăch, ndrŏng uĕh, srăch se, săk tơm. Nkre, aơ lah rnôk gay mpư rnê ndơ geh ƀư cà phê Việt Nam n’hanh n’hao săk ntơ lư Cà phê Buôn Ma Thuột ta ntŭk tăch rgâl dak bah dih.”

Lễ hội Cà phê Buôn Ma Thuột tâl 9 mô dơn lah du nar kan văn hóa ma hôm lah du n’gâng tơm khlay ta njăr trong hăn năl săk ntơ lư cà phê Việt Nam. Đah nău tât râng bah ăp mpôl kan dak bah dih, doanh nghiệp, nuĭh ƀon lan n’hanh năch dak bah dih, lễ hội hŏ njêng du ntŭk tâm mâp uĕh êng, pơk luh âk trong hun hao an n’gâng kan cà phê dak he. Nău dơi dja mbra lah jâng ntơm nâp gay Dak Lak mpăr luh tay lot ngai, ndơ̆ Buôn Ma Thuột jêng ntŭk rgum tât bah cà phê lam ntŭr neh.