Ƀư ntơm bah nar 10 tât 14-3, Lễ hội cà phê Buôn Ma Thuột tâl 8 năm 2023 đah nkô̆ “Buôn Ma Thuột ntŭk tât bah cà phê lam ntŭr neh" geh ƀư dŭt têh bah ntơm tât aƀaơ đah 18 nău kan tơm n'hanh âk nău kan n'grŏ tĭng. Ta Lễ hội rơh dja, rlău ma ăp nău kan dơi mât ƀư bah 7 tơ̆ bah năp nơh, âk rup ŭeh mhe dơi n'glăp đŏng đah nău mpŏng nsĭt tay an n'gâng kan cà phê ăp rnoh khlay ngăn ngăn tâm ban kơt kơl năch geh tay âk rlong saơ ăp nkual tăm cà phê tâm lam n'gor. Đah nsan dăng mpeh tuch tăm, Dak Lak hŏ n'hanh dôl jêng ntŭk rgum tât đah ăp lễ hội ndơ tuch tăm. Ntơm bah ăp lễ hội, rup ntĭt êng văn hóa bah nkual neh Tây Nguyên dơi  rêng lam n'hanh jêng du têl nkah jêr chuêl an năch hăn pâl nđaih.

An tât aƀaơ Dak Lak hŏ ƀư geh nău dơi 7 tơ̆ Lễ hội Cà phê Buôn Ma Thuột n'hanh Lễ hội Sầu riêng Krông Pắc lor bôk năp. Ăp rơh lễ hội nkah têl jru văn hóa ƀon lan ăp rnoi nuĭh oh nô ta me neh Tây Nguyên, nsĭt tay an năch ăp nău rlong saơ uĕh. Ta ăp rơh Lễ hội Cà phê Buôn Ma Thuột, nău kan nkoch n'hơ văn hóa, pâl nđaih way lah ntŭk rgum khlay kân jâng năch. Ntơm bah rnôk lễ hội lor bôk năp tâm năm 2005, ndrel đah nkoch n'hơ săk ntơ lư cà phê bah nkual neh dor yôk đah năch tâm dak n'hanh dak bah dih, hŏ ƀư ăp nău kan văn hóa njroh mprơ têh uĕh mhe, nkre đah nău way ơm văn hóa Tây Nguyên n'hanh văn hóa ntĭt êng bah n'gor Dak Lak ta nâm âk mpưm trong ƀư.

Ndrel đah nê lah âk nău kan nkoch n'hơ văn hóa săk ntơr êng bah ƀon lan ăp rnoi nuĭh Tây Nguyên kơt: Lễ hội trong nkual ƀon têh, Lễ hội tâm rlong rveh n'hanh tâm rlong duk si lôk, Rơh tâm rlong trah mon rup si ăp rnoi nuĭh Tây Nguyên… nsĭt an ăp nuĭh năl dơi nău mha êng mpeh nkual yor yôk têh hvi đah nău way ơm văn hóa ơm yău, uĕh êng tâm ntŭk gŭ rêh văn hóa chĭng gong njok jong lam 5 n'gor Tây Nguyên.

Ta Lễ hội Cà phê Buôn Ma Thuột tâl 7 năm 2019, đah nkô̆ "Rsang rnglăy bri neh têh hvi" hŏ geh dŭt âk nău kan văn hóa, njroh mprơ, kơt lễ hội trong nkual ƀon têh đah ăp nău nchreng an uănh chông prêh rdâk nuih n'hâm rhơn n'hanh buăt nthoi play nuih năch tât bah tâm n'hanh bah dih dak; lah bôk nău kan rdâk tay ăp lễ hội way ơm bah ƀon lan ăp rnoi mpôl đê̆ ta Tây Nguyên, an saơ rup uĕh văn hóa, nău n'hao êng săk mpeh ăp drăp ndơ ơm yău ntlơi an tay uĕh êng; aơ hôm lah rnôk gay ăp bu mprơ, nghệ sĩ mpơl nău gĭt blău, rgop mât ndray n'hanh rêng lam nuih n'hâm văn hóa Tây Nguyên.

Ôi tay, Lễ hội Cà phê Buôn Ma Thuột tâl 8 năm 2023 ntơm an ƀư đah nău mpŏng lăp kan bah ƀon lan tuch tăm, tăch rgâl cà phê, n'gâng kan ta ntŭk ndrel đah âk mpưm ƀon lan. Yuh Nguyễn Thị Trang (Công ty TNHH Một thành viên Vic Coffee) an gĭt: "Mpôl hên mpŏng kâp du lễ hội đah âk ntil nău uĕh. Công ty dôl nchrăp na nê̆ mpeh săk uĕh, rnoh âk ndơ geh ƀư, ntŭk gay wơt ăp nuĭh năch râng lễ hội rlong kah cà phê du trong dŭt ăp tŏng".

Wa Lại Đức Đại, Groi Giám đốc Sở Văn Hóa thể thao n'hanh Pâl nđaih n'gor Dak  Lak, mpeh ăp rgâl mhe geh nău khlay n'gâng tơm bah lễ hội dja:

"Mhe tâm Lễ hội tâl 8 dja, mhe bah nkô̆ bôk, lah bah tâl 8 dja Ban tổ chức lễ hội mbra tâm ban ŭch nkô̆ bôk "Buôn Ma Thuột ntŭk tât bah cà phê lam ntŭr neh", n'ho ro an ăp rơh ƀư bah kơi tay. Trong ƀư mpơl dơi nău đăp mpăn têh uĕh mhe geh nău khlay lăp rgum âk gay rdâk njêng an dơi săk ntơ lư cà phê kơt nkô̆ bôk ndơ̆ luh nê lah "Ntŭk rgum tât bah cà phê lam ntŭr neh". Ăp rơh bah năp nơh lah ƀư ta nkual ƀon têh Buôn Ma Thuột ri aƀaơ 15 nkuâl thị xã râng ƀư da dê. Ban tổ chức lễ hội hŏ nsing nơm an ăp n'gâng kan, ăp nkuâl dâk ƀư ăp rêng kan khlay râng ndrel đah lễ hội. ăp lễ hội bah năp nơh dơn an ngêt dơm cà phê ta nkual ƀon têh Buôn Ma Thuột dơm, yơn aƀaơ lĕ rngôch ăp nkuâl ƀư nar an ngêt dơm dja da dê, jêng lah nuĭh ƀon lan n'hanh năch moh ntŭk hăn tât dơi rlong ngêt dơm cà phê da dê. Nuĭh ƀon lan tâm ban kơt năch tâm dak n'hanh dak bah dih mbra rlong lễ hội cà phê ăp tŏng đah ăp ntŭk mhe n'hanh uĕh mƀak.

Nkuâl Buôn Đôn- Ntŭk pâl nđaih ntoh lư bah Dak Lak hŏ an dŏng trong nchrăp ƀư Lễ hội Văn hóa way ơm ăp rnoi mpôl đê̆ nkuâl Buôn Đôn năm 2023 n'hanh nar tâm rlong rveh Buôn Đôn, tâm trôm  bôk nău kan Lễ hội Cà phê tâl 8 - năm 2023 đah âk nău kan văn hóa ntơr uĕh êng kơt Liên hoan văn hóa chĭng gong, mpât mprơ; Rơh tâm rlong tanh tôk, lôk ƀư ndơ uh goh rnoi mpôl đê̆; cheh tanh bok brai, trah mon rup si ƀon lan Tây Nguyên... đah nău tât râng, kan nsum bah âk mpôl kan n'hanh ăp rơh kơn ƀon lan ta nkuâl. Lĕ rngôch ăp ntil nău nê mbra rgop ƀư jêng geh nău dơi an Lễ hội Cà phê Buôn Ma Thuột tâl 8, lễ hội bah ƀon lan n'hanh ăp têl nkah jêr chuêl. Wa Vũ Minh Thoại, Kruanh jrô kan Văn hóa Thông tin nkuâl Buôn Đôn, n'gor Dak Lak nkoch:

        'Tât rnôk dja lĕ rngôch ăp ntŭk pâl nđaih ta nkuâl hŏ ƀư pah kan nchrăp mpeh drăp ndơ rhŏ dŏng mpeh ntŭk manh gŭ bĭch măng, ăp ndơ rhŏ dŏng geh tât. Bar pe nar aơ mpôl hên way hăn ôp uănh, kan nsum đah âk ntŭk saơ lah khân păng dôl ndăn gay mhâm ƀư rhŏ dŏng an năch dŭt uĕh".

Wa Lại Đức Đại, Groi Giám đốc Sở Văn Hóa thể thao n'hanh Pâl nđaih n'gor Dak Lak mpŏng tâm du lễ hội geh nău dơi, buăt nthoi an n'gâng kan cà phê – tơm  tăm ntĭt êng bah nkual neh Tây Nguyên dja:

"Mpŏng geh nău dơi dŭt âk tâm n'gâng kan tăch rgâl cà phê. Rnoh âk năm aơ dơn geh rlău 400 ndrơng ndơ dơm đêt lơn rđĭl đah ăp rơh bah năp nơh yơn  păng mbra rgum âk way tâm n'gâng kan tơm cà phê, mbra rƀŏng an ăp nuĭh mât chăm tăch rgâl tâm ban kơt lah rnôk gay ăp tập đoàn têh lam ntŭr neh uănh khlay tât cà phê Buôn Ma Thuột. Tâl bar kruanh rđău kan tâm ban kơt ban tổ chức lễ hội mpŏng aơ lah rnôk ăp tập đoàn têh mbra mâp na nê̆ ăp nuĭh mât chăm cà phê ntop kơl du trong ngăn ngăn n'hanh joi geh trong buăt nthoi dŭt dăch đah nuĭh tăch n'hanh nuĭh rvăt mô kâp nuĭh ƀư ndranh n'gul wah".

Lôch cà phê, sầu riêng, âk ndơ tuch tăm êng ƀa ƀă mbra geh rnôk hao chông prêh mhe. Ndrel đah nê, văn hóa mbra geh ăp nău hun hao mhe, nsĭt tay nău rhơn, nău uĕh mƀak an nsum mpôl, lam rêh jêng kon nuĭh.