He mbra dơi saơ, bar pe năm aơ ăp ndơ geh ƀư ntĭt êng nkual ƀon lan rnoi mpôl đê̆ n'hanh mpeh yôk yang hŏ kơl nău rêh nuĭh ƀon lan dơi n'hao geh âk. Tâm bah ri aơ, ăp nkuâl hŏ n'hanh dôl ntrôl dăng nkoch trêng, nkoch n'hơ ntrŭt ntrôl hun hao ăp ndơ geh ƀư ntĭt êng, nkre n'hao dăng ntop kơl ăp mpôl tơm, ký ton ăp siƀŭt tăch ndơ đah ăp siêu thị, ntŭk tâm pă tăch têh tâm n'hanh bah dih n'gor.

Ntơm nơh, nklâm Nem sŭr mán Bến En ta nkuâl Như Thanh, n'gor Thanh Hóa lơn âk lah tă bah du đêt ntŭk  tăch ndơ sa ta nkuâl rvăt rhŏ an năch ngêt sa. Ntơm bah rnôk dơn geh săk ntơ lư, săk kah Nem sŭr mán Bến En dơi âk nuĭh ŭch rvăt dŏng, dăn nchăm rvăt lor âk lơn. Gay ƀư dơi nem dja, kônh wa ta aơ hŏ sơch puăch sŭr mán (sŭr nđôch), lah ntil sŭr geh puăch ƀô kah, ntĭt êng bah nkual yôk prêh. Ntil puăch ƀư nem dơi sơch lah puăch mpok, mblu. Nău dja kơl ăp nuĭh ƀon lan rnoi mpôl đê̆ mât rong sŭr mán âk lơn n'hanh nar lơn ma rơ̆ jêng âk. Đah sŭr mán nklăp 100 mblâm, rnăk wa Nguyễn Thị Quy, xã Phượng Nghi ntơm bah du rnăk ach o hŏ nsĭt geh wăng sa đăp mpăn đah bơi 200 rkeh prăk/năm. Wa Nguyễn Thị Quy an gĭt:

"Ăp năm hôm geh trong he tăch luh âk lơn đŏng jêng he hôm nha mât rong âk đŏng".

Ta nklang geh âk ndơ geh ƀư ntĭt êng geh sao OCOP ta ntŭk tăch rgâl, nuĭh ƀư njêng, ăp doanh nghiệp mô hôm geh trong ƀư êng ƀa ƀă lah ân nsrôih grâl săk kah uĕh âk ndơ geh ƀư bah he dơm. Geh kơt nê̆ mơ geh ntŭk tăch ndơ ntĭt êng bah nkual nuĭh ƀon lan rnoi mpôl đê̆ dơi mât jŏ jong, n'hao nău dơi tâm rlong ta ntŭk tăch rgâl. Nău rgum rgâl uĕh săk ntô lĭr, rnoh kah uĕh ndơ geh ƀư hŏ kơl ăp doanh nghiệp ƀư njêng ăp ndơ tăch ntĭt êng ta mpeh yôk yang nar lơn ma  pơk hvi ntŭk tăch, n'hao nsĭt geh wăng sa ăp năm. Wa Phạm Hồng Hà, Hợp tác xã tuch tăm mât rong Nậm Lửu , nkuâl Trạm Tấu, n'gor Yên Bái an gĭt:

"Ntơm nơh gâp tăm ăp năm geh dŭt đêt, nchah nchrai dơm yơn aƀaơ mpôl hên kơt lah mpeh ndơ geh ƀư OCOP nsĭt geh 200%. Nsĭt geh tăch rgâl bah he aƀaơ dôl tăch an ăp công ty mô lah ăp ntŭk tăch ndơ nđĭr uĕh ta Hà Nội, khân păng dŭt ŭch rvăt ndơ bah nkual yôk prêh bah he. Yor ndơ bah mpôl hên lah tăm dơm mô puh dak si khêh djơh"

Ta n'gor Lâm Đồng, nuĭh ƀon lan rnoi mpôl đê̆ dôl ƀư njêng geh luh âk ndơ geh ƀư ntĭt êng đŏng, geh suan ring tam luh rlău bah dih n'gor. Đơn Dương lah ngoăy tâm 2 nkuâl  geh rnoh neh tăm biăp tăch dŭt têh n'gor Lâm Đồng. Nơm geh dŏng công nghệ mhe, âk ndơ geh ƀư tuch tăm bah nkuâl hŏ tât rnoh ndơ geh ƀư tuch tăm kloh uĕh, rnoh kah uĕh VietGap tâm ban kơt lĭr moh săk ntơ "Đà Lạt rsang rnglăy jŭr bah bri uĕh neh ndrŏng đŏng". Bol ân tŏng ăp rnoh tât kloh uĕh khăch khoch lơn bah nuĭh  dŏng sa, yơn lah, aơ lah siƀŭt kơp dơn an nău nsing nơm  n'hanh kah uĕh bah ndơ geh ƀư. Aơ lah ăp trong hăn gay nuĭh tăm pơk hvi tay n'hanh têh jong lơn. Wa Nguyễn Đình Tịnh, Groi kruanh UBND nkuâl Đơn Dương, n'gor Lâm Đồng an gĭt:

"Ntơm bah năm 2019 tât aƀaơ, lĕ rngôch tơm prăk ngih dak ntuh kơl nklăp 17 rmen prăk, ƀơn lan nơm geh ơm 20 rmen prăk, tĭng ƀư âk trong ntĭt leo mpeh trong tŏ pet lât bah ngai, mât chăm ma phân poh hoch lăp êng n'hanh dŏng ăp công nghệ 4.0. Đah Đơn Dương, aƀaơ dơi dŏng nsum săk ntơ lư bah n'gor Lâm Đồng rdâk njêng lah Đà Lạt rsang rnglăy luh bah bri uĕh neh ndrŏng jêng dŭt dơh tâm nkô̆ nău nkoch n'hơ săk ntơ lư tâm ban kơt ndơ̆ ndơ geh ƀư bah Đơn Dương tât ăp  n'gor kiău ma".

Mô rlu rgâl săk kah uĕh ndơ geh ƀư, dŏng khoa học kỹ thuật tâm nău  kan tuch tăm mât rong, nkret njêng, ăp ndơ geh ƀư ntĭt êng bah nkual nuĭh ƀon lan rnoi mpôl đê̆ way dơi geh dăp gưl prêh tâm lam dak. Tĭng ăp nuĭh rnâng kan, ŭch hao prêh mhe ri ăp ndơ geh ƀư bah nuĭh ƀon lan rnoi mpôl đê̆ mpeh yôk yang ân tŏng dơi rnoh di trong rƀŏng dŏng ndơ kloh uĕh, săk kah, tâm di đah trong rƀŏng dŏng sa mhe đŏng. Aơ lah mpet jâk ŭch đă geh bah ntŭk tăch rgâl. Jêng rdâk njêng  săk ntơ lư ân ntơm ma nău nkoch văn hoá dŭt rŏng kon nuĭh, mô dơn lah nkoch trêng ma ntơm bah nuĭh mât njrăng, bah nuĭh ƀon lan rnoi mpôl đê̆ khân păng râng tâm rnôk tuch tăm mât rong, bah ăp trong mât bôk kan rđău đă… ân mpơl dơi bah ăp njônh njănh hun hao jŏ jong nkrum lam. Nkre, gay ndơ̆ ndơ geh ƀư mpeh yôk yang tât đah nuĭh dŏng sa ân dŏng âk dăng công nghệ mbrô, tăch rgâl điện tử rloh rlău n'har bri.

VOV rgum nchih/Nuĭh rblang: Điểu Thân