Aƀaơ, ăp nar lơ ma geh âk ƀon lan gôl yôk lĕ rgâl trong pah kan jan sa, nănh ntuh kơl dŏng công nghệ mhe, ƀư sâm geh ta ƀon tơm nơm.

Xã Giao Phú lah ngoăy tâm âk xã dŭt jêr jŏt ngăn ta nkuăl Bảo Thắng, n’gor Lào Cai. Tâm ban kơt ăp rnăk ƀon lan êng ta xã, ntơm nơh rnoh neh tuch tăm bâh rnăk vâl yuh Phạm Thị Yên nuĭh rnoi Tày mô geh âk. Rlău ma rnoh neh tăm ba kanŭng tŏng sa rĭ ntil tơm êng tâm mir kanŭng ntop tay bar pe rmưn rvăt ndơ sa dơm. Tâm 4 năm ba năp, ur sai yuh Yên geh nkuăl an hăn nti jrô pah kan jan sa tuch tăm dŏng công nghệ mhe.

Geh ngih dak an manh kơl an 200 rkeh prăk ntop đah prăk bâh rnăk vâl, yuh Yên tăm biăp tuh n’hanh rpŭng kho tâm jay jal đah rnoh âk 1,7ha. Tât aƀaơ, nău geh nsĭt tay lah nău ŭch rŏng bâh âk nuĭh. Yuh Phạm Thị Yên an gĭt.

“Bâh ntơm pah kan jan sa tĭng trong công nghệ mhe aơ rĭ nău pah kan mô ir hoach, mât đăp mpăn kloh ueh ndơ geh ƀư rnôk geh tăch an ntŭk tăch rgâl n’hanh n’hao nău geh an rnăk vâl dŭt âk”.

Nău ngăn an saơ, aƀaơ ta âk ntŭk geh ƀon lan rnoi đê̆ gŭ rêh ta lam dak lĕ ntoh geh âk nău pah kan tuch tăm công nghệ mhe đah ăp trong kan êng êng, nsĭt tay săk rnglăy âk an nuĭh pah kan sa ja n’hanh nău geh an nuĭh dŏng ndơ. Lah kơt tâm 3 năm ba năp, nô Ya Thuyên, xã Đa Quyn, nkuăl Đức Trọng, n’gor Lâm Đồng hôm nha wĭ wĕ tâm nău tăm biăp play tăch rgâl, yơn bâh geh nti khoa học kĩ thuật nô lĕ nănh ntuh kơl rlău 100 rkeh prăk tăm 3 sào n’gul blân srat tĭng trong công nghệ mhe. Bâh nĕ, săk rnglăy wăng sa hao âk. Aƀaơ, n’hâp lĕ prăk dŏng, ăp năm nô geh rlău 200 rkeh prăk bâh blân srat.

“Pah kan mô ir hoach nar, ntĭt lah 1 nar lah du hê tŏ rĭ roh lĕ n’gul nar, yơn máy tŏ rĭ kanŭng 30 mnĭt dơm”.

Ndơ bum biăp kloh ueh lĕ n’hanh dôl lah trong hăn hun hao nâp nâl yor nău ŭch dŏng ndơ kloh ueh đăp mpăn bâh nuĭh dŏng ndơ ăp nar lơ ma hao âk. Yor kơt nĕ, tâm ăp năm ba năp, dŏng tuch tăm công nghệ mhe lĕ geh âk ntŭk, doanh nghiệp ta lam dak mbơh tơih ƀư tĭng.

Nuĭh ƀon lan kan lŏ mir lah nsum n’hanh ngăn lah ƀon lan rnoi đê̆ ta nkual njônh ngai, nkual n’har bri lah êng rnôk geh tăng tât khoa học công nghệ way lah geh nău mĭn rvê, klach yor hôm nha mô hŏ gĭt vât. Yơn lah, ăp nuĭh mbơh kơl nău kan ta âk ntŭk lĕ gĭt săch ăp nău kan, nkô̆ nău kan tâm di, dơh dŏng tâm nău kan tuch tăm tĭng nău ngăch bâh ƀon lan. Ngăn lah, ăp nkô̆ nău aơ geh kan ndrel tâm nău bôk nău kan ntĭm nti tuch tăm nkual ƀon lan. wa bu ur Giàng Thị Dung, groi kruanh UBND n’gor Lào Cai an gĭt.

 “Nău ntĭm nti geh săk rnglăy năp lor lah an geh ntoh luh bâh mpeh nuĭh ƀon lan. An geh uănh nău ŭch nău gĭt vât bâh nuĭh ƀon lan lah ŭch nti mơh nău kan. Nkre lah, bgâh nău kan nĕ an geh hun hao nău mpŏng kan ta n’gor, ntĭt lah kơt Lào Cai an geh rgum hun hao tuch tăm tĭng trong dŏng công nghệ mhe, nkre lah n’hao nău dơi geh bâh Lào Cai kơt lah hun hao tơm biăp, play, biăp kloh đăp mpăn, biăp rlơ̆ yan n’hanh chè”.

Aƀaơ, âk rnăk ƀon lan rnoi đê̆ geh cán bộ ta ntŭk ƀa ƀơ mbơh tơih rgŏ jă, bâh nĕ nănh ntuh kơl rgâl mhe. Yơn lah, nău dŏng khoa học công nghệ ta nău kan tuch tăm nkual ƀon lan rnoi đê̆ n’hanh gôl yôk hôm nha geh âk nău mô dơi n’hanh an geh ăp n’gâng kan, ntŭk kan geh kan rgâl mhe an tâm di n’hanh rdâk njêng ăp bôk nău kan, nău kơl an tâm di. Ăp ntŭk an geh uănh khlăy ntĭm nti n’hao nău gĭt vât mât uănh, nău gĭt vât mpeh khoa học n’hanh công nghệ an mpôl cán bộ ntŭk kan ba dâng, ntĭm nti kĩ thuật an ƀon lan kan lŏ mir, an lor đah nuĭh tât râng ƀư nău kan lah bu ur, rdâk njêng nău kan kơl nsơm an doanh nghiệp tâm rgop đah nuĭh ƀon lan tâm nău ƀư tĭng ăp trong kan nău nchrăp dŏng, mbơh rgâl mhe công nghệ mhe, ueh mhe ta nkual ƀon lan, gôl yôk, nkual rnoi đê̆.