VOV4.M’nông:   Rgâl mrô, kơt dŏng công nghệ tâm tuch tăm lŏ mir lĕ n’hanh dôl rgop khlay rgâl trong tuch tăm, tăch ndơ bah âk nuĭh ƀon lan, doanh nghiệp ta Dak Lak. Ăp săk rnglăy ma rgâl mrô nsĭt tay dôl kơl nău kan lŏ mir ta Dak Lak hăn êp lơn tât rgâl mhe.

          Năm 2019, wa Nguyễn Văn Hiếu ta xă Hòa Thuận, nkual ƀon têh Buôn Ma Thuột lĕ tâm rgop đah du doanh nghiệp tâm n’gor, tăm 1.000m2 blân nkŭr tơm Nova. Blân nkŭr dơi tăm tâm jay r’i, mât chăm tŏ êng, dŏng nchih điện tử gay uănh nđôi tâm rnôk hao jêng bah tơm. Jêh 2 năm kơt dŏng ntrong kan aơ, đah âk yan săk geh, uĕh kah lơn, wa Nguyễn Văn Hiếu mĭn lah trong ƀư mhe geh âk nău dơh:

“Kơt dŏng công nghệ mhe aơ kơt n’hŭch prăk dŭt. N’hŭch prăk dŏng nuĭh kan dơh an nuĭh ƀon lan dŭt âk. Lơn lah đăp mpăn ntŭk tăch”.

Bí thư N’gor ủy Dak Lak Nguyễn Đình Trung khâl ntrong kan blân nkŭr kơt dŏng công nghệ mhe.

Mô knŭng kơt dŏng công nghệ mrô an tuch tăm, âk nuĭh ƀon lan ta Dak Lak lĕ janh tâm rgop mpla nsơ, nkoch ndơ bah bah nơm tât nuĭh dŏng tă bah ăp n’gâng tơm mrô. Ntoh lư kơt wa Nguyễn Đình Vạn, xă Cư Né, nkuăl Krông Buk. Bah ndơ cà phê wâr uĕh kah Krông Buk dơi kơp dơn ndơ Ôcp 3 sào gưl n’gor, wa Vạn lĕ mĭn lor tâm rgop đah ăp ntŭk tăch điện tử gay tăch ndơ bah nơm ndơn yor tă bah ăp ntŭk kan ta n’gul kơt bah năp đaơ. Nău rgâl aơ lĕ kơl wa ntêm nkrem prăk, pơk hvi nkra njêng, hun hao ntŭk tăm gay tăch ndơ lŏ mir du trong ngăch, dơh, săk rnglăy.

“Lĕ rngôch ăp nuĭh năch dơi dŏng điện thoại thông minh lăp QR cord gay joi tu tơm bu mbra gĭt ndơ aơ bah ntŭk mât uănh m’hâm ƀư, ndơ dơi nkra njêng tĭng trong m’hâm ƀư, geh sam ƀŭt đăp mpăn đŏng lah mô, tâm rnôk nkra njêng, nkual tăm. Bôl năch mô gŭ êp ntŭk ăp nuĭh dŏng dơi groi nđôi. Kơt nĕ rnoh nsing nơm bah năch đah ndơ aơ lơ dơi hao âk”.

Tĭng wa Nguyễn Hoài Dương, Giám đốc n’gâng kan tuch tăm mât rong n’hanh dôl ƀư tơm khlay tâm nkra njêng lŏ mir, Dak Lak lĕ an rlău 77 rmen prăk ndâk njêng “Lŏ mir mrô”. N’gâng kan lĕ an trong nchrăp mpeh rgâl mrô bah nău kan lŏ mir n’hanh hun hao ƀon lan lvang 2021-2025, rbŏng tât năm 2030. Tă bah kơt dŏng công nghệ mrô an tuch tăm ntơm nsĭt tay ăp nău khlay mhe, nâp nâl tâm nkra tuch tăm bah n’gor.

“Rgâl mrô lah ngoăy tâm âk trong, dơh an nău rgâl mhe đah nău khlay, uĕh n’hanh đah săk rnglăy tâm wăng sa lŏ mir. N’hêl na nê̆ an saơ năm bah năp âk doanh nghiệp n’hanh hợp tác xã lĕ wât, dơi gĭt nău săk rnglăy, nău geh rnok râng rgâl mrô hăn ndrel đah kơt dŏng công nghệ mhe an tuch tăm lŏ mir n’hanh ntơm nsĭt geh săk rnglăy”.

Ăp ndơ lŏ mir OCOP geh mrô QR da dê gay joi ntŭk tu tơm

Nghị quyết Đại hội đại biểu Đảng bộ n’gor Dak Lak rơh tal 17 lĕ mĭn: lŏ mir geh nău khlay tâm trong jâng wăng sa bah n’gor, geh nklăp 305 GRDP n’hanh mkra nău kan pah n’hanh nău geh nklăp 65% nuĭh pah kan. Yor nê, năm tât, nău kan lŏ mir Dak Lak rgum mkra dŭt n’hâm an ƀư tĭng rgâl mrô gay dơi geh ăp nău rƀŏng lĕ n’gluh an. Wa Nguyễn Đình Trung, Ủy viên Trung ương Đảng, Bí thư n’gor ủy Dak Lak an gĭt:

“Rgâl mrô tâm nău kan lŏ mir lah du nău kan dŭt têh hvi n’hanh rêng têh tât nău rêh n’hanh wăng sa bah n’gor. Yor nê n’gor mĭn tâm ăp nkô̆ nău an kơl lor mpeh rgâl mrô ri nău kan lŏ mir lah nău kan dơi an lor. N’gor lĕ geh nghị quyết mpeh rgâl mrô lah nsum n’hanh lĕ ký đah tập đoàn FPT gay ƀư rgâl mrô. Tâm nĕ nău kan lŏ mir lah dơi kơl lor bôk năp”.

Rgâl mrô dôl trong hăn khlay tâm âk nău kan wăng sa-rêh jêng, tâm nĕ nău kan lŏ mir. Đah n’gor way tuch tăm kơt Dak Lak, Nău rgâl mrô lơ geh naư khlay gay ntrôl nkra njêng ndoh ndơ n’hanh pơk hvi dơi hun hao ngăch, rglăp lăp nsum.

Nar 19/8 mhe rlău, N’gâng kan Tuch tăm n’hanh Hunhao ƀon lan lĕ ƀư rgŏ jă rgâl mrô lŏ mir n’hanh hun hao ƀon lan. Nkre mbơh ƀư trong mbơh nău, ntŭk mât prăp rnoh mrô pă, mât uănh mrô tăm. Bôk năp, N’gâng kan tuch tăm mât rong n’hanh hun hao ƀon lan săch tơm gu gang gay rlong ƀư. Nău lôch jêh, ndơ̆ trong mbơh nău, ntŭk rnoh mrô pă, mât uănh mrô nkual tăm an dŏng jêh nĕ trong mbơh nău, ntŭk rnoh mrô mât uănh ndơ sa mât uănh n’hanh ntŭk mât rong gay ƀư dŭt n’hâm, nsrôih têh bah nău kan tâm nău ton ntrôl ngăch rgâl mrô. Bah nĕ, gay rgâl nău mĭn, trong ƀư mât uănh mhe, nta an ntrôl hun hao lŏ mir nâp nâl tĭng trong “Lŏ mir sinh thái, ƀon lan mhe, nuĭh ƀon lan gĭt blău” tâm năm tât.

Khoa Điềm VOV Tây Nguyên

  Nuĭh rlang: Y Sưng Phê Ja