Ntrŭt ntrôl hun hao wăng sa mpôl, jêng ăp nkual tăm tâm ntêng lêng nsum, dŏng khoa học kỹ thuật n’hao săk kah uĕh ndơ tăch, ƀư âk rơh rgum nchră tâm buăt nthoi doanh nghiệp đah ƀon lan…,lah ăp trong nkra ma n’gor Dak Nông dôl tĭng ƀư gay rdâk njêng rêng kan ndơ tuch tăm an tăch, hun hao tuch tăm lah du n’gâng tơm ngăn bah jâng wăng sa.

        Nklang mir blân srat âk pih rêp yơn hôm rsuel play đŏng, yuh Nguyễn Thị Loan, ta xã Đắk Ha, nkuâl Đắk Glong, dôl sơch klêh ngăch play dŭm. Yuh rhơn, ntơm bah rnôk tâm rgop kan nsum tăm ndrel đah hợp tác xã, rnăk yuh hŏ nsĭt geh wăng sa đăp mpăn:

“Ntơm nơh trong tăch luh jêr jŏt yor ndjôt hăn chợ tăch ri biăp dŭt thuk ngăn. Aƀaơ hŏ geh hợp tác xã tăch an he hôm, he djăt ma ƀư geh ndơ kah uĕh ri he mbra nsĭt geh sa âk n’hanh djăt ma kơt nê hun hao dơm.

        Wa Đặng Ngọc Hương, Giám đốc hợp tác xã tuch tăm Đắk Ha, nkuâl Đắk Glong, an gĭt, nhih pah kan dôl tâm rgop kan đah bơi 100 ƀon lan mât chăm ta rlău 300ha. Bum biăp kloh uĕh dah âk geh dơi ăp nuĭh bah nkual ƀon têh Hồ Chí Minh rgum rvăt lĕ. Nău dơi nê lor bôk năp tât bah nău tâm boh lhăt đah ƀon lan tuch tăm luh geh ndơ săk kah uĕh:

“Dŭt khlay lah ân kan nsum dơi, ntơm bah nkoch trêng rgŏ jă gay rdâk njêng dơi rêng tâm rgop kan nsum, rdâk njêng du mpôl tâm rnglăp ri mơ dơi hun hao dăng”.

        Tĭng trong rƀŏng tâm rgop lhăt tuch tăm tĭng rêng geh ndơ tăch, Hợp tác xã Thịnh Phát, ta xã Quảng Sơn, nkuâl Đăk Glong, hŏ geh ăp siƀŭt ton rvăt đăp mpăn ăp bum biăp, lơn lah cải thảo. wa Nguyễn Thị Toản, Giám đốc hợp tác xã, an gĭt:

“Aƀaơ mpôl hên dôl tâm rgop kan nsum đah du công ty ndơ sa bah Việt Nam, lah tăm cải thảo gay ƀư kim-chi Hàn Quốc ta nhih máy ta Long An n’hanh ta Đức Trọng (Lâm Đồng). Mhe aơ mpôl hên ký ton tay đah du công ty ta Nam Nung đŏng. Ri ăp nar lah kônh wa jao cải thảo ngoăy lah sĭt tât Long An, bar lah sĭt tât Đức Trọng n’hanh tâl pe lah rvăt ta ntŭk”.

         Aƀaơ lam n’gor Dak Nông hŏ geh 65 rêng kan tâm rgop tuch tăm, tăch ndơ tuch tăm đah nklăp 10.000 rnăk ƀon lan râng. Aơ lah rnoh dŭt đêt rđĭl đah nău ngăn geh tuch tăm n’gor dja. Wa Phạm Tuấn Anh, Giám đốc Sở Nông nghiệp phát triển nông thôn Dak Nông nkoch, n’gor geh 4 ndơ tăch tơm mpeh tơm jong nar, tâm nê geh cà phê n’hanh tiêu geh rnoh âk, rnoh hvi dâk bôk năp nkual Tây Nguyên. Bah meng nê lah ăp ndơ geh ƀư săk geh n’hanh dơh uĕh mpeh tơm sa play ăp ntil (nklăp 15000ha lah sầu riêng, bơ, chanh rse, play rba, mắc ca...), ăp ntil, bum biăp… (rlău 15000ha).

        Joi ntŭk tăch an ndơ tuch tăm, ăp n’gâng kan, ăp nkuâl ta n’gor Dak Nông hŏ âk tơ̆ hăn ôp ŭanh trong tăch rvăt ta ăp chợ bôk tơm, ăp siêu thị têh ta Nkual ƀon têh Hồ Chí Minh; ƀư rgum nchră gay ăp doanh nghiệp ndrel ƀon lan, hợp tác xã tâm ôp nău lư, joi nău ngơi nsum; kuăl jă doanh nghiệp lăp ntuh kơl nklâm tâl. Wa Phạm Tuấn Anh, an gĭt, n’gor dôl ntrŭt ntrôl hun hao wăng sa mpôl buăt nthoi ƀon lan kan lŏ mir jêng ăp nkual tăm rgum têh hvi, n’hao săk geh ndơ ƀư, tĭng kơn rdâk njêng ăp rêng ndơ tuch tăm an geh tăch.

“N’gâng kan tuch tăm mpôl hên mbra ƀư jêng tay ăp nkual tăm tĭng rêng ndơ tăch, tâm năm aơ lah rgum an lor ma cà phê yor aơ lah n’gâng kan tơm, lôch nê mbra ƀư đah ăp n’gâng kan êng ƀa ƀă. N’hanh ăp nkual tăm mbra jêng ăp hợp tác xã gay ƀư bôk tơm buăt nthoi đah ăp doanh nghiệp bah dih. N’hanh khân păng lah nuĭh mât bôk an ƀon lan tâm ăp  rêng leo ƀư tuch tăm, buăt nthoi ndơ tăch, kơp lĕ ma nkô̆ nău prăk kaih an manh”.

        N’gor Dak Nông aƀaơ geh 3 liên hiệp hợp tác xã, 193 hợp tác xã tuch tăm n’hanh hang rhiăng rmôt tâm boh, dâng sre têh hvi trong kan dja. Ndrel đah nău tĭng kơn dŏng ăp ndơ gay tâm rgop tuch tăm tĭng rêng, Dak Nông dôl rƀŏng tât hun hao tuch tăm âk ntil rnoh khlay, đah ăp trong leo tăm cà phê, tơm sa play nkre đah pâl nđaih, rlong uănh gĭt…aơ lah ăp njuat hăn di gay hun hao tuch tăm lah ngoăy tâm pe n’gâng tơm wăng sa bah n’gor Dak Nông tĭng Nghị quyết đại hội Đảng bộ n’gor hŏ n’gluh an rơh mhe.