Cà phê lah tơm tăm khlay bah Dak Lak, âk rlău 30% rnoh geh cà phê lam dak, rgop tâm nsĭt tăch n’gluh n’hanh nta joi nău kan an hang rhiăng rbăn nuĭh kan ta n’gor. Tâm rnôk cà phê hao khlay mbro, n’gor dôl ntrôl dăng ăp trong nkra gay hun hao jŏ jong ndơ tăch, năl di săk ntơ lư “Cà phê Buôn Ma Thuột” n’hanh rƀŏng tât jêng “Ntŭk wăch rgum bah cà phê lam ntŭr neh”. Gay wât kloh lơn mpeh trong rƀŏng n’hanh ăp trong nkra hun hao ndơ tăch bah  năp nău ŭch geh mhe bah ntŭk tăch rgâl, phóng viên Hương Lý hŏ geh rơh ôp wa Nguyễn Thiên Văn, Groi kruanh UBND n’gor Dak Lak mpeh nkô̆ nău dja.

-Hơi wa, tĭng Đề án hun hao n’gâng kan cà phê jŏ jong tât năm 2030, n’gor Dak  Lak năl geh  rnoh hvi neh tăm nklăp 200.000 ha, đah rĭng geh 2,5 tấn/ha. Ndrĭ gay dơi tât  ăp rnoh dja, n’gor hŏ mhâm geh ăp trong nkra mêh wa?

Wa Nguyễn Thiên Văn:  Tâm rnôk an ƀư Đề án hun hao ndơ tăch cà phê, n’gor Dak Lak mbra rgum ƀư uĕh rêng mât chăm. Nsing ta bản đồ mpeh tuch tăm âk, neh ntu, n’gor mbra ntrŭt nsôr n’hanh njrăng đă nuĭh ƀon  lan sơch nkual neh tâm di gay ntuh kơl mât chăm n’hanh sreh tăm tay cà phê. Mpôl hên mbra njêng ăp nkual way mât chăm têh, rgum tâm rêng ƀư tuch tăm kloh uĕh, tuch tăm geh siƀŭt kơp dơn, đah nău ŭch geh 80% rnoh neh dơi mât chăm tĭng trong rƀŏng dja. Rlău ma nê, n’gor mbra ntuh kơl tâm n’hong dak tŏ gay đăp mpăn tŏng ăp tơm dak tŏ an tơm tăm. N’gor an ƀư tay ăp trong rgum klêh, mât prăp lôch klêh, đăp mpăn 95% ndơ geh ƀư dơi ih pâr di quy định.

- Ơ, aƀaơ ăp nău ŭch geh mpeh rnoh di kah uĕh nar lơn ma khăch khoch, lơn lah đah ăp ndơ geh ƀư tuch tăm săk geh âk mpeh tăch n’gluh kơt cà phê, ndrĭ gay tŏng di đah ăp nău ŭch đă mhe bah ntŭk tăch rgâl, tâm let năp tay, n’gor Dak Lak mbra uănh khlay tât nkô̆ nău dja mhâm mêh wa?

 Wa Nguyễn Thiên Văn: Mpôl hên ntrŏng ân geh nkual tăm, ân săk geh têh hvi. Tâl bar lah dŏng ăp kôp rêng ƀư mât chăm uĕh mhe, kloh uĕh đah ntŭk gŭ rêh n’hanh mpêt nkrem tâm roh huach prăk dŏng kan n’gluh dơi ndơ ƀư geh kơp dơn tâm di đah ăp nău ŭch geh bah ntŭk tăch rgâl tâm dak n’hanh dak bah dih. Nsing ta ndơ geh ƀư săk kah uĕh kơt nê, mpôl hên rgum tâm hun hao ăp rkŭm nkual công nghiệp gay kuăl jă ăp doanh nghiệp wăch rgum tâm nău kan ƀư njêng ta ăp rkŭm công nghiệp bah n’gor. Ntơm bah nê mbra nkret njêng jru đah ăp ndơ geh ƀư tuch tăm tăch n’gluh ƀư n’hao rnoh khlay. Bah meng nê, rdâk njêng ăp săk ntơ lư ndơ geh ƀư tâm ban kơt mât njrăng ntŭk neh tăm cà phê Buôn Ma Thuột gay nsĭt ndơ geh ƀư bah he săk kah, đah rêng ƀư nkret njêng têh uĕh mhe kơt nê luh ntŭk tăch rgâl tâm dak n’hanh lam ntŭr neh.

- Hơi wa, gay hun hao ndơ tăch cà phê jŏ jong ri nha hôm ŭch geh nău tâm rgop kan nsum lhăt tĭng rêng rnoh khlay đŏng. Ndrĭ n’gor mbra moh geh trong kơl gay ntop kơl nuĭh ƀon lan n’hanh doanh nghiệp tâm nău hun hao tuch tăm, gay n’hao rnoh khlay n’hanh pơk hvi ntŭk tăch tĭng rêng rnoh khlay dja mêh?

Wa Nguyễn Thiên Văn: N’gor Dak Lak mbra an ƀư ăp trong hăn ndrel ƀon lan kan lŏ mir, rdâk tay ăp mpôl kan ntop kơl ƀon lan kan lŏ mir, kơt ngân hàng, ntŭk rgum gŭ mĭn, viện khoa học, gay kơl kônh wa tât đah rgâl mhe khoa học kỹ thuật n’hanh tơm prăk dŏng an nău kan tuch tăm đŏng. Nkre, ntrŭt nsôr ăp doanh nghiệp tâm n’gâng kan cà phê ntrôl ngăch ƀư njêng geh ndơ tăch, n’hao rnoh khlay, tŏng an nău ŭch geh hun hao wăng sa- rêh jêng kon nuĭh. N’gor Dak Lak mbra rgum ăp trong nkra ăp kôp droh rklaih ăp kô̆ yơn, geh ăp trong  nkra dŭt đăt ndal n’hanh ntrôl dăng tâm pă gưl, tâm pă nău dơi kan tâm ban kơt ndrel doanh nghiệp gay wăch rgum ăp doanh nghiệp tât ntŭk kơl ta Dak Lak, tâm ban kơt tâm rgop kan nsum đah ăp mpôl kan ƀon  lan kan lŏ mir gay ƀư rêng tâm rgop ndơ geh ƀư dŭt glêh ngăch gay ndơ̆ ndơ tăch bah n’gor Dak  Lak tât đah ntŭk tăch rgâl kơt râng nkret njêng jru ăp ndơ geh ƀư tuch tăm bah n’gor tâm nê geh cà phê.

- Ơ, lah uĕh wa!