Lơ 5/2, Công ty Cổ phần Banana Brothers Farm, nkuăl M’Đrắc, n’gor Đắk Lắk  ƀư rơh rhơn tăch ngluh an dak bah dih 5 container  (100 tấn) prit tât ntŭk tăch rgâl ta Trung Quốc n’hanh Hàn Quốc. Wa bu ur Lê Thị Mỹ Hạnh, Giám đốc Công ty an gĭt, năm e nơh, công ty lĕ geh tăch an dak bah dih rlău 10 rbăn tấn prit tât ăp dak Hàn Quốc, Trung Quốc, Nhật Bản, Mông Cổ… Năm aơ, công ty mbra pơk hvi tay klâp ma 500ha gay ma n’hao rnoh geh prit n’hanh kơl an ntŭk tăch rgâl ta dak bah dih.

“Tâm năm 2023, mpôl hên dŭt knơm ŭch mbra pơk hvi tay farm mhe n’hanh n’hao rnpoh tăch an dak bah dih tât ti nuĭh dŏng ndơ âk lơn tay, yor nău ŭch bâh nuĭh dŏng ndơ lơ ma âk lơn”.

Đah Công ty TNHH Ban Mê Green Farm, nkuăl ƀon têh Buôn Ma Thuột n’gor Đăk Lak, bâh ntơm bôk năm 2025, lĕ ký biên bản kahgĭt n’hanh tâm ton kan đah ăp dak kan ndrel ƀư tĭng rlău 100 container sầu riêng tâm ban dah rlău 2.700 tấn grăp sầu riêng an nđik tăch an dak bah dih. Wa Nguyễn Văn Công, Giám đốc leo kan Công ty an git.

“ Năm 2025 lĕ dơi geh ăp nău dơi geh ueh, kơt lah ăp dak kan ndrel lĕ tâm ton rvăt mpeh nău kan rpaih ntŭk nkret ƀư mbrô 1 n’hanh công ty dôl mbơh tơih tay ăp nău pah kan nsum gay ma tâm rgopw pơk hvi tay ntŭk nkret ƀư n’hanh ăp ntŭk mât prăp tâm rgop nsum êng”.

Du nău rhơn êng  tâm nău tăch cà phê an dak bah dih mpeh ndơ tuch tăm ta Đăk Lăk lah pă săch cà phê ueh kah, cà phê ntoh lư geh ăp ntŭk tăch rgâl ta lam ntur neh mât uănh tay. Ta meng cà phê tăch an dak bah dih hôm nha rnglăy, ăp ntil cà phê nkret ƀư jêng rnih bâh n’gor lĕ geh mpơl na nê̆ nău dơi rnôk ma lĕ geh râng ta âk ngih dak, nkual neh. Tâm nĕ geh ăp ntŭk tăch rgâl dŭt jêr yơn geh âk nău dơi kơt: Mỹ, Nhật Bản, Hàn Quốc, Châu Âu...Wa Lê Đình Tư, Giám đốc Công ty TNHH MTV Minodo Farm Care, nkuăl ƀon têh Buôn Ma Thuột an lah, năm 2025 mbra geh ton tay lah du năm hun hao ngai bâh ndơ tuch tăm ta Đăk Lăk lah geh ntuyh kơl, mât uănh tâm di.

“ Ăp doanh nghiệp nkret ƀư na nê̆ n’hanh ƀư cà phê ueh kah, năp lor lah an geh nău kơl an mpeh nău kan. Tal 2 lah mpeh tơm prăk gay ma rgâl mhe công nghệ, maketing tât râng ăp nău tăch rgâl ta lam ntur neh rnoh prăk dŭt âk an geh nău kơl an bâh trung ương tât ntŭk kan ba dâng”.

Wa Nguyễn Hoài Dương, Giám đốc ntŭk kan tuch mât rong n’hanh hun hao ƀon lan n’gor Đăk Lăk, an gĭt, năm 2025, n’gor geh rgum n’hao tay rnoh ueh ntil ndơ tuch tăm, tâm di đah nău mpŏng tăch an dak bah dih.

“Mpôl hên dŭt mât uănh n’hanh nta nău dơh nơih gay ma ăp doanh nghiệp njêng luh pah kan jan sa rgum nsum, geh nău gĭt kơp dơn, geh nău ntơ n’hanh tâm rlong đah ăp ntŭk tăch rgâl. Na nê̆ lah ăp ntŭk tăch rgâl an geh nău ueh kah âk, ăp nar lơ ma jêr. Nĕ lah nău gay ma dơi geh n’hao nău khlăy ndơ tuch tăm ta Đăk Lăk lah êng, Tây Nguyên lah nsum”.

Đah ăp nău dơi geh têh n’hanh nău nsrôih mô rlu bâh ăp doanh nghiệp, nău knơm ta năm 2025, ndơ tuch tăm ta Đăk Lăk mbra n’hao tay nău ntơ, pơk trong ta ntŭk tăch rgâl an dak bah dih gay ma dơi geh âk nău dơi mhe. Nău aơ ntop dŭt âk nău geh an ƀon lan, doanh nghiệp n’hanh ntrôl hun hao wăng sa- rêh jêng bâh n’gor, mpŏng tât an dơi geh nău hun hao bar rnoh mbrô tâm let năp tay.