Wơt mpôl hên tâm jay kloh uĕh, răm m’ak n’hanh tŏng ăp ndơ dŏng wa Kră Jăn Ha Sung, ta thôn R’Chai, xă Phú Hội, nkuăl Đức Trọng (Lâm Đồng) răm rhơn an gĭt, knơm trôk nar uĕh, rnoh khlay n’hanh ntŭk tăch đăp mpăn jêng chanh rse mhe rlău kơl rnăk wâl geh hang rhiăng rkeh prăk. Ntop đah ndơ geh bah 2 ha cà phê, 4 sào biăp ăp ntil tâm srah tĭng âk ntil, rnăk wâl knŭng ngăch rlet rlău jêr jŏt yor khuch srê Covid-19, ma hôm ntêm nkrem geh prăk âk gay pơk hvi nkra njêng. Tĭng wa Kră Jăn Ha Sung, săk rnglăy aơ knơm tâm nău tâm rgop nkra njêng tĭng tăch ndơ tĭng sam ƀŭt nchăm tĭng ndơ bah ăp doanh nghiệp, HTX ta ntŭk. Wăng sa đăp mpăn, prăk geh âk jêng tết aơ rnăk wâl ƀư răm, wơt năm mhe tŏng ăp n’hanh hơm răm ndrel ƀon lan.

“Đah wăng sa bah jêh Covid-19 tât aƀaơ, rnăk wâl tuch tăm srah mrăch jêng săk geh dŭt đăp mpăn, wăng sa geh mbơh lơn. N’ăp tâm năm 2021 bôl geh srê jêr jŏt yơn prăk hôm e geh đăp mpăn. Bah năp đaơ, ƀon lan rnoi đêt gâp mô gĭt khoa học kỹ thuật, nău kan wăng sa prăk geh mô âk. Ăp năm dăch aơ, nti bah ăp ntrong kan bah nuĭh Yuăn, rlău ma cà phê ri nuĭh ƀon lan ƀư tay biăp tĭng trong lŏ mir công nghệ mhe jêng wăng sa rnăk wâl hun hao”.

Ntrong kan tâm rgop nkra njêng săk rnglăy bah nuĭh ƀon lan

Ntrong kan tăm biăp, nkao, bum, play tĭng sam ƀŭt nchăm ndơ, râng tâm ăp trong tâm rgop dôl rêng hvi tâm ntŭk gŭ rêh nuĭh rnoi mpôl đêt K’Ho ta Phú Hội. Aƀaơ xă lĕ geh bơi 900 rnăk ký ton tâm rgop nkra njêng n’hanh tăch ndơ lŏ mir đah doanh nghiệp, HTX, tâm nĕ geh bơi 300 rnăk nuĭh rnoi mpôl đêt. Ndrel đah nĕ, kônh wa nsrôih kơt dŏng HTX an nkra njêng gay n’hao săk rnglăy wăng sa. Lah mpeh nău rgâl bah ƀon lan nơm, yuh K’Hoan, nuĭh K’ho ta ƀon Chi Rông, xă Phú Hội, nkoch:

“Bah năp đaơ, kônh wa nuĭh K’Ho tuch tăm dŭt âk lah ba lŏ du yan n’hanh du đêt rnoh neh cà phê ranh, săk geh mô âk, mô gĭt kơt dŏng khoa học kỹ thuật an tuch tăm, jêng nău rêh bah kônh wa hôm e mâp âk jêr jŏt. Âk năm dăch aơ dơi ngih dak uănh mĭn ntop kơl, pơk jrô tiăr nti, jao an kỹ thuật tuch tăm ndôp tơm cà phê, srih tăm biăp, bum, nău rêh bah kônh wa nar lơ hao đăp mpăn lơn nkôp đah bah năp.

Tĭng wa Nguyễn Thành Trung, Groi Kruanh UBND xă Phú Hội, knơm janh rgâl nău mĭn tuch tăm, rnoh khlay nkra njêng lŏ mir rĭng geh bah xă lĕ geh rlău 270 rkeh prăk/ha/năm. Lam xă rnoh rnăk ach o hŭch aƀaơ knŭng mô tŏng 1%. Gay mât uănh ăp săk rnglăy dơi geh, tâm năm 2023, gưl ủy n’hanh n’gâng kan ƀon lan mbra ntrôl jao an rghâl trong wăng sa, n’hao săk geh, rnoh ndơ n’hanh rnoh khlay ndoh ndơ lŏ mir. Uănh khlay rgâl mhe trong ƀư nkra njêng đah trong khlay tă bah hun hao wăng sa nsum, ngăn lah tâm nkual rnoi mpôl đêt. Wa Nguyễn Thành Trung, nkoch:

Xă Phú Hội dôl ta jâng nsan hun hao

“Tâm năm tât, mpôil hên mbra dăn ăp tơm prăk gay ntuh kơl an ăp nkual rnoi mpôl đêt, kơl an tâm pă neh tuch tăm, nta nơih an khân pơng hun hao wăng sa rnăk wâl. Mpôl hên ƀư ntung nthoi rgum an nuĭh ƀon lan mâp, mâp đah ăp doanh nghiệp, rmôt kan ndrel, HTX gay bu wât, nti ăp ntrong kan, nti ăp trong nkra njêng hăn ndrel hun hao lŏ mir công nghệ mhe. Bah nĕ geh trong rgâl tơm tăm, n’hao nău khlay ta du ntŭk neh, hao geh prăk bah kônh wa nar lơ âk”.

Phú Hội aƀaơ geh 6.700 ha rnoh neh tuch tăm lŏ mir, tâm nĕ geh 3.680 ha neh tuch tăm tĭng trong công nghệ mhe. Aơ lah nău khlay gay xă pơk hvi tay âk ntrong kan tâm rgop nkra njêng đah nuĭh ƀon lan n’hanh doanh nghiệp, đăp mpăn ntŭk tăch ndơ, n’hao nău rêh drăp ndơ nuih n’hanh bah nuĭh ƀon lan./.