Ngoăy tâm âk nău ƀư khlay ta Lễ hội Cà phê Buôn Ma Thuột rơh tal 9, wăch rgum âk nuĭh tăm cà phê tâm dak uănh tât, nĕ lah rgum tâm rlong nuĭh ƀon lan tâm rlong blău 2025 đah bôk nău Cà phê bên ngăch đah ntŭk tăch rgâl. Râng tâm rlong geh 4 rmôt tâm rlong tât bah n’gor: Dak Lak, Kon Tum, Bình Phước, Sơn La. Aơ lah rmôt dŭt blău dơi săch rlău ăp rwăch tâm rlong bah năp nĕ gay săch ăp rmôtnuĭh ƀon lan tăm cà phê ntoh lư ngăn rgop măt tâm măng tâm rlong n’glêh dŭt. Đah bôk nău “Tăm cà phê tyhông minh”, ăp nuĭh tâm rlong rlet rlău 4 gưl tâm rlong: Nuĭh ƀon lan mbah ôp, nuĭh ƀon lan gĭt blău, nuĭh ƀon lan boăt nthoi n’hanh nuĭh ƀon lan ntŭl rlong. Yuh Hroda Ayun (nuĭh Êđê)-nuĭh tâm rmôt Dak Lak nkoch: tă bah tâm rlontg, săk yuh nơm geh âk nău blău mhe tâm trong tăm cà phê geh uĕh kah âk.

Tăm Cà phê bên ngăch đah ntŭk tăch rgâl dơi n’hŭch ndŏk nja duh jay bil n’hanh mât njrăng tu tơm neh, tu dak n’hanh ntŭk ntô gŭ âm. Tă bah tâm rlong aơ săk gâp mbra sĭt nkoch trêng đah kônh ăp nău wât ma gâp lĕ nti gay kônh wa dơi mât chăm ta mir cà phê ntêm nkrem n’hanh săk rnglăy ngăn gay wăng sa bah kônh wa dơi hun hao n’hanh n’hŭch prăk dŏng bôk năp.

Rgum tâm rlong ƀon lan blău 2025 đah bôk nău Cà phê bên ngăch đah ntŭk tăch rgâl dơi ƀư ta Quảng trường 10/3, nkual ƀon têh Buôn Ma Thuột, n’gor Dak Lak lĕ wăch rgum tât uănh bah kônh wa ƀon lan. Wa Y Mơi Mlô (nuĭh Êđê) tât bah xă Cư Né, nkuăl Krông Búk tât ntrŭt nsôr rgum tâm rlong an gĭt, nău rêh bah kônh wa bah jêh nar rklaih đăp mpăn tât aƀaơ dŭt âk knơm tăm cà phê. Lơn lah bah năm e tât aƀaơ, rnoh cà phê hao âk jêng nău rêh sâm geh lơn. Tĭng wa Y Mơi Mlô nău ƀư rơh tâm rlong “Nuĭh ƀon lan tâm rlong blău” tâm lễ hội cà phê kơl kônh wa n’hao uĕh kah cà phê gay tăch n’gluh.

Nău rêh bah nuĭh ƀon lan dơi hao, yor aƀaơ cà phê dơi khlay. Geh âk nău rgâl, nău rêh hun hao, dơi geh ndơ rwăt nđeh rklư knơm cà phê khlay, nuĭh ƀon lan rhơn ngăn. Tă bah lễ hội cà phê aơ, gay an ăp nuĭh ta lam ntŭr neh gĭt cà phê Buôn Ma Thuột uĕh kah an tăch n’gluh. Mpŏng bah kơi aơ cà phê khlay lơn tay gay nuĭh ƀon lan geh nău rêh uĕh lơn.

Ta rgum tâm rlong nuĭh ƀon lan blău năm 2025 đah bôk nău “Tăm cà phê thôn minh”, ăp nuĭh tâm rlong lĕ mpơl nău wât, nău blău, nău blău ơm n’hanh gĭt blău kơt dŏng khoa học kỹ thuật an mât chăm cà phê thông minh tâm di đah rgâl trôk nar n’hanh ăp nău geh tât nkret njêng, ntŭk tăch, tâm rgop nkra njêng, nkra njêng geh kơp dơn, jêng n’hanh hun hao trong tâm rgop tâm nău kan ndoh ndơ cà phê Việt Nam. Lah nuĭh tâm rmôt Bình Phước, wa Nguyễn Văn Nhân an lah rgum tâm rlong ntŭk pâl uĕh an nuĭh ƀon lan tăm cà phê.

Mpôl hên dŭt lap rnôk râng ta aơ gay mbơh rblang ăp nău gĭt mhe an nuĭh ƀon lan wât trong ƀư geh săk rnglăy âk ndrel đah uĕh kah, wât ntŭk tăch aƀaơ bu mô đă rnoh âk tay ma bu đă uĕh kah ri mư dơi tăch n’gluh luh dak bah dih âk lơn.

Uănh tât bôk nău “Tăm cà phê thông minh”, wa Lê Đình Tư, Giám đốc Ntŭk mât tăm Aerôc Coffee, nkual ƀon têh Buôn Ma Thuột, n’gor Dak Lak an gĭt: ăp năm dăch aơ, ta n’gor lĕ geh âk nău ƀư tâm rgop gay ndâk ƀư trong tăm cà phê uĕh kah âk, đah nău ŭch geh ndơ uĕh, tâm di uĕh an tăch n’gluh.

Mpôl hên lĕ râng bôk nău ƀư nkra njêng cà phê uĕh kah âk bah n’gor, tât aƀaơ cà phê bah mpôl hên lĕ dơi du đêt ntŭk rwăt jêr kơp dơn. Aƀaơ mpôl hên an ntop kơl mpla nsơ cà phê uĕh kah âk bah Buôn Ma Thuột lah êng n’hanh Việt Nam lah nsum. Nĕ lah ngoăy tâm âk nkô̆ nău khlay gay ăp nuĭh way kan, ăp nuĭh wâr, nuĭh êng cà phê ŭch cà phê uĕh kah âk dơi gĭt tât, bah nĕ he mbra mpla nsơ ăp ndơ ơm geh bah cà phê Việt Nam hăn lam ntŭr neh.

Tâm trôm lễ hội cà phê Buôn Ma Thuột rơh tal 9 lĕ ƀư rgum nchră tăch rgâl lam ntŭr neh đah bôk nău “Boăt nthoi, n’hao prêh cà phê Việt Nam”. Rƀŭn nchră rgum tâm nchră ăp nkô̆ nău way jru mpeh nău kan cà phê, kơt: Nu nău ntŭk tăch lam ntŭr neh, trong way dŏng cà phê; Trong nchrăp mbơh ƀư ăp nău kan ntop kơl tâm di đah nău ntrŭnh EUDR đah nău kan cà phê Việt Nam; Ăp nău an tâm di, nău ntrŭnh đah nkual tăm cà phê... Ndrel đah nĕ, ăp nuĭh ntoh măt tâm nchră mpeh nău ƀư tơm doanh nghiệp tâm n’hao prêh cà phê Việt Nam n’hanh ndâk ƀư moh êng cà phê Buôn Ma Thuột-ntŭk tât cà phê lam ntŭr neh; nu nău tăch n’gluh cà phê, năl lah ntŭk tăch n’hanh mpêr n’gar dŏng cà phê lam ntŭr neh aƀaơ hin, nchrŏng trong ntŭk tăch an nău kan cà phê Việt Nam.