Nkô̆ way nkoch nar aơ mbơh tơih mpeh 2 nău ntoh ang ta Lâm Đồng n’hanh Yên Bái đah nău kan tuch tăm công nghệ mhe n’hanh tuch tăm kloh ueh an nău geh tât prăk rmen ăp năm.

Ntơm deh n’hanh têh kuăng ta nkual neh srŏ nđik, trôk nar ueh nđir ăp năm, Nguyễn Đăng Thiên Phi Long deh năm 1992, ta nkuăl ƀon têh Đà Lạt, Lâm Đồng way geh an du nău rŏng têh khlăy an mir biăp bum play ueh jêng bâh rnăk vâl nơm n’hanh nuĭh ƀon lan ta aơ. Lôch nti ngành tài chính-ngân hàng, pah kan tâm công ty geh tât nău tăch rvăt ndơ dŏng tuch tăm, bum mbo, aơ lah rơh nô geh âk nău nkhêp joi gĭt âk trong kan ta ntŭk tăch rgâl rnôk tât râng ăp rơh tăch ndơ tuch tăm ta dak bah dih.

Năm 2017, lôch geh tât râng du rơh tăch ndơ ta Băng kok dak Thái Lan, Phi Long hăn ta Malaysia tât uănh nkual công nghiệp mhe geh ƀư rƀet êng. Geh saơ ăp nău kan ueh mhe tâm nău pah kan mhe, Long mĭn tât ăp nuĭh ƀon lan kan lŏ mir ta  ƀon  nơm văr năm pah kan ŏ r’ah n’hanh ŭch geh trong kan công nghệ mhe dŏng ta nău pah kan tuch tăm.

Mĭn lah ƀư, năm 2018, Phi Long njêng công ty TNHH Finom đah ăp nău kan tơm khlăy lah pă ăp ntil trong kan mpeh tuch tăm công nghệ mhe an ăp ntŭk pah kan nkra njêng n’hanh ăp trong kan geh tât mât prăp, pă ndơ tuch tăm.

Tâm rnôk bôk năp, Finom kanŭng geh rgum ntrŭp, ƀư pah kan trong tŏ djrah êng mhe, ngih jal, ngih bil, ăp trong kan rƀet êng. Nkre ƀư nkre lah uănh gĭt ntŭk tăch rgâl. Long uănh năl bâh nkual neh ƀon tơm Lâm Đồng geh âk rơh nkhêp n’hanh nău dơi an doanh nghiệp hun hao. Nô ntrŭnh mbra geh njêng jŏ jong ta ƀon tơm he nơm.

Năm 2021, công ty bâh Phi Long mbơh tơih nău kan ndrơng tăm an rlău 150 rnăk ƀon lan, đah rnoh neh rlău 5 ha ta n’gor Lâm Đồng n’hanh rlău 40 rnăk ƀon lan pah kan ta ăp n’gor, nkuăl ƀon têh êng. Aƀaơ, công ty Finom mô dơn pă trong kan tuch tăm công nghệ tâm dak nơm ma hôm nha geh tăch an dak Malaysia. Nău kan nsĭt tay naư geh 11,6 rmen prăk.năm, nău geh tât 1 rmen prăk/năm n’hanh doh rklaih nău kan an 18 mom ndăm. Nô lah 1 tâm 32 nuĭh ntoh lư geh dơn nău nkhôm rnê Lương Định Của năm aơ. Phi Long nkoch.

“Nău dŭt khlăy ngăn tâm rnôk njêng nău kan lah an geh tŏng nău ŭch rŏng gay ma hăn pah kan, geh nău khlăy nău nsrôih gay ma rlet rlău nău jêr jŏt, mĭn kan gay ma njêng nău kan, njêng nău ueh êng. Rnôk geh ntrŭnh mpeh sĭt ta ƀon tơm njêng nău kan, gâp ŭch geh njêng nău nơih gay ma ăp nuĭh mom kơt hên geh ntŭk hun hao dâl ta ƀon tơm bâh nơm”.

        Mhe 35 năm deh, yơn bu klô nuĭh Tày, Lục Vân Anh ta nkuăl Yên Thế, nkuăl Lục Yên, n’gor Yên Bái lĕ ơm mât leo nău kan tuch tăm kloh đah rnoh khlăy rmen prăk. Nô lah ngoăy tâm âk nuĭh ntoh lư pah kan-tăch rgâl blău bâh lam dak geh Trung ương Đoàn pă an nău nkhôm rnê Lương Định Của.

Lôch geh mĭn uănh na nê̆ mpeh mih sial, trôk nar, neh ntu bâh ta ntŭk, bu klô ndăm Tày Lục Vân Anh lĕ geh mbơh nău mĭn, mbơh tơih njêng nău kan HTX Sáu không Farm, way pah kan n’hanh pă dŏng ăp ntil ndơ biăp, bum, play geh tâm di nău mpŏng ueh kloh. Khay 8/2018, nô ntơm rlong tăm ta rnoh neh 10 rbăn met vuông; tât năm ba kơi, nô rdâk njêng tay ngih jal, ngih bil đah rnoh neh rlău 5 rbăn met vuông n’hanh tâm rgop đah ăp rnăk ƀon lan ta nkuăl têh Yên Thế tăm, mât chăm n’hanh rvăt ndơ geh ƀư.

(Ntoh bâh nău ŭch rŏng tuch tăm, bâh jê̆ gâp lĕ nsrôih nti an ueh blău gay ma lăp ntu Đại học Nông nghiệp 1 Hà Nội. Tâm rnôk gŭ nti rĭ gâp ŭch let năp tay sĭt ta ƀon ndrel đah ƀon lan hun hao ăp nău kan nsĭt tay nău wăng sa âk. Bâh nĕ, gâp lĕ dŭt nsrôih gay ma nti, tâm rgop đah ăp rnăk geh ndrel nău ŭch dŏng pah kan tuch tăm gay ma ƀư jêng ăp ntil ndơ geh nău geh khlăy”.

Bôk năm 2022, Lục Vân Anh geh pơk hvi tay rnoh neh tăm ăp ntil tơm sa play, nkre lah tâm rgop đah ăp ntŭk kan tăch rgâl ndơ sông sa kloh ueh n’hanh ăp siêu thị geh nău knơm gay ma tăch ndơ geh tăm. Rlău ma nĕ, nô lĕ geh nsrôih mbơh tơih, tâm nkoch nău tă gĭt kan mpeh săk rnglăy nău kan an ăp đoàn viên, mom ndăm êng tâm n’hanh bah dih nkuăl.

Aƀaơ, Vân Anh lĕ tâm rgop geh 3 đoàn viên pơk hvi tay rnoh neh ngih jal, ngih bil hao tât 1,3 ha ta xã Tân Lập n’hanh nkuăl têh yên Thế. Nô Nguyễn Ngọc Khuyến, đoàn viên thôn São, xã Tân Lập, nkuăl Lục Yên an gĭt.

(Bâh nău uănh kơt n’hanh geh nău ntĭm bâh nô Lục Vân Anh ntĭm na nê̆,  ntĭm bâh ndơ dŏng, găr ntil tât kỹ thuật, ăp ntil phân poh, nău mât chăm...tât aƀaơ, rnăk vâl saơ lah dŭt ŭch đah nău kan aơ.

 Nkre geh dŏng khoa học kĩ thuật ta nău tăm, mât chăm tơm tăm, nkre geh dŏng nău dơi geh bâh nău mhe gay ma tăch ndơ gay ma n’hao nău geh, râng geh ăp năm, HTX  Sáu không Farm bâh Lục Vân Anh lĕ an nău geh 60-80 tấn biăp, bum, play, an lĕ nău geh 1,5 rmen prăk/năm, n’hâp lĕ prăk dŏng, nău geh lĕ geh klâp ma 500 rkeh prăk. Tĭng nău mbơh bâh Bí thư đoàn nkuăl Lục Yên- Nông Thanh Sơn, HTX bâh nô Lục Vân Anh lĕ pă nău pah kan an klâp ma 10-15 nuĭh n’hanh kơl an 15 rnăk tâm rgop pah kan geh nău kan n’hanh nău geh đăp mpăn.

(Lục Vân Anh lah mom ndăm dŭt gơih nđơr, nsrôih kan, ŭch kan. Bâh ăp nău kan tă blău tâm nău ngăn bâh nơm, nô lĕ kaưl đă nău tât râng kan bâh ăp đoàn viên, mom ndăm geh ndrel nău nsrôih gay ma njêng HTX. Nău kan bâh nô mô dơn nsĭt tât an nuĭh dŏng ndơ ăp ntil ndơ tuch tăm kloh ueh ma hôm nha ntrŭt nsôr nău kan mom ndăm an hun hao wăng sa rêh jêng ta nkuăl Lục yên.

 Bâh ăp nău nsrôih săk nơm, nar 4/11, nô Lục Vân Anh nsơm rnê lah 1 ngoăy tâm 32 nuĭh mom ndăm ntoh lư geh kơp dơn nău nkhôm rnê Lương Định Của yor Trung uơng Đoàn pă an.